Updated: November 16, 2026, 2:18 PM IST
| Lahore
تبلیغی جماعت پاکستان کے امیر اور معروف عالمِ دین مولانا حاجی نذر الرحمان ۹۷؍ برس کی عمر میں انتقال کر گئے۔ ان کی وفات سے ملک کے دینی و مذہبی حلقوں میں سوگ کی فضا چھا گئی۔ مولانا نذر الرحمان نے اپنی زندگی دعوت و تبلیغ کے لیے وقف کر رکھی تھی اور مولانا حاجی عبدالوہاب کے بعد ۲۰۱۸ء میں جماعت کی امارت سنبھالی تھی۔ ان کی دینی و تبلیغی خدمات کو مختلف مذہبی اور سیاسی شخصیات نے خراجِ عقیدت پیش کیا ہے۔
مولانا نذرالرحمان۔ تصویر: ایکس
تبلیغی جماعت پاکستان کے امیر اور معروف عالمِ دین حضرت مولانا حاجی نذر الرحمان ۹۷؍ برس کی عمر میں انتقال کر گئے۔ ان کے انتقال کی خبر سے ملک کے دینی و مذہبی حلقوں میں غم کی لہر دوڑ گئی۔ اطلاعات کے مطابق وہ کچھ عرصے سے علیل تھے۔ ان کی وفات پر مختلف مذہبی و سیاسی شخصیات نے گہرے رنج و افسوس کا اظہار کرتے ہوئے ان کی دینی اور تبلیغی خدمات کو خراجِ عقیدت پیش کیا ہے۔ مولانا نذر الرحمان یکم اکتوبر ۱۹۲۹ء کو ضلع راولپنڈی کے علاقے بلوال میں پیدا ہوئے۔ انہوں نے ابتدائی دینی تعلیم راولپنڈی کے مختلف مدارس میں حاصل کی۔ بعد ازاں مدرسہ خادم علومِ نبوت، کٹھیالہ شیخاں، ضلع گجرات سے ۱۹۴۹ء اور ۱۹۵۰ء کے دوران دورۂ حدیث مکمل کیا۔ تعلیم سے فراغت کے بعد انہوں نے دینی خدمات کا آغاز کیا اور امامت و تبلیغ کے میدان میں سرگرم ہوگئے۔
یہ بھی پڑھئے: ایران جوہری ہتھیار ملنے پر دنیا کو یرغمال بنا سکتا ہے: روبیو
مولانا نذر الرحمان کا شمار پاکستان میں تبلیغی جماعت کے ابتدائی اور سرگرم کارکنوں میں ہوتا تھا۔ انہوں نے اپنی زندگی دینِ اسلام کی دعوت و تبلیغ کے لیے وقف کر رکھی تھی۔ وہ طویل عرصے تک تبلیغی جماعت کے سابق امیر مولانا حاجی عبدالوہاب کے ساتھ وابستہ رہے اور جماعت کی مختلف سرگرمیوں میں اہم کردار ادا کرتے رہے۔ انہیں جماعت کے نائب امیر کی حیثیت سے بھی خدمات انجام دینے کا موقع ملا۔ نومبر ۲۰۱۸ء میں مولانا حاجی عبدالوہاب کے انتقال کے بعد مولانا نذر الرحمان کو تبلیغی جماعت پاکستان کا امیر مقرر کیا گیا تھا۔ اس کے بعد سے وہ جماعت کی قیادت کی ذمہ داریاں انجام دے رہے تھے۔ ان کی قیادت میں تبلیغی جماعت کی دعوتی سرگرمیاں جاری رہیں اور وہ دینی اجتماعات و دیگر جماعتی امور میں رہنمائی کرتے رہے۔
یہ بھی پڑھئے: وزیر اعلیٰ وجے آج سونیا گاندھی کی کتاب کی رسم اجراء میں شرکت کیلئے دہلی جائیں گے
وفاقی وزیر داخلہ محسن نقوی نے مولانا نذر الرحمان کے انتقال پر افسوس کا اظہار کرتے ہوئے کہا کہ مرحوم نے دینِ اسلام کی تبلیغ کے لیے گراں قدر خدمات انجام دیں۔ پاکستان علماء کونسل کے چیئرمین حافظ طاہر اشرفی نے بھی ان کی وفات کو دینی حلقوں کے لیے بڑا نقصان قرار دیا اور مرحوم کی مغفرت کے لیے دعا کی۔ مولانا نذر الرحمان کی رحلت سے تبلیغی جماعت پاکستان ایک بزرگ اور تجربہ کار دینی رہنما سے محروم ہوگئی ہے۔ ان کی زندگی دعوتِ دین، دینی تعلیم اور تبلیغی سرگرمیوں کے لیے وقف رہی، جس کے سبب دینی حلقوں میں ان کی خدمات کو قدر و احترام سے یاد کیا جاتا رہے گا۔