تاریخ میں پہلی بار ممبئی کے ماہم پولیس اسٹیشن میں ایک نامعلوم فرد کے خلاف کبوتروں کو دانہ ڈالنے پر ایف آئی آر درج کی گئی ہے۔ ایف آئی آر میں ایک نامعلوم فرد پر الزام عائد کیا گیا ہے ۔

تاریخ میں پہلی بار ممبئی کے ماہم پولیس اسٹیشن میں ایک نامعلوم فرد کے خلاف کبوتروں کو دانہ ڈالنے پر ایف آئی آر درج کی گئی ہے۔ ایف آئی آر میں ایک نامعلوم فرد پر الزام عائد کیا گیا ہے کہ اس نے ایل جے روڈ پر کبوتر خانہ کے قریب، ہندوجا اسپتال کے قریب اور ڈومینوز پیزا آؤٹ لیٹ کے قریب کبوتروں کودانہ ڈالا ہے۔ یہ کارروائی بامبے ہائی کورٹ کے اس حالیہ حکم کے بعد کی گئی ہے جس میں عدالت نے عوامی اور کھلے جگہوں پر کبوتروں کو دانہ ڈالنے پر روک لگانے اور حکم عدولی کرنے والوں کے خلاف معاملہ درج کرنے کا حکم دیا تھا۔ ملک کی تاریخ کا یہ پہلا ایسا معاملہ ہے جس میں کبوتروں کو دانہ ڈالنے پر پولیس نے ایف آئی آر درج کی ہے۔ یہ ایف آئی آر ماہم علاقہ میں درج کی گئی ہے۔ اس طرح کے معاملوں میں انتظامیہ نے اب زیادہ سخت موقف اختیار کرنے کا فیصلہ کیا ہے۔ 

یہ بھی پڑھئے: شہرومضافات میں موسمی بیماریوں میں اضافہ

۳۰؍ جولائی کو بامبے ہائی کورٹ نے جانوروں سے محبت کرنے والوں کے ذریعہ داخل کی گئی ایک عرضی پر سماعت کی تھی۔ اس دوران عدالت نے ممبئی میونسپل کارپوریشن کو حکم دیا تھا کہ عوامی جگہوں پر دانہ ڈالنے والوں کے خلاف ایف آئی آر درج کی جائے۔ عدالت نے بی ایم سی کو یہ بھی حکم دیا کہ وہ شہر کے کبوتر خانوں میں کبوتروں کی بھیڑ کو کنٹرول کرنے کیلئے ضروری اور سخت قدم اٹھائے۔ عدالت نے سماعت کے دوران کہا کہ انتظامیہ کی واضح پابندی کے باوجود لوگ اب بھی کبوتر خانوں میں کبوتروں کو دانہ ڈالتے دکھائی دے رہے ہیں۔ جب حالات مزید بگڑنے لگے تو ہائی کورٹ نے بی ایم سی کو یہ حکم دیا کہ اگر اس کے احکامات کی خلاف ورزی کی جاتی ہے تو کبوتروں کو دانہ ڈالنے والوں کے خلاف سخت کارروائی کی جائے اور انہیں سزا دی جائے۔