ممبئی یوتھ کانگریس کی صدر زینت شبرین کی قیادت میں سیکڑوں ورکروں نے مسافروں سے بات چیت کی ، بیداری پمفلٹس تقسیم کئے

نیٹ پیپر لیک معاملے کے خلاف کانگریس کی جانب سے ممبئی میں احتجاج کا سلسلہ جاری ہے۔ پیر کو ممبئی یوتھ کانگریس کی صدر زینت شبرین کی قیادت میں ممبئی یوتھ کانگریس کے عہدیداران اور کارکنان نے ممبئی میٹرو میں سفر کیا اور نیٹ پیپر لیک معاملے کے خلاف وسیع عوامی بیداری مہم چلائی۔ اس دوران طلبہ کے مستقبل سے کھلواڑ کرنے والے پیپر لیک ریکیٹ کے خلاف شدید ناراضگی ظاہر کرتے ہوئے بی جے پی حکومت کے کردار کی سخت مذمت کی گئی۔

یہ بھی پڑھئے : مہنگائی کے خلاف شیو سینا(ادھو) کا تھانے میں زبردست احتجاج

جاری کردہ پریس ریلیز کے مطابق ممبئی میٹرو میں سفر کرنے والے ہزاروں مسافروں تک پہنچتے ہوئے یوتھ کانگریس کارکنان نے نیٹ پیپر لیک سے متعلق تفصیلی معلومات پر مشتمل پمفلٹس تقسیم کیے۔ ان پمفلٹس میں ملک بھر میں سامنے آنے والے مختلف پیپر لیک معاملات، گرفتار ملزمین کا پس منظر، اور پیپر لیک ریکیٹ و برسرِ اقتدار بی جے پی سے وابستہ افراد کے مبینہ روابط کا ذکر کیا گیا تھا۔

اس موقع پر یوتھ کانگریس کارکنان نے الزام لگایا کہ پیپر لیک صرف امتحانی نظام کی خامی نہیں بلکہ ایک منظم بدعنوان نظام کا نتیجہ ہے۔

یہ بھی پڑھئے : بی ایم سی صحت مراکز کے احاطوں کو صاف، غیر قانونی تعمیرات سے پاک رکھنے کی ہدایت

مہم کے دوران کارکنان نے میٹرو مسافروں سے گفتگو کی اور کہا کہ اس گھوٹالے کی وجہ سےنوجوانوں میں شدید غصہ اور بے چینی پائی جا رہی ہے، کیونکہ لاکھوں طلبہ دن رات محنت کرکے امتحان دیتے ہیں، لیکن اگر اقتدار کے تحفظ میں پیپر فروخت کیے جا رہے ہوں تو عام طلبہ انصاف کیلئے کہاں جائیں؟ زینت شبرین نے کہا کہ نیٹ جیسی قومی سطح کی اہم امتحان کا پیپر لیک ہونا نہایت سنگین معاملہ ہے۔ انہوں نے کہا کہ لاکھوں طلبہ کے کیریئر، والدین کے خواب اور برسوں کی محنت ایک بدعنوان ریکیٹ کی وجہ سے تباہ ہو رہی ہے۔ انہوں نے الزام لگایا کہ ملک کی نوجوان نسل کو انصاف دلانے میں بی جے پی حکومت مکمل طور پر ناکام ثابت ہوئی ہے۔