لیگل ٹیم کے مشورے سے صحیح جواب پر مشتمل کیوآر کوڈ کا ممبئی امن کمیٹی کے دفتر میں فیڈریشن آف مہاراشٹر مسلم کے تعاون سے اجراء عمل میں آیا۔ عوام سے کثیر تعداد میں جواب داخل کرنے اورعلماء و ائمہ سے اس جانب توجہ دلانے کی اپیل۔

شدید مخالفت کی باوجود یونیفارم سول کوڈ کے نفاذ کے سلسلے میں حکومت مہاراشٹر نے پیش قدمی کرتے ہوئے تجویز اور مشورے طلب کئے ہیںاورآخری تاریخ ۱۵؍نومبر مقرر کی ہے۔ان سوالوں کے آن لائن جوابات کے لئے آل انڈیا مسلم پرسنل لاء بورڈ نے کیو آر کوڈ جاری کیا ہے۔ اس کا بدھ ۲۸؍اکتوبر کی شام کو ممبئی امن کمیٹی کے دفتر میں اجراء عمل میں آیا ۔  واضح ہوکہ حکومت مہاراشٹر کے ذریعے پوچھے گئے ۳۷؍ سوالات میں سے۳۱ ؍سوالوں کے جوابات آبجیکٹو ہیں۔ ان کے جوابات’ ہاں یا نا‘میں دینا ہے جبکہ۵؍ سوالوں کے جواب مختصر الفاظ میں تحریری طور پر دیناہے۔

اس ضمن میں آل انڈیا مسلم پرسنل لاء بورڈ کی جانب سے یہ بتایا گیاہے کہ چونکہ عوام کو پورٹل کھولنے اور سوالوں کا صحیح جواب کیا ہوگا ، اس کی معلومات نہیں ہے ـ اس لئے آل انڈیا مسلم پرسنل لاء بورڈ نے بورڈ کی لیگل ٹیم کے مشورے سے صحیح جواب پر مشتمل ایک کیوآر کوڈ جاری کرنے کا فیصلہ کیا۔یہ کیوآر کوڈ فیڈریشن آف مہاراشٹرمسلم کے تعاون سے جاری کیا گیا ہے۔

یہ بھی پڑھئے: مالشيج گھاٹ میں اڈانی کے مجوزہ بجلی منصوبے کو شدید مخالفت کا سامنا

کس طرح بنایا گیا ہے کیو آرکوڈ ؟

کیو آر کوڈ کھولتے ہی ایک مختصر ویڈیو کے ذریعےبتایا گیا ہےکہ کیو آر کوڈ کھولنے کے بعد آگے کیا کرنا ہے، صحیح جوابات کیا ہیں، اُن کو آن لائن کیسے بھرا جائےگا، جن سوالوں کے جواب میں مختصر تحریر لکھنی ہے، اسے بھی لکھ دیا گیا ہے، اُس کو کاپی کرکے کس طرح حکومت کے پورٹل پر چسپاں کرنا ہے ، یہ بھی بتادیا گیا ہے ـ۔

حکومت مہاراشٹر نے عوام ، تنظیموں اور اداروں سے جوابات مانگے ہیں۔ اس ضمن میں بورڈ نےابھی انفرادی حیثیت کے جوابات کے لئے کیوآر کوڈ جاری کیا ہے، جلد ہی تنظیموں اور اداروں کے جواب کے لئے ہدایت دی جائے گیـ۔ اس کیوآرکوڈ کےاخیر میں مہاراشٹر حکومت کے پورٹل کا لنک بھی شیئر کردیا گیا ہے تاکہ وہیں پر سوالات معلوم ہوجائیں اور کیو آرکوڈ میں درج جواب دینے میں آسانی رہے ۔ـ 

ـمیٹنگ میں مسلم پرسنل لاء بورڈ کے اراکین اور دیگر تنظیموں کے عہدیداران مولانا محمود احمد خاں دریابادی، مفتی سعیدالرحمٰن فاروقی، حافظ اقبال چونا والا، مولانا ظہیر عباس رضوی، ڈاکٹر عظیم الدین، عبدالحسیب بھاٹکر، شاکر شیخ اور فرید شیخ وغیرہ شامل تھے۔

یہ بھی پڑھئے: ایولہ: لومیریج پر ہنگامہ، دُلہے کو زندہ جلانے کی کوشش، مارپیٹ میں متعدد زخمی

دیگر تنظیمیں بھی کوشاں

یادر ہے کہ دیگر تنظیمیں بھی یو سی سی کے خلاف بیداری مہم کے تعلق سے مسلسل کوشاں ہیں اور الگ الگ جگہ میٹنگیں بھی کی جارہی ہیں۔ اے پی سی آر کی جانب سے اس تعلق سے سپریم کورٹ کا بھی دروازہ کھٹکھٹایا گیا ہے۔