امریکی خلائی ادارے ناسا نے بین الاقوامی خلائی اسٹیشن (آئی ایس ایس) پر موجود خلابازوں کو فضائی رساؤ کے خدشات کے پیش نظر عارضی طور پر محفوظ پناہ گاہوں میں منتقل ہونے اور ممکنہ انخلاء کی تیاری کرنے کی ہدایت دی۔ مسئلہ روسی ماڈیول ’’زویزدا‘‘ کے ٹرانسفر ٹنل (PrK) میں سامنے آیا، جہاں برسوں سے دراڑیں اور معمولی لیکس رپورٹ ہوتے رہے ہیں۔

بین الاقوامی خلائی اسٹیشن (آئی ایس ایس) پر جمعہ کو اس وقت احتیاطی اقدامات کیے گئے جب روسی حصے میں موجود ایک ماڈیول سے فضائی رساؤ کے خدشات نے خلائی اداروں کی توجہ اپنی جانب مبذول کر لی۔ ناسا نے صورتحال کا جائزہ لیتے ہوئے اپنے پانچ خلابازوں کو عارضی طور پر محفوظ پناہ گاہوں میں منتقل ہونے اور ممکنہ ہنگامی انخلاء کے لیے تیار رہنے کی ہدایت دی، تاہم چند گھنٹوں بعد یہ حکم واپس لے لیا گیا۔ ناسا کی ترجمان بیتھنی اسٹیونز نے سوشل میڈیا پلیٹ فارم ایکس پر جاری بیان میں کہا کہ ’’زویزدا سروس ماڈیول کا ٹرانسفر ٹنل، جسے PrK کہا جاتا ہے، کافی عرصے سے دراڑوں اور لیکس کا شکار ہے، اور روسکوسموس اب تک مختلف اقدامات کے ذریعے اس مسئلے کو کم کرنے کی کوشش کرتا رہا ہے۔ یہ دراڑیں ہمیشہ سے ناسا کے لیے تشویش کا باعث رہی ہیں اور ہم ان پر قریبی نظر رکھے ہوئے ہیں۔‘‘ 

یہ بھی پڑھئے: چین دنیا بھر کی خفیہ معلومات حاصل کرنے کیلئے لنکڈ ان کا استعمال کر رہا ہے؟

انہوں نے مزید کہا کہ ’’انتہائی احتیاط کے پیش نظر ناسا نے اسپیس ایکس کریو ۱۲؍ کے چار ارکان اور ناسا کے خلاباز کرس ولیمز کو ہدایت دی کہ وہ ڈریگن خلائی جہاز میں محفوظ پوزیشن اختیار کریں جبکہ مرمتی کام جاری ہے۔‘‘ تازہ ترین پیش رفت کے مطابق روسی خلائی ایجنسی روسکوسموس نے زویزدا ماڈیول میں جاری ساختی مرمت کا عمل عارضی طور پر روک دیا تاکہ مزید پیمائشیں کی جا سکیں اور دستیاب ڈیٹا کا تفصیلی جائزہ لیا جا سکے۔ اس فیصلے کے بعد ناسا نے خلابازوں کو ہدایت دی کہ وہ ’’سیف ہیون‘‘ پروٹوکول ختم کرکے معمول کی سرگرمیوں پر واپس آ جائیں۔ بیتھنی اسٹیونز نے ایک اور بیان میں کہا کہ ’’روسکوسموس نے جمعہ کو PrK ٹرانسفر ٹنل میں جاری مرمتی کوششوں کو اضافی جائزے کے لیے روک دیا ہے۔ اس پیش رفت کو مدنظر رکھتے ہوئے ناسا نے ڈریگن خلائی جہاز میں موجود عملے کو محفوظ پناہ گاہ کے طریقۂ کار ختم کرنے اور بین الاقوامی خلائی اسٹیشن پر معمول کی کارروائیوں کی طرف واپس آنے کی ہدایت دی ہے۔‘‘ 

یہ بھی پڑھئے: یومِ ماحولیات: اے آئی کا پانی کا استعمال خطرناک حد تک بڑھنے کا خدشہ: یو این

رپورٹس کے مطابق یہ مسئلہ روسی زویزدا ماڈیول کے PrK ٹرانسفر ٹنل میں موجود باریک دراڑوں سے منسلک ہے، جہاں ۲۰۱۹ء سے وقفے وقفے سے فضائی رساؤ ریکارڈ کیا جاتا رہا ہے۔ حالیہ دنوں میں رساؤ کی رفتار میں اضافہ بھی نوٹ کیا گیا، جس کے بعد ناسا اور روسکوسموس نے صورتحال کا ازسرنو جائزہ لیا۔ واضح رہے کہ زویزدا ماڈیول بین الاقوامی خلائی اسٹیشن کے قدیم ترین حصوں میں شمار ہوتا ہے اور کئی برسوں سے اس کے ٹرانسفر ٹنل میں دراڑوں اور فضائی رساؤ کے مسائل سامنے آتے رہے ہیں۔ ناسا اور روسکوسموس ان دراڑوں کی اصل وجہ جاننے اور مستقل حل تلاش کرنے کے لیے مشترکہ طور پر کام کر رہے ہیں۔ ۲۰۲۴ء میں ناسا کے ایک آڈٹ نے بھی اس مسئلے کو آئی ایس ایس کے لیے اہم حفاظتی خطرات میں شامل کیا تھا۔ اگرچہ موجودہ صورتحال میں خلابازوں یا خلائی اسٹیشن کو فوری خطرہ لاحق نہیں بتایا گیا، تاہم خلائی ادارے احتیاطی تدابیر جاری رکھے ہوئے ہیں اور مسئلے کے مستقل حل کے لیے تعاون کر رہے ہیں۔