دو بار کے اولمپک تمغہ یافتہ اسٹار نیزہ پھینکنے والے ایتھلیٹ نیرج چوپڑہ فوج میں لیفٹیننٹ کرنل بن گئے ہیں۔ وزیر دفاع راج ناتھ سنگھ اور بری فوج کے سربراہ اوپندر دویویدی نے نیرج کو یہ اعزازی عہدہ دیا۔

دو بار کے اولمپک تمغہ یافتہ اسٹار نیزہ پھینکنے والے ایتھلیٹ نیرج چوپڑہ فوج میں لیفٹیننٹ کرنل بن گئے ہیں۔ وزیر دفاع راج ناتھ سنگھ اور بری فوج کے سربراہ اوپندر دویویدی نے نیرج کو یہ اعزازی عہدہ دیا۔ اس موقع پر نیرج چوپڑا فوجی وردی میں نظر آئے۔ تقریب کے دوران انہیں لیفٹیننٹ کرنل کی اعزازی رینک سے نوازا گیا۔ ہریانہ کے پانی پت کے قریبی گاؤں کھندرا سے تعلق رکھنے والے۲۷؍ سالہ نیزہ پھینکنے والے ایتھلیٹ نیرج چوپڑا نے ٹوکیو اولمپکس۲۰۲۰ء میں سونے کا تمغہ جیتا تھا۔ پیرس اولمپکس ۲۰۲۴ء میں انہوں نے چاندی کا تمغہ حاصل کیا۔ اس سال نیرج چوپڑہ کو علاقائی (Territorial) فوج میں لیفٹیننٹ کرنل کی اعزازی رینک دی گئی تھی لیکن بدھ کو منعقدہ ایک تقریب میں انہیں باقاعدہ طور پر یہ عہدہ دیا گیا۔ 

یہ بھی پڑھئے: حلال مصنوعات کے منافع سے دہشت گردی کی مالی معاونت کا آدتیہ ناتھ کا دعویٰ

نیرج اس سے پہلے ہندوستانی فوج میں صوبیدار میجر تھے۔ نیرج سے پہلے ہندوستانی کرکٹر مہندر سنگھ دھونی کو بھی۲۰۱۱ء میں علاقائی فوج میں لیفٹیننٹ کرنل کا اعزازی عہدہ دیا گیا تھا۔ اس سال مئی میں وزارت دفاع کے فوجی امور کے محکمے نے ایک نوٹیفکیشن جاری کیا تھا جس میں نیرج کے لیفٹیننٹ کرنل بننے کی اطلاع دی گئی تھی۔ نوٹیفکیشن میں کہا گیا تھا کہ ’’علاقائی فوج کے ضوابط۱۹۴۸ء کے پیراگراف۳۱؍کے تحت حاصل اختیارات کو استعمال کرتے ہوئے، صدر جمہوریہ، ہریانہ کے پانی پت کے کھندرا گاؤں و ڈاکخانہ سے تعلق رکھنے والے، پی وی ایس ایم، پدم شری، وی ایس ایم، سابق صوبیدار میجر نیرج چوپڑہ کو۱۶؍ اپریل ۲۰۲۵ءسے علاقائی فوج میں لیفٹیننٹ کرنل کا اعزازی عہدہ عطا کرتی ہیں۔ ‘‘
بتا دیں کہ نیرج چوپڑہ کیلئے موجودہ سیزن اچھا نہیں رہا۔ وہ ڈائمنڈ لیگ کا خطاب نہیں جیت پائے اور ورلڈ ایتھلیٹکس چیمپئن شپ میں بھی سونے کے تمغے کا دفاع نہیں کر سکے۔ نیرج نے ورلڈ چیمپئن شپ میں ۸۴ء۰۳؍میٹر کی بہترین تھرو کی تھی مگر آخری مرحلے کیلئے کوالیفائی نہیں کر پائے تھے۔