نیدرلینڈز کے شہر دی ہیگ کے ساحلی علاقے شیوننگن میں ہزاروں جوتے رکھ کر غزہ کی یاد گار تقریب منائی گئی، جس کا مقصد غزہ میںاسرائیلی حملوں میں جان گنوانے والے فلسطینی بچوں کو خراجِ عقیدت پیش کرنا تھا۔

نیدرلینڈز کے شہر دی ہیگ کے ساحلی علاقے شیوننگن (Scheveningen) ساحل پر ہزاروں جوتے رکھ کر ایک علامتی عوامی یادگاری تقریب منعقد کی گئی، جس کا مقصد غزہ میںاسرائیلی حملوں میںجان گنوانے والے فلسطینی بچوں کو خراجِ عقیدت پیش کرنا تھا۔ ساحل پر قطار در قطار رکھے گئے بچوں کے جوتے ان معصوم جانوں کی یاد اور جنگ کے انسانی المیے کی علامت تھے۔ اس موقع پر شرکاء نے خاموشی اختیار کی، پھول نچھاور کیے اور عالمی برادری سے مطالبہ کیا کہ بچوں کے تحفظ کو یقینی بنانے اور غزہ میں خونریزی روکنے کے لیے مؤثر اقدامات کئے جائیں۔بعد ازاں اس علامتی احتجاج کا مقصد دنیا کی توجہ جنگ کے نتیجے میں بچوں پر پڑنے والے تباہ کن اثرات کی جانب مبذول کرانا تھا۔

یہ بھی پڑھئے: ’’غزہ امن معاہدے پر تمام فریقوں کو یکساں طور پر کاربند رہنا ہوگا ‘‘

یاد رہے کہ غزہ میں اکتوبر۲۰۲۳ء سے اسرائیل نے جارحیت برپا کررکھی ہے، اس وحشیانہ بمباری کے نتیجے میں غزہ کی تمام رہائشی عمارتوں کو نشانہ بنایا گیا، اور پوری آبادی کو بے گھر کردیا گیا۔ اس کے علاوہ بلا تفریق بمباری کے سبب ۷۴؍ ہزار سے زائد فلسطینی شہید ہوچکے ہیں، جن میں بڑی تعداد خواتین اور بچوں کی ہے۔ اسرائیلی جارحیت کے دوران بچوں کی بڑی تعداد کی ہلاکتوں اور انسانی بحران نے عالمی سطح پر شدید تشویش پیدا کی ہے۔

یہ بھی پڑھئے: امریکہ کی آئی سی سی کے خلاف مہم نیتن یاہو کو بچانے کیلئے ہے: ٹرمپ

تاہم اقوامِ متحدہ، انسانی حقوق کی تنظیموں اور امدادی اداروں نے بارہا خبردار کیا ہے کہ غزہ کے لاکھوں بچے بمباری، نقل مکانی، بھوک، بیماری اور طبی سہولیات کی شدید قلت کا سامنا کر رہے ہیں۔ اسی تناظر میں دنیا کے مختلف ممالک میں عوامی مظاہرے، خاموش ریلیاں اور علامتی یادگاری تقریبات منعقد کی جا رہی ہیں، جن کا مقصد جنگ میں جان سے جانے والے بچوں کو خراجِ عقیدت پیش کرنا، شہریوں کے تحفظ کا مطالبہ کرنا اور عالمی برادری پر فوری جنگ بندی اور انسانی امداد کی فراہمی کیلئے دباؤ بڑھانا ہے۔