سوشل میڈیا پر وائرل ویڈیو میں دیکھا جاسکتا ہے کہ مرد اور عورت کو ہل سے باندھ دیا گیا ہے، وہ اسے کھیت میں گھسیٹ رہے ہیں جبکہ دو آدمی انہیں بے رحمی سے لاٹھیوں سے پیٹ رہے ہیں۔

ادیشہ کے رائے گڑھ ضلع میں وحشت اور تذلیل کا ایک چونکا دینے والا واقعہ سامنے آیا ہے جہاں ایک نوجوان جوڑے کو نام نہاد مقامی سماجی اصولوں کے خلاف شادی کرنے کیلئے غیر انسانی سزا دی گئی۔ اس ”جرم“ کی پاداش میں گاؤں والوں نے نوجوان جوڑے کو بیلوں کی طرح ہل سے باندھ دیا اور سزا کے طور پر انہیں کھیت جوتنے پر مجبور کیا۔

ضلع رائے گڑھ کے کنجا ماجھیرا گاؤں میں پیش آئے اس واقعہ کو تماشائیوں نے کیمرے میں قید کرلیا اور یہ ویڈیو سوشل میڈیا پر وائرل ہوگیا ہے، جس کے بعد ملک بھر میں شدید غم و غصہ پایا جا رہا ہے۔ پولیس کے مطابق، یہ جوڑا، جس نے حال ہی میں محبت میں گرفتار ہونے کے بعد شادی کرلی، کو اس لئے نشانہ بنایا گیا کیونکہ گاؤں کے کچھ افراد کو ان کے رشتے پر اعتراض تھا۔ لڑکا، لڑکی کی پھوپھی کا بیٹا ہے اور مقامی رسم و رواج کے تحت ایسی شادی کو ممنوع سمجھا جاتا ہے۔

یہ بھی پڑھئے: ہنگولی ضلع کی ۱۴؍ ہزار سے زائد خواتین میں کینسر کی علامات!

سوشل میڈیا پر وائرل ویڈیو میں دیکھا جاسکتا ہے کہ جوڑے کو ہل سے باندھ دیا گیا ہے، وہ اسے کھیت میں گھسیٹ رہے ہیں جبکہ دو آدمی انہیں بے رحمی سے لاٹھیوں سے پیٹ رہے ہیں۔ عوامی تذلیل کے بعد، جوڑے کو مبینہ طور پر گاؤں کے ایک مزار پر لے جایا گیا اور انہیں اپنے ”گناہ“ کا کفارہ ادا کرنے کیلئے نام نہاد ”پاکیزگی کی رسومات“ ادا کرنے پر مجبور کیا گیا۔

رائے گڑھ کے سپرنٹنڈنٹ آف پولیس ایس سواتی کمار نے جمعہ کو تصدیق کی کہ پولیس کی ایک ٹیم نے گاؤں کا دورہ کیا ہے اور اس معاملے میں ایک ایف آئی آر درج کر لی گئی ہے۔