اوپن اے آئی نے اعلان کیا ہے کہ وہ چیٹ جی پی ٹی میں مفت صارفین اور سستے ’’گو‘‘ Go پلان پر اشتہارات دکھانے کا تجربہ شروع کرے گا تاکہ آمدنی بڑھائی جا سکے۔ کمپنی کا کہنا ہے کہ اشتہارات چیٹ کے جوابات کو متاثر نہیں کریں گے اور پرائیویسی برقرار رکھی جائے گی، جبکہ پریمیم صارفین اشتہارات سے آزاد رہیں گے۔

اوپن اے آئی نے اعلان کیا ہے کہ وہ چیٹ جی پی ٹی پر اشتہارات دکھانے کا تجربہ جلد شروع کر رہا ہے، خاص طور پر مفت صارفین اور نئے متعارف شدہ ’’چیٹ جی پی ٹی گو‘‘ سبسکرپشن صارفین کیلئے۔ یہ اقدام کمپنی کی وسیع مالی حکمت عملی کا حصہ ہے جس کا مقصد فن آوری کے تیز رفتار اخراجات اور نئے فیچرز کے لیے آمدنی پیدا کرنا ہے۔ اوپن اے آئی نے طویل عرصے تک صرف سبسکرپشن فیس پر انحصار کیا ہے، لیکن اب اسے اشتہارات کے ذریعے فیری صارف بیس سے بھی ریونیو حاصل کرنے کا منصوبہ ہے۔ اشتہارات اے آئی چیٹ جوابات کے نیچے الگ اور واضح طور پر لیبل کیے جائیں گے، تاکہ صارفین کو پتہ رہے کہ کون سا مواد چیٹ بوٹ کی جواب کا حصہ ہے اور کون سا اشتہار ہے۔ کمپنی نے واضع کیا ہے کہ یہ اشتہارات چیٹ بوٹ کے جوابات یا مشوروں کو متاثر نہیں کریں گے، جوابات ہمیشہ سب سے مددگار اور درست رہیں گے۔

یہ بھی پڑھئے: عالمی اے آئی اخراجات ۲۰۲۶ء میں۵ء۲؍ ٹریلین ڈالر تک پہنچنے کا امکان ہے

اوپن اے آئی نے صارفین کی پرائیویسی پر بھی زور دیا ہے۔ کمپنی نے کہا ہے کہ اشتہارات کے لیے صارفین کی بات چیت یا ذاتی ڈیٹا براہِ راست اشتہار دہندگان کو نہیں دیا جائے گا، اور صارفین اشتہاری ذاتی نوعیت کو بند بھی کر سکتے ہیں یا استعمال شدہ ڈیٹا کو حذف بھی کر سکتے ہیں۔ یہ اشتہارات موجودہ طور پر امریکہ میں لاگ ان بالغ صارفین کے لیے تجرباتی طور پر شروع کیے جائیں گے، لیکن مستقبل میں اسے عالمی سطح پر پھیلانے کا ارادہ ہے۔ مفت کیٹیگری کے ساتھ ساتھ چیٹ جی پی ٹی Go پلان پر بھی اشتہارات دکھائے جائیں گے، جو ایک کم قیمت سبسکرپشن پلان ہے، جبکہ پریمیم سبسکرپشنز جیسے پلس، پرو، بزنس اور انٹرپرائز پر اشتہار نہیں دکھائے جائیں گے۔

یہ بھی پڑھئے: عالمی دباؤ کے بعدگروک نے نازیبا تصویر بنانے والا فیچر بند کردیا

اوپن اے آئی کے مطابق اس حکمت عملی کا مقصد اے آئی تک مفت یا سستی رسائی کو برقرار رکھتے ہوئے کمپنی کے لیے پائیدار مالیاتی ماڈل تیار کرنا ہے، تاکہ وہ خدمات کی بڑھتی ہوئی لاگت، ڈیٹا سنٹرز اور تحقیق و ترقی پر آنے والے اخراجات کو پورا کر سکے۔ تاہم ٹیکنالوجی ماہرین اور صارفین میں کچھ تشویشیں بھی پیدا ہوئی ہیں کہ اشتہارات کا تعارف صارف کے تجربے یا اعتماد پر کیا اثر ڈالے گا، خاص طور پر چونکہ بہت سے صارفین چیٹ بوٹ کو ذاتی، حساس یا تعلیمی مقاصد کے لیے استعمال کرتے ہیں۔ اوپن اے آئی نے اس بات پر بھی زور دیا ہے کہ اشتہارات حساس موضوعات جیسے صحت، ذہنی تندرستی اور سیاست کے قریب نہیں دکھائے جائیں گے۔ اوپن اے آئی کا یہ اقدام مفت اے آئی تجربے میں اشتہارات کا تعارف ایک اہم موڑ ہے، جو مستقبل میں اے آئی سروسیز کے کاروباری ماڈلز کو تبدیل کر سکتا ہے۔