کانگریس نے آپریشن سیندور کے حوالے سے پارلیمنٹ میں وزیر دفاع راجناتھ سنگھ کی غلط بیانی کو ملک کے شہیدوں کی توہین قرار دیا اور انہیں عہدے سے ہٹانے اور ان کے خلاف تحریک استحقاق کی خلاف ورزی کا مطالبہ کیا۔ پارٹی نے کہا کہ وزیر دفاع نے پارلیمنٹ میں جھوٹا بیان دیا کہ آپریشن سیندور کے دوران کوئی فوجی شہید نہیں ہوا۔ کانگریس پارٹی کے دفتر میں ایک پریس کانفرنس سے خطاب کرتے ہوئے پارٹی کےسابق فوجیوں کے ڈپارٹمنٹ کے چیئرمین کرنل روہت چودھری اور ونگ کمانڈر (ریٹائرڈ) انوما اچاریہ نے کہا کہ وزیر دفاع راج ناتھ سنگھ نے پاکستان اور ہندوستان کے درمیان جنگ بندی کے۷۸؍دن بعد ۲۸؍جولائی ۲۰۲۵ء کو پارلیمنٹ میں جھوٹ بول کر شہیدوں کی توہین کی۔ انہوں نے مطالبہ کیا کہ وزیر دفاع کے خلاف استحقاق کی خلاف ورزی کی تحریک چلائی جائے تاکہ آئندہ کسی وزیر کو پارلیمنٹ کو گمراہ کرنے سے روکا جاسکے۔ ان کا کہنا تھا کہ اگر راجناتھ سنگھ استعفیٰ نہیں دیتے ہیں تو انہیں فوری طور پر عہدے سے ہٹا دیا جائے۔ 

 

 

انہوں نے زور دے کر کہا کہ بی جے پی میں صرف جھوٹ بولا جاتا ہے۔ انہوں نے مطالبہ کیا کہ وزیر اعظم نریندر مودی، وزیر دفاع اور بی جے پی قیادت شہداء کے اہل خانہ، ہندوستانی مسلح افواج اور قوم سے معافی مانگیں۔ انہوں نے سوال کیا کہ شہداء کے نام جاری کرنے میں ۱۳؍ماہ کیوں لگے اور انہیں اتنے عرصے تک گمنام کیوں رکھا گیا، جب آپریشن سندور مئی ۲۰۲۵ء میں  ختم ہوا۔ انہوں نے کہا کہ اس سے قومی سلامتی پر سمجھوتہ ہوتا ہے۔ انہوں نے اسے فوج کے حوصلے پست کرنے کے مترادف بھی قرار دیا۔