فلسطین اسرائیل تنازع کا چوتھا دن۔ اسرائیل کی جانب سے غزہ کے مکمل محاصرے پر اقوام متحدہ کے حقوق انسانی کمیشن نے اسے بین الاقوامی قانون کی خلاف ورزی قرار دیا۔ ۸۰۰؍ فلسطین جاں بحق جن میں ۱۴۳؍ بچے اور ۱۰۵؍ خواتین ہیں۔ اسرائیلی میڈیا کا دعویٰ ہے کہ حماس کی بمباری میں ایک ہزار اسرائیلی مارے گئے ہیں جبکہ ۲۶۰۰؍ بری طرح زخمی ہیں۔

اسرائیلی فوج نے کہا ہے کہ حماس کے حملے کے بعد اس نے جنوبی حصے پر بڑے پیمانے پرکنٹرول حاصل کر لیا ہے جبکہ اس کے فوجی اور انٹیلی جنس آلات مکمل طور پر فعال ہیںچوکس کر دیا گیا اور متعدد دہائیوں بعد سڑکوں پر لڑائیاں ہورہی ہیں۔ حماس کا کہنا ہے کہ اس نے ۱۳۰؍ سے زائد اسرائیلیوں کو یرغمال بنالیا ہے۔ نئی دراندازی کو روکنے کیلئے غزہ کی سرحد پر اسرائیلی ٹینک اور ڈرون تعینات ہیں۔غزہ کے قریب ایک درجن سے زیادہ قصبوں سے ہزاروں اسرائیلیوں کو نکالا گیا، اور فضائیہ کے ۳؍ لاکھ فوجی الرٹ ہیں۔ کم وقت میں اسرائیل نے اپنی بڑی فوج کھڑی کردی ہے۔ 

مکمل محاصرہ اور شہریوں کو ضروری اشیاء سے محروم کرنا بین الاقوامی قانون کے تحت ممنوع ہے: اقوام متحدہ
اقوام متحدہ کے انسانی حقوق کے سربراہ نے کہا ہے کہ اسرائیل کا غزہ کی پٹی کا مکمل محاصرہ اور شہریوں کو ضروری اشیاء سے محروم کرنا بین الاقوامی قانون کے تحت ممنوع ہے۔انسانی حقوق کیلئےاقوام متحدہ کے ہائی کمشنر وولکر ترک نے کہا کہ لوگوں کے وقار اور جانوں کا احترام کیا جانا چاہئے کیونکہ انہوں نے دونوں فریقین سے ’’پرتشدد صورتحال‘‘ کو ختم کرنے کا مطالبہ کیا۔ترک نے ایک بیان میں کہا، ’’بین الاقوامی انسانی قانون واضح ہے: شہری آبادی اور شہری چیزوں کو بچانے کیلئےمستقل خیال رکھنے کی ذمہ داری حملوں کے دوران لاگو رہتی ہے۔اس محاصرے نے غزہ میں پہلے ہی سے سنگین انسانی حقوق اور انسانی صورتحال کو مزید پیچیدہ کر دیا ہے، بشمول طبی سہولیات، خاص طور پر زخمیوں کی بڑھتی ہوئی تعداد۔‘‘ انہوں نے مزید کہا کہ ’’ محاصرے کا نفاذ  بین الاقوامی انسانی قانون کے تحت ممنوع ہے۔ یہ شہریوں کی زندگیوں کو خطرے میں ڈال کر ان کی بقا کیلئے ضروری سامان سے محروم کر دیتا ہے۔‘‘بیان میں مزید کہا گیا ہے کہ محاصرے کو نافذ کرنے کیلئے لوگوں اور سامان کی نقل و حرکت پر کسی بھی پابندی کو فوجی ضرورت کے تحت جائز قرار دیا جانا چاہئے بصورت دیگر اجتماعی سزا ہو سکتی ہے۔

۹۰۰؍ فلسطینی اور ۱۲۳؍ اسرائیلی جاں بحق
ٹائمز آف اسرائیل کی ویب سائٹ کے مطابق اس تنازع میں اب تک ۱۲۳؍ اسرائیلی فوجی ہلاک ہوئے ہیں جبکہ اسرائیلی حملے میں ۹۰۰؍ فلسطینی جاں بحق ہوئے ہیں جبکہ زخمیوں کی تعداد ۲؍ہزار ۶۱۶؍ ہوچکی ہے۔

یہ بھی پڑھئے: غزہ کی مکمل ناکہ بندی۔ کھانا،پانی، بجلی اورایندھن کی سپلائی بند

اسرائیل کا سرحد پر دوبارہ کنٹرول
چیف ملٹری ترجمان نے کہا کہ اسرائیل نے غزہ کی سرحدی باڑ پر دوبارہ کنٹرول حاصل کر لیا ہے اور ان حصوں میں بارودی سرنگیں بچھائی جارہی ہیں۔ اسرائیل کے آرمی ریڈیو سے بتایا گیا ہے کہ پیر کے بعد سے غزہ سے کوئی نئی دراندازی نہیں ہوئی ہے۔

میڈرڈ، اسپین میں طلبہ اسرائیلی جارحیت کے خلاف احتجاج کرتے ہوئے۔ تصویر: پی ٹی آئی

غزہ میں بے گھر ہونے والوں کی تعداد ایک لاکھ ۸۷؍ ہزار سے تجاوز کر گئی: اقوام متحدہ
اقوام متحدہ کے دفتر برائے رابطہ برائے انسانی امور کی ایک رپورٹ کے مطابق، اسرائیل کے جوابی فضائی حملے جاری رہنے کے بعد تنازع کے آغاز سے لے کر اب تک غزہ میں ایک لاکھ۸۷؍ ہزار سے زائد افراد بے گھر ہو چکے ہیں۔ رپورٹ میں کہا گیا ہے کہ فضائی حملوں میں ۲ء۳؍ ملین نفوس پر مشتمل آبادی والے علاقے میں ۷۹۰؍ مکانات مکمل طور پر ختم ہوچکے ہیں،۵؍ہزار ۳۳۰؍ مکانات کو شدید نقصان پہنچا ہے۔او سی ایچ اے نے کہا کہ غزہ میں پانی، صفائی اور حفظان صحت کی سہولیات کو پہنچنے والے نقصان سے ۴؍ لاکھ سے زائد افراد متاثر ہیں۔