پیرس (فرانس) کے ۵۸؍ سالہ ایری ہودارا نے ایک چیریٹی ریفل میں صرف ۱۰۰؍ یورو کا ٹکٹ خرید کر معروف مصور پابلو پکساو کی ایک ملین یورو کی پینٹنگ جیت لی۔ حیرت زدہ فاتح نے کہا کہ ’’مجھے کیسے معلوم ہو کہ یہ سچ ہے؟‘‘ یہ لاٹری الزائمر ریسرچ کے لیے فنڈز جمع کرنے کے لیے منعقد کی گئی تھی۔

فرانس کے دارالحکومت پیرس میں قسمت نے ایک حیران کن موڑ اس وقت لیا، جب ۵۸؍ سالہ ایری ہودارا کے لیے ایک عام سا چیریٹی ٹکٹ غیر معمولی خوش قسمتی میں بدل گیا۔ ہودارا، جو خود کو پابلو پکاسو کا شوقیہ مداح کہتے ہیں، نے ہفتے کے آخر میں محض ۱۰۰؍ یورو میں ایک ریفل ٹکٹ خریدا، بغیر اس توقع کے کہ وہ کسی بڑی کامیابی کے قریب بھی ہوں گے۔ لیکن جب نتائج سامنے آئے، تو وہ ایک ملین یورو مالیت کی قیمتی پینٹنگ کے فاتح قرار پائے۔ اس غیر متوقع خبر پر ان کا پہلا ردعمل حیرت سے بھرا ہوا تھا۔ انہوں نے کہا کہ ’’میں کیسے چیک کروں کہ یہ دھوکہ نہیں ہے؟‘‘

یہ بھی پڑھئے: امریکی وزیر دفاع کے خلاف مواخذہ کی تحریک ، ہیگ سیتھ کی مشکل میں اضافہ

یہ ریفل، جس کا عنوان ’’ایک پکاسو برائے ۱۰۰‘‘ تھا، دراصل الزائمر کی تحقیق کے لیے فنڈز جمع کرنے کی ایک مہم کا حصہ تھا۔ اس اقدام کے تحت تقریباً ۱۲۰۰۰۰؍ ٹکٹ فروخت کیے گئے، جن سے مجموعی طور پر ۱۲؍ ملین یورو جمع ہوئے۔ اس رقم میں سے ایک ملین یورو اس آرٹ گیلری کو دیا جانا ہے جو پینٹنگ کی مالک تھی، جبکہ باقی رقم تحقیق کے لیے مختص کی گئی۔ جیتنے والی پینٹنگ Tête de Femme ہے، جو پکاسو کے منفرد انداز میں تخلیق کی گئی ایک gouache آن پیپر پورٹریٹ ہے۔ اس میں ان کی ساتھی اور میوز Dora Maar کو دکھایا گیا ہے، جو خود بھی ایک معروف حقیقت پسند فنکار تھیں۔ منتظمین سے بات کرتے ہوئے ہودارا نے اپنی خوشی کا اظہار کرتے ہوئے کہا کہ ’’میں بس حیران رہ گیا۔ جب آپ اس طرح کا ٹکٹ لیتے ہیں تو آپ کو جیتنے کی امید نہیں ہوتی… لیکن میں بہت خوش ہوں، کیونکہ مجھے آرٹ میں واقعی دلچسپی ہے۔‘‘
اس چیریٹی اقدام کے پیچھے مقصد نہ صرف آرٹ کو فروغ دینا تھا بلکہ ایک بڑے طبی مسئلے، الزائمر، کے خلاف عالمی سطح پر شعور اور وسائل پیدا کرنا بھی تھا۔ اس مہم کے منتظم اولیور دی لیڈوسیٹ نے کہا کہ ’’تحقیق کے لیے فنڈنگ مضحکہ خیز حد تک کم ہے۔ ہمارے ترقی یافتہ معاشروں میں ہم اب تک یہ نہیں سمجھ پائے کہ یہ صحت عامہ کا ایک بڑا مسئلہ ہے۔‘‘ انہوں نے مزید کہا کہ ’’پکاسو کا یہ اقدام ایک اور قدم ہے تاکہ ایک دن الزائمر صرف ایک بری یادداشت بن کر رہ جائے۔‘‘

یہ بھی پڑھئے: عمران خان کی بگڑتی صحت کی وجہ ناقص طبی سہولیات: پی ٹی آئی

یہ پہلا موقع نہیں جب اس منفرد لاٹری نے کسی عام فرد کی زندگی بدل دی ہو۔ ۲۰۱۳ء میں امریکی ریاست پینسلوانیا کے ایک شخص نے پکاسو کی ایک اور پینٹنگ جیتی تھی۔ اسی طرح ۲۰۲۰ء میں اٹلی کی ایک خاتون نے بھی اسی نوعیت کی لاٹری میں کامیابی حاصل کی، جب اس کے بیٹے نے اسے کرسمس تحفے کے طور پر ٹکٹ دیا تھا۔ یہ واقعہ ایک بار پھر اس حقیقت کو اجاگر کرتا ہے کہ کبھی کبھار قسمت ایک سادہ فیصلے، جیسے ۱۰۰؍ یورو کا ٹکٹ خریدنا، کو زندگی بدل دینے والے لمحے میں تبدیل کر دیتی ہے۔