ہندوستان میں ہنگامی حالات سے نمٹنے کیلئے ایک جدید سیل براڈکاسٹ الرٹ سسٹم متعارف کرا یا گیا ہے، جس کے تحت ملک بھر میں ٹیسٹ پیغامات بھیجے گئے۔ یہ نظام آفات کے دوران فوری اور مؤثر اطلاع رسانی کو یقینی بنانے کیلئے تیار کیا گیا ہے۔

اگر آج آپ کے فون پر کسی ہنگامی نوعیت کا سرکاری الرٹ آیا تو آپ اکیلے نہیں تھے اور گھبرانے کی کوئی ضرورت نہیں تھی۔ سنیچرکو ملک بھر میں لاکھوں موبائل صارفین کو ایک ٹیسٹ پیغام موصول ہوا، کیونکہ حکومتِ ہند نے باضابطہ طور پر اپنا مقامی (انڈیجینس) سیل براڈکاسٹ ایمرجنسی الرٹ سسٹم لانچ کیا ہے۔ اس پیغام پر ’’انتہائی شدید الرٹ‘‘ (Extremely Severe Alert) درج تھا اور اس میں شہریوں کو آگاہ کیا گیا کہ ہندوستان نے فوری آفات سے خبردار کرنے کی ایک نئی سروس شروع کی ہے جو مقامی ٹیکنالوجی پر مبنی ہے، اور واضح کیا گیا کہ عوام کو اس پر کوئی عمل کرنے کی ضرورت نہیں ہے۔ 

یہ بھی پڑھئے: کمرشیل سلنڈر مہنگا ہونے پر اپوزیشن نے مودی حکومت کو گھیرا

حکومتی بیان کے مطابق، اس سسٹم کا افتتاح۲؍ مئی۲۰۲۶ء کو مرکزی وزیر داخلہ امیت شاہ اور مرکزی وزیر مواصلات جیوتی رادتیہ سندھیا نے کیا۔ اس منصوبے کے مرکز میں ایک پلیٹ فارم’’ساچیت‘‘ (SACHET) ہے، جس کا مطلب ہے’’انٹیگریٹڈ الرٹ سسٹم۔ ‘‘ ساچیت کو سینٹر فار ڈیولپمنٹ آف ٹیلی میٹکس (C-DOT) نے تیار کیا، جو محکمہ ٹیلی کمیو نی کیشن کا ایک اہم تحقیقی ادارہ ہے، اور یہ انٹرنیشنل ٹیلی کمیو نی کیشن یونین کی سفارش کردہ ’’کامن الرٹنگ پروٹوکول‘‘ پر مبنی ہے۔ یہ نظام اس وقت ہندوستان کی تمام۳۶؍ ریاستوں اور مرکز کے زیر انتظام علاقوں میں فعال ہے۔ 

یہ بھی پڑھئے: اسٹرانگ روم کی حفاظت کیلئے ممتا خود پہنچیں!

اب تک، ڈیزاسٹر مینجمنٹ حکام اس نظام کے ذریعے۱۹؍ سے زائد ہندوستانی زبانوں میں ۱۳۴؍ ارب سے زیادہ ایس ایم ایس الرٹس بھیج چکے ہیں، خاص طور پر قدرتی آفات، موسمی انتباہات اور سمندری طوفانوں کے دوران۔ نئی سیل براڈکاسٹ ٹیکنالوجی روایتی ایس ایم ایس الرٹس کے مقابلے میں ایک بڑی پیش رفت ہے۔ عام ایس ایم ایس کے برعکس، سیل براڈکاسٹ الرٹس فوری توجہ حاصل کرنے کیلئے ڈیزائن کیے گئے ہیں۔ جب یہ فعال ہوتے ہیں تو یہ فون کی عام سیٹنگز کو نظرانداز کرتے ہوئے تیز الارم کی آواز اور نمایاں اسکرین پیغام کے ساتھ ظاہر ہوتے ہیں، تاکہ وہ صارفین تک بھی پہنچ سکیں جن کے فون سائلنٹ یا ڈو ناٹ ڈسٹرب موڈ پر ہوں۔ 
یہ نظام قدرتی آفات جیسے زلزلے، سونامی، اور آسمانی بجلی کے خطرات کے ساتھ انسانی ساختہ حادثات جیسے گیس لیک اور کیمیائی خطرات کے دوران اہم معلومات فراہم کرنے کیلئے بنایا گیا ہے۔ جب یہ نظام مکمل طور پر فعال ہو جائے گا، تو سیل براڈکاسٹ کے ذریعے الرٹس تمام موبائل فونز تک پہنچیں گے، چاہے ان کی ذاتی سیٹنگز کچھ بھی ہوں، اس طرح ہنگامی حالات میں عوام تک وسیع اور مؤثر رسائی یقینی بنائی جا سکے گی۔