وزیر اعظم نریندر مودی نے آج اپنے ایکس پوسٹ کے ذریعے میچانگ طوفان سے ہلاک ہونے والوں کے اہل خانہ سے ہمدردی کا اظہار کیا اور یقین دہانی کروائی کہ حکام طوفان سے متاثرہ افراد کی ہر ممکن مدد کرنے کی کوشش کررہے ہیں۔

وزیر اعظم نریندر مودی نے کہا کہ ان کے خیالات ان لوگوں کے ساتھ ہیں جنہوں نے طوفان میچانگ میں اپنے پیاروں کو کھویا ہے اور نشاندہی کی کہ حکام طوفان سے متاثرہ افراد کی ہر ممکن مدد کرنے کی پوری کوشش کر رہے ہیں۔ واضح رہے کہ طوفان میچانگ منگل کو ۱۲؍بجکر ۳۰؍ منٹ سے ۲؍بجکر ۳۰؍ منٹ کے درمیان آندھرا پردیش کے ساحل سے ٹکرایا تھا جس کے سبب تلنگانہ اور تمل ناڈو کے بھی کئی علاقے زیر آب ہو گئے تھے اور عام زندگی متاثر ہوئی تھی۔

یہ بھی پڑھئے: تمل ناڈو، آندھرااور تلنگانہ میں میچانگ سے تباہی،۱۲؍ افراد ہلاک

آندھرا پردیش میں ۵۰؍ سے زائد پروازیں اور ۱۰۰؍ ٹرینیں منسوخ کی گئی تھیں۔ طوفان نے جھارکنڈر، مدھیہ پردیش اور شمالی ہند کے بھی کچھ حصوں کو متاثر کیا تھا۔

My thoughts are with the families of those who have lost their loved ones due to Cyclone Michaung, especially in Tamil Nadu, Andhra Pradesh and Puducherry. My prayers are with those injured or affected in the wake of this cyclone. Authorities have been working tirelessly on the…

— Narendra Modi (@narendramodi) December 6, 2023

تاہم مرکزی وزیر داخلہ امیت شاہ نے تمل ناڈو کے وزیر اعلیٰ ایم کے اسٹالن سے بات کر کے حالات کا جائزہ لیا تھا اور مرکز کی جانب سے ہر ممکن مدد کی یقین دہانی کروائی تھی۔ مودی نے اپنے ایکس پوسٹ میں لکھا ہے کہ میرے خیالات ان کے ساتھ ہیں جنہوں نے طوفان میچانگ کے سبب اپنے پیاروں کو کھویا ہے۔ خاص طور پر تمل ناڈو، آندھرا پردیش اور پدوچیری میں۔ طوفان کے سبب زخمی ہونے والوں کی جلد صحت یابی کیلئے میں دعا گو ہوں۔ حکام طوفان سے متاثرہ افراد کی ہر ممکن مدد کرنے کی پوری کوشش کر رہے ہیں اور وہ راحت رسانی کا کام تب تک جاری رکھیں گے جب تک حالات معمول پر نہیں آ جاتے۔ خیال رہے کہ چنئی میں بارش سے متعلقہ حادثات میں اب تک ۱۲؍ افراد کی موت ہوچکی ہے۔