وزیر اعظم نریندر مودی نے ہندوستان اور برطانیہ کو فطری شراکت دار قرار دیتے ہوئے کہا ہے کہ عالمی عدم استحکام کے  دور میں دونوں ممالک کے درمیان مضبوط شراکت داری عالمی استحکام اور اقتصادی ترقی کیلئے ایک اہم بنیاد ہے۔ہندوستان کے دورہ پر آئے  برطانوی وزیر اعظم کیئر اسٹارمر کے ساتھ  جمعرات کو یہاں راج بھون میں تفصیلی  بات چیت کے بعد ایک مشترکہ پریس بیان میں مودی نے کہا کہ اسٹارمر کی قیادت میں ہند-برطانیہ تعلقات نے نمایاں ترقی کی ہے اور اسے مزید بہتر بنایا جائے گا۔ 

  وزیر اعظم نریندرمودی نے کہا کہ دونوں ممالک  نے معدنیات کے شعبے میں تعاون کو بڑھانے کے لئے اہم فیصلے کئے ہیں۔ انہوں نے کہاکہ ہم نے اہم معدنیات پر تعاون کے لئے ایک انڈسٹری گلڈ اور سپلائی چین آبزرویٹری قائم کرنے کا فیصلہ کیا ہے۔ اس کا سیٹلائٹ کیمپس آئی ایس ایم، دھنباد میں ہوگا۔

انہوں نے کہا کہ دونوں ممالک نے فوجی تربیت کے شعبے میں تعاون کے معاہدے پر بھی دستخط کئے ہیں۔ اس کے تحت ہندوستانی فضائیہ کے فلائنگ انسٹرکٹر برطانوی فضائیہ میں بطور ٹرینر خدمات انجام دیں گے۔

 

 

وزیراعظم نے کہا کہ دونوں ممالک کے درمیان شراکت داری اعتماد، ٹیلنٹ اور ٹیکنالوجی پر مبنی ہے۔ ان کا کہناتھا کہ ہمارے تعلقات کی بنیاد جمہوریت، آزادی اور قانون کی حکمرانی جیسی اقدار پر مشترکہ یقین پر ہے۔

نریندر مودی نے یہ بھی کہاکہ عالمی عدم استحکام کے موجودہ دور میں، ہندوستان اور برطانیہ کے درمیان یہ بڑھتی ہوئی شراکت داری عالمی استحکام اور اقتصادی ترقی کے لئے ایک اہم بنیاد بن رہی ہے۔

انہوں نے کہا کہ آج کی بات چیت کے دوران دونوں ممالک نے ہند بحرالکاہل اور مغربی ایشیا میں امن و استحکام اور یوکرین میں جاری تنازع پر بھی تبادلہ خیال کیا۔ ان کا کہنا تھا کہ یوکرین تنازع اور غزہ کے معاملے پر، ہندوستان بات چیت اور سفارت کاری کے ذریعے امن کی بحالی کی تمام کوششوں کی حمایت کرتا ہے۔

انہوں نے کہا کہ دونوں ممالک انڈو پیسیفک خطے میں سمندری سلامتی اور تعاون کو بڑھانے کے لئے پوری طرح پرعزم ہیں۔ وزیر اعظم اسٹارمر کے ساتھ آنے والے اب تک کے سب سے بڑے اور متاثر کن تعلیمی وفد کا حوالہ دیتے ہوئےمودی نے کہا کہ یہ بڑی خوشی کی بات ہے کہ ۹؍ برطانوی یونیورسٹیاں  اب ہندوستان میں کیمپس کھولنے جا رہی ہیں۔

دریںاثناءہندوستان اور برطانیہ نے مشترکہ اقتصادی اور تجارتی کمیٹی (جے ای ٹی سی او) کے کردار کو بہتر بناتے ہوئے اس کے مقاصد، دائرہ کار اور ڈھانچے کو حل کرتے ہوئے یہاں حوالہ کی شرائط پر دستخط کئے۔ 

وزیر تجارت پیوش گوئل نے برطانیہ کے وزیر اعظم کیئر اسٹارمر کے دورہ ہندوستان میں برطانیہ کے سیکریٹری برائے تجارت پیٹر کائل کے ساتھ اس معاہدے پر دستخط کئے۔ گوئل نے دستخط کی تقریب کی ایک تصویر کے ساتھ سوشل میڈیا پر پوسٹ کیاکہ ہندوستان-برطانیہ اقتصادی شراکت داری ایک نئے مرحلے میں داخل ہو رہی ہے۔ مجھے مشترکہ اقتصادی اور تجارتی کمیٹی (جے ای ٹی سی او) کے  شرائط پر دستخط کرنے کا اعلان کرتے ہوئے خوشی ہو رہی ہے۔

گوئل نے کہا،’’یہ ادارہ جاتی تنظیم نو ایک انقلابی تبدیلی ہے۔‘‘