محکمہ انکم ٹیکس کا۴۵۰؍کروڑ کی غیر اعلانیہ آمدنی کا الزام ، اعلیٰ افسران کو مکتوب بھیج کراگلے مرحلہ کی کارروائی شروع کردی۔

 جیل میں بند سابق ریاستی وزیر محمد اعظم خان کی پریشانی کم ہوتی نظر نہیں آرہی ہے ، رام پور میں واقع جوہر ٹرسٹ سے وابستہ مالی معاملات میںبدعنوانی  کا الزام عائد کرنے کے بعد محکمہ انکم ٹیکس نے اگلے مرحلہ کی کارروائی شروع کردی ہے۔  جوہر ٹرسٹ کا رجسٹریشن رد ہونے کے بعد اب اعظم خان اور ٹرسٹ سے وابستہ افراد سے محکمہ انکم ٹیکس نےساڑھے چار سو کروڑ کی غیر اعلانیہ آمدنی پر جرمانہ اور سود کی شکل میں ۵؍ سو کروڑ روپے سے زیادہ کی وصولی کی تیاری شروع کردی ہے۔ اس سلسلہ میں محکمہ نے اعلیٰ افسران سے اجازت لینے کیلئے  ہیڈکوارٹرز کو مکتوب روانہ کردیا ہے ہے ۔ جوہر ٹرسٹ جس کے زیر انتظام چلنے والی جوہر یونیورسٹی میں مبینہ مالی بدعنوانیوںکی جانچ محکمہ انکم ٹیکس کے ذریعہ کرائی گئی تھی۔ جانچ میں مالی بدعنوانی کےعلاوہ فرضی لوگوں کو ٹرسٹی بنا کر کروڑوں روپے کا چندہ جمع کرنے کادعویٰ کیاگیا ہے۔

یہ بھی پڑھئے:بحرعرب میں پاکستانی جہاز ہندوستانی جہازسے ٹکرایا،وزارت خارجہ کا سخت ردعمل

محکمہ انکم ٹیکس کا دعویٰ ہے کہ ٹرسٹ کے ممبران  ٹرسٹ کی آمدنی کا کوئی ذریعہ نہیں بتاپائے جس کے نتیجے میں تقریباً ساڑھے چار سو کروڑ روپے کی غیر اعلانیہ رقم پر ۳۰؍ فیصد جرمانہ اور سود وصول کرنے کی تیاری کی جارہی ہے ۔  اس کے علاوہ ان سرکاری محکموں سے بھی رقم وصول کرنےکی تیاری کی جارہی ہے جنھوںنے اعظم خان کے کہنے پر جوہر یونیورسٹی کی تعمیر میں سرکاری رقم خرچ کی تھی۔ای ڈی بھی جوہر ٹرسٹ سے وابستہ لوگوں سے  پوچھ گچھ کر رہی ہے ۔کئی افراد کو دہلی میں ای ڈی کے دفتر میں طلب کیاگیاہے۔ تفتیش مکمل ہونے پر ای ڈی جوہر ٹرسٹ کی ان عمارتوں کو ضبط کرسکتی ہے جن کی تعمیر میں مبینہ طور پر سرکاری محکموں کی رقم صرف کی گئی ہے ۔ ای ڈی کی ٹیم اعظم خان اور انکے گھروالوں سمیت انکے قریبی لوگوں کی املاک کی بھی جانچ کر رہی ہےتاکہ ان کو بھی ضبط کیا جا سکے۔