مشہور کمپنی کرم ویر الیکٹرانکس لمیٹڈ نے چھتیس گڑھ کی راجدھانی رائے پور میں ۳۰۰؍ کروڑ روپے کی سرمایہ کاری کرکے جدید ترین ٹرانسفارمر مینوفیکچرنگ یونٹ قائم کرنے کی تجویز بھیجی۔

ملک کی مشہور کمپنی کرم ویر الیکٹرانکس لمیٹڈ نے پیر کو ریاستی حکومت کو چھتیس گڑھ کی راجدھانی رائے پور میں ۳۰۰؍ کروڑ روپے کی سرمایہ کاری کرکے جدید ترین ٹرانسفارمر مینوفیکچرنگ یونٹ قائم کرنے کی تجویز  بھیجی ہے۔
 کمپنی کے منیجنگ ڈائریکٹر وویک جین نے نئی دہلی میں چھتیس گڑھ سدن میں وزیر اعلیٰ وشنو دیو سائی سے ملاقات کرکے یہ تجویز پیش کی۔ انہوں نے کہا کہ اس یونٹ میں۳۰۰؍ کروڑ روپے سے زیادہ کی سرمایہ کاری کی جائے گی جس سے چھتیس گڑھ ملک کے سب سے بڑے ٹرانسفارمر مینوفیکچرنگ مراکز میں سے ایک بن جائے گا۔ ملاقات میں مجوزہ منصوبے کے خاکہ، سرمایہ کاری کے امکانات اور روزگار کے مواقع پر تفصیلی تبادلہ خیال کیا گیا۔

یہ بھی پڑھئے:کسانوں کو صرف پیداوار تک محدود نہیں رہنا چاہئے، انہیں کاروباری بھی بننا چاہئے: دھنکر

وویک جین نے کہا کہ یہ یونٹ ملک میں ٹیکنالوجی کے لحاظ سے سب سے جدید ٹرانسفارمر مینوفیکچرنگ یونٹ ہوگی جو توانائی کے شعبے کی مستقبل کی ضروریات کو پورا کرنے میں سنگ میل ثابت ہوگی۔
سرمایہ کاری کی تجویز کا خیرمقدم کرتے ہوئے وزیر اعلی نے کہا، ’’ہمارا مقصد یہ ہے کہ چھتیس گڑھ  ترقی یافتہ ہندوستان۲۰۴۷ء کی تشکیل میں  مضبوط ستون بنے۔ یہ سرمایہ کاری صرف ایک صنعتی اکائی نہیں ہے بلکہ چھتیس گڑھ کی تکنیکی صلاحیت اور خود انحصاری کی طرف مضبوط قدم ہے۔ ریاستی حکومت اس پروجیکٹ کو ہر ممکن تعاون فراہم کرے گی۔‘‘ یہ پروجیکٹ ریاست میں پاور سیکٹر کی جدید کاری، مقامی نوجوانوں کے لئے روزگار اور صنعت پر مبنی ترقی کا باعث بنے گا۔ اس موقع پر وزیر اعلیٰ کے چیف سیکریٹری سبودھ سنگھ اور دہلی میں چھتیس گڑھ کے سرمایہ کاری کمشنر ریتو سین بھی موجود تھے۔