ریزرو بینک آف انڈیا کے گورنر سنجے ملہوترا نے کہا ہے کہ جس طرح پہلے خام تیل کو دنیا کی اقتصادی سرگرمیوں کا بیرومیٹر سمجھا جاتا تھا، اب سونا بھی اسی طرح کا کردار ادا کر رہا ہے۔

سونا اب عالمی معیشت میں صرف ایک قیمتی دھات نہیں ہے، بلکہ عالمی غیر یقینی صورتحال کا ایک نیا بیرومیٹر بن رہا ہے۔ ریزرو بینک آف انڈیا (آر بی آئی) کے گورنر سنجے ملہوترا نے نئی دہلی میں منعقدہ ایک تقریب کے دوران یہ اہم بیان دیا۔ انہوں نے کہا کہ جس طرح کبھی خام تیل عالمی اقتصادی سرگرمیوں کی عکاسی کرتا تھا، اب سونا بھی اسی طرح کا کردار ادا کر رہا ہے۔
تصویر کیوں بدلی؟
آر بی آئی کے گورنر نے کوٹیلیا اکنامک کنکلیو ۲۰۲۵ءمیں کہاکہ شاید سونے کی قیمتیں اب خام تیل کی طرح کی حرکت کررہی ہیں۔ یہ عالمی غیر یقینی صورتحال کا ایک بیرومیٹر بن گیا ہے۔ انہوں نے وضاحت کی کہ ماضی میں جب جنگ یا بحران کی وجہ سے جغرافیائی سیاسی تناؤ پیدا ہوتا تھا تو تیل کی قیمتیں آسمان کو چھوتی تھیں  لیکن آج حالات بدل چکے ہیں۔  اس کے پیچھے وجہ یہ ہے کہ جی ڈی پی میں تیل کی شدت اب دنیا بھر میں کم ہو گئی ہے۔ انہوں نے کہا کہ یہ صورتحال نہ صرف ہندوستان بلکہ پوری دنیا میں دیکھی جا رہی ہے۔

یہ بھی پڑھیئے:چین نے۱۰۰؍ فیصد اضافی ٹیرف کو امریکہ کا دوغلا پن قرار دیا

عالمی معیشت کا نیا چیلنج
آر بی آئی کے گورنر ملہوترا نے کہا کہ دنیا بھر میں مالی حالات کشیدہ ہیں اور موجودہ تجارتی پالیسی کا ماحول بہت سی معیشتوں کی ترقی کو نقصان پہنچا سکتا ہے۔ حال ہی میں اعلان کردہ مانیٹری پالیسی میں آر بی آئی نے پالیسی سود کی شرح، یا ریپو ریٹ کو۵ء۵؍فیصد پر برقرار رکھا۔ انہوں نے یہ بھی کہا کہ عالمی معیشت توقع سے زیادہ مضبوط نظر آرہی ہے لیکن مستقبل غیر واضح ہے۔
 اسٹاک مارکیٹ کے تعلق سے گورنر نے کیا کہا؟
اسٹاک مارکیٹ کی صورت حال کا حوالہ دیتے ہوئے  آر بی آئی گورنر نے کہا کہ ’’ایکویٹی مارکیٹ تھوڑی مطمئن دکھائی دیتی ہے۔‘‘  انہوں نے مزید کہا کہ  مستقبل میں مارکیٹ میں اصلاح نظر آ سکتی ہے۔ سونے کی قیمتوں میں گزشتہ چند دنوں سے نمایاں ہلچل دیکھنے کو مل رہی ہے۔ جمعہ کو سپاٹ گولڈ کی قیمت ۳۸۶۷؍ ڈالر فی اونس تک پہنچ گئی، جو اس کے مسلسل ساتویں ہفتے اضافے کے ساتھ ہے۔