ودربھ میں شدید گرمی پڑتی ہے جس کی وجہ سے یہاںہرسال اسکول ۳۰؍جو ن سے شروع ہوتے ہیں، لیکن، اس سال اسکول ایجوکیشن ڈپارٹمنٹ نے ودربھ سمیت ریاست کے تمام پرائمری، سیکنڈری اور ہائر سیکنڈری اسٹیٹ بورڈ اسکولوں کو ۱۵؍جون سے شروع کرنے کا فیصلہ کیا ہے۔ یعنی اس سال ریاست بھر میں اسکول کے شروع ہونے کا  شیڈول یکساں ہو گا ۔اس کی وجہ سے ودربھ کے طلبہ کو دقتوں کا سامنا کرنا پڑ سکتا ہے۔ 

 

 

واضح رہے کہ اس سال اسکولوں میں ۲؍ مئی ۲۰۲۶ءسے گرمیوں کی تعطیلات کا اعلان کیا گیا ہے ۔ہر سال جون کے مہینے میں شدید گرمی کو دیکھتے ہوئے ودربھ کے ریاستی بورڈ کے اسکول ۳۰؍جون سے شروع ہوتے تھے ،لیکن اس سال محکمہ تعلیم نے اس استثنیٰ کو ختم کر دیااور ریاست بھر میں یکساں شیڈول نافذ کر دیا ۔محکمہ اسکولی تعلیم نے ۱۵؍جون ہی سے ودربھ سمیت تمام ڈیویژنوں میں اسکول شروع کرنے کا فیصلہ کیا ہے ۔ اس لئےتعلیمی سا ل ۲۷۔۲۰۲۶ء کا آغاز ۱۵؍ جون سے ہوگا۔ احکامات جاری کئے گئے ہیں کہ ریاست کے تمام ڈیویژنوں کے اسکولوں میں ۱۵؍جون سے باقاعدہ تدریس شروع کر دی جائے ۔ البتہ جون میں بڑھتے ہوئے درجہ حرارت کو دیکھتے ہوئے اتنی چھوٹ ضرور دی گئی ہے کہ ودربھ میں۲۷؍؍ جون تک اسکول صرف صبح ۷؍بجے سے ۱۱؍بجکر ۴۵؍منٹ تک جاری رہیں گے ۔  اسکے بعد یہ  اسکول معمول کے اوقات کے مطابق شروع ہو جائیں گے۔

 

 

یہ معلومات ڈائریکٹوریٹ آف ایجوکیشن (ثانوی اور اعلیٰ ثانوی)، پونے اور ڈائریکٹوریٹ آف پرائمری ایجوکیشن کی طرف سے ۲۸؍مارچ کو جاری کردہ ایک سرکیولر میں دی گئی ہے ۔۲؍مئی سے گرمیوں کی تعطیلات ریاست کے تمام ریاستی بورڈ کے اسکولوں میں طلبہ کیلئے موسم گرما کی تعطیلات باضابطہ طور پر شروع ہوں گی۔ دریں اثنا، اگر مقامی حالات یا تعلیمی سرگرمیوں کی وجہ سے دوسرے بورڈز کے کچھ اسکولوں میں اسکول کھلتے ہیں تو متعلقہ اسکول انتظامیہ طلبہ کے مفادات کو مدنظر رکھتے ہوئے تعطیلات کا اعلان کرنے کا فیصلہ کرے، سرکیولر میں یہ بھی کہا گیا ہے۔