میرا بھائندر شہر میں پانی کی شدید قلت اور کارپوریشن انتظامیہ کی مبینہ لاپروائی کے خلاف منگل کو شیو سینا شندے کی جانب سے میونسپل کارپوریشن کے صدر دفتر پر ایک مظاہرہ (ٹمریل آندولن) کیا گیا۔ اس احتجاج میں خاص طور پر خواتین کی ایک بہت بڑی تعداد نے شرکت کی جو اپنے ہاتھوں میں پانی کے برتن اور پلے کارڈز لئے کارپوریشن انتظامیہ کے خلاف نعرے بازی کر رہی تھیں۔شیو سینا مہیلا اگھاڑی کی ضلع آرگنائزر نارویکر کی قیادت میں نکالے گئے اس احتجاجی مارچ میں مظاہرین نے کارپوریشن کمشنر سے فوری جواب طلبی کا مطالبہ کیا۔مظاہرین کی قیادت کرنے والے شیوسینا لیڈر وکرم پرتاپ سنگھ نے کارپوریشن انتظامیہ کو آڑے ہاتھوں لیتے ہوئے کہا کہ میرا بھائندر کی موجودہ آبادی کے لحاظ سے ۲۱۶ ؍سے ۲۲۰ ؍یم ایل ڈی پانی کا کوٹہ منظور کیا گیا ہے۔ اس کے باوجود شہر کو روزانہ تقریباً ۸۰؍ سے ۱۰۰ ؍ایم ایل ڈی پانی کم سپلائی کیا جا رہا ہے۔ انہوں نے الزام لگایا کہ:’’کارپوریشن کی جانب سے سرکاری طور پر صرف ۲۴ ؍گھنٹے پانی کی کٹوتی کا اعلان کیا جاتا ہے لیکن عملی طور پر شہریوں کو ۳۸ ؍ سے ۴۰ ؍گھنٹے تک پانی سے محروم رہنا پڑتا ہے جس کی وجہ سے عوام کا جینا محال ہو چکا ہے۔‘‘

 

 

شیو سینا لیڈر نے کارپوریشن کی کارکردگی پر سوال اٹھاتے ہوئے یاد دلایا کہ ۳؍ سال قبل  وزیر پرتاپ سرنائیک نے سوریا ڈیم پروجیکٹ سے اندرونی واٹر لائنیں بچھانے اور واٹر ٹینکوں کی تعمیر کے لئے ۵۰۰؍ کروڑ روپے کا فنڈ منظور کروایا تھا۔ کام تیزی سے جاری تھالیکن ایک نجی کمپنی کی مبینہ ہٹ دھرمی اور لاپروائی کی وجہ سے ٹینک کا کام ادھورا پڑا ہوا ہے۔ اس نامکمل پروجیکٹ کا خمیازہ آج میرا بھائندر کے شہریوں کو بھگتنا پڑ رہا ہے۔کارپوریشن ہیڈ کوارٹر پر احتجاجی مظاہرے کے دوران شیو سینا کے عہدیداران نے دوٹوک الفاظ میں کہا کہ:’’پانی شہریوں کا بنیادی حق ہے، یہ کارپوریشن کا کوئی احسان نہیں ہے۔ ہم بلدیاتی حکام سے یہ پوچھنے آئے ہیں کہ نجی کمپنی کے خلاف کارروائی کیوں نہیں کی جا رہی؟ ٹینک کی تعمیر میں کون سی کمپنیاں رکاوٹ بن رہی ہیں ؟‘‘