جنگلاتی حیات ہفتہ کے دوران جنگلات اور جنگلی حیات کے تحفظ کیلئے بیداری مہم چلائی جا رہی ہے۔ اسی دوران تانسا وائلڈ لائف رینج کے جنگل میں ساگوان کے درختوں کی مبینہ غیر قانونی کٹائی اور لکڑی کی نقل و حمل کا معاملہ سامنے آیا ہے۔

 جنگلاتی حیات ہفتہ کے دوران جنگلات اور جنگلی حیات کے تحفظ کیلئے بیداری مہم چلائی جا رہی ہے۔ اسی دوران تانسا وائلڈ لائف رینج کے جنگل میں ساگوان کے درختوں کی مبینہ غیر قانونی کٹائی اور لکڑی کی نقل و حمل کا معاملہ سامنے آیا ہے۔ بتایا گیا ہے کہ دن کے وقت ۷؍سے ۸؍ افراد ساگوان کی لکڑی سڑک کے دوسری جانب لے جاتے ہوئے نظر آئے۔ واقعے کے بعد علاقے میں جنگلات کی حفاظت کے انتظامات پر سوالات اٹھ رہے ہیں۔

عینی شاہدین کے مطابق ساگوان کے درخت کا تقریباً ۶؍ سے ۷؍ فٹ لمبا ایک بڑا ٹکڑا ۳؍ افراد اٹھا کر سڑک پار لے جا رہے تھے جبکہ کچھ دیگر افراد بھی موقع پر موجود تھے۔اس دوران ۲؍ افراد سڑک پر نگرانی کرتے ہوئے دکھائی دئیے۔ سڑک کے کنارے دن کے وقت لکڑی لے جانے کا یہ واقعہ سامنے آنے کے بعد مقامی شہریوں اور ماحولیات کے شائقین نے معاملے کی باقاعدہ جانچ کا مطالبہ کیا ہے۔

یہ بھی پڑھئے: بھیونڈی: ٹریفک پولیس خود سڑک کی مرمت کرنے پر مجبور!

تانسا جنگلاتی حیات کا علاقہ حیاتیاتی تنوع کے اعتبار سے اہم سمجھا جاتا ہے۔ ساگوان سمیت مختلف اقسام کے درخت جنگلاتی ماحول اور جنگلی جانوروں کے قدرتی مسکن کا اہم حصہ ہیں۔ ایسے میں درختوں کی مبینہ غیر قانونی کٹائی کی شکایت سامنے آنے پر یہ جاننا ضروری ہے کہ درخت کہاں اور کس اجازت کے تحت کاٹے گئے، لکڑی کہاں لے جائی جا رہی تھی اور اس معاملے میں کوئی قانونی خلاف ورزی ہوئی ہے یا نہیں۔ 

مقامی شہریوں نے محکمۂ جنگلات سے موقع کا معائنہ کر کے کٹے ہوئے درختوں کی تعداد، نوعیت اور مقام کی جانچ کرنے کے ساتھ لکڑی کی نقل و حمل کی بھی تحقیقات کا مطالبہ کیا ہے۔ ان کا کہنا ہے کہ اگر جنگل کے علاقے میں غیر قانونی سرگرمی ثابت ہوتی ہے تو ذمہ دار افراد کے خلاف جنگلات کے قانون کے تحت کارروائی کی جانی چاہیے۔

محکمۂ جنگلات کا مؤقف 

تانسا وائلڈ لائف  کے رینج فاریسٹ آفیسر گنیش پرہار نے کہا کہ درختوں کی غیر قانونی کٹائی یا جنگلاتی علاقے سے لکڑی باہر لے جانے کی اطلاع ملنے پر موقع کا معائنہ کرکے معاملے کی جانچ کی جائے گی۔ انہوں نے کہا کہ ساگوان سمیت کسی بھی درخت کی غیر قانونی کٹائی یا جنگل سے لکڑی باہر لے جانا سنگین جرم ہے۔ تحقیقات میں اگر کوئی شخص قصوروار پایا گیا تو اس کے خلاف فاریسٹ ایکٹ کے مطابق کارروائی کی جائے گی۔ انہوں نے شہریوں سے بھی جنگلات میں ایسی سرگرمی نظر آنے پر فوری طور پر محکمۂ جنگلات کو اطلاع دینے کی اپیل کی۔