گجرات سے مزدوروں کی بڑے پیمانے پر ہو رہی نقل مکانی نے تشویش پیدا کر دی ہے، جس پر مہاراشٹر این سی پی (شرد) کی ریاستی خواتین صدر روہنی کھڑسے نے خبردار کیا ہے کہ اگر مہاراشٹر حکومت نے بروقت اقدامات نہ کئے تو ممبئی اور پونے جیسے بڑے شہروں میں بھی ایسی ہی صورتحال پیدا ہو سکتی ہے۔روہنی کھڑسے نے کہا کہ خوراک اور روزگار کے مواقع ختم ہونے کے باعث لاکھوں مزدور گجرات چھوڑ کر اپنے آبائی علاقوں کی طرف واپس جا رہے ہیں۔ انہوں نے کہا کہ اگر مہاراشٹر کی ’سوئی ہوئی حکومت‘ نے فوری طور پر اس مسئلے پر توجہ نہ دی تو ریاست کے بڑے شہری مراکز میں بھی یہی حالات دیکھنے کو مل سکتے ہیں۔

 

 

انہوں نے بتایا کہ یہ بحران خلیجی ممالک میں جاری تنازعات اور آبنائے ہرمز کی ناکہ بندی کے باعث پیدا ہونے والی گیس کی قلت سے جڑا ہوا ہے، جس کے نتیجے میں گجرات کی ٹیکسٹائل صنعت تقریباً ٹھپ ہو چکی ہے۔ اس صنعت سے وابستہ مزدور اب نہ روزگار حاصل کر پا رہے ہیں اور نہ ہی بنیادی ضروریات پوری کر پا رہے ہیں، جس کے باعث وہ نقل مکانی پر مجبور ہو گئے ہیں۔کھڑسے نے سوشل میڈیا پر اپنی تشویش کا اظہار کرتے ہوئے سورت ریلوے اسٹیشن سے بڑی تعداد میں مزدوروں کے روانہ ہونے کی تصاویر کو دل دہلا دینے والا قرار دیا۔ انہوں نے کہا کہ گیس بحران نے مزدوروں سے ان کا روزگار اور بنیادی سہولیات چھین لی ہیں۔ 

 

 

انہوں نے مزید کہا کہ حالیہ دنوں میں ممبئی اور پونے میں بھی ایسے اشارے دیکھنے کو ملے ہیں، جہاں ہوٹل اور کھانے پینے کے مراکز بند ہو رہے ہیں اور تعلیم و روزگار کے لیے شہروں کا رخ کرنے والے طلبہ اور مزدور مشکلات کا سامنا کر رہے ہیں۔ روہنی کھڑسے نے خبردار کیا کہ اگر حکومت نے فوری اصلاحی اقدامات نہ کیے تو ممبئی اور پونے میں بھی جلد اسی طرح کی سنگین صورتحال پیدا ہو سکتی ہے، اور حکام سے اپیل کی کہ وہ فوری بیدار ہو کر مؤثر قدم اٹھائیں۔