ایم این ایس کے سابق رکن اسمبلی راجو پاٹل نے فلائی اوور کا معائنہ کرکے نشاندہی کی کہ پل کا کام انتہائی ناقص معیار کا ہے۔

گزشتہ ماہ کلیان- شیل پھاٹا روڈ پر ہونے والے ٹریفک جام کے مسئلہ کو حل کرنے کیلئے پلاوا جنکشن پر تعمیر کردہ فلائی اوور بریج کا افتتاح عجلت میں کیا گیا تھا۔ تاہم فلائی اوور کا کام انتہائی ناقص درجہ کا ہونے کی وجہ سے پل پر بڑے بڑے گڑھے پڑ گئے تھے۔ سابق رکن اسمبلی نے پل کا معائنہ کرنے کے لئے وزیر اعلیٰ دیویندر فرنویس کو مکتوب دے کر وی جے ٹی آئی کی معرفت اسٹکچرل آڈٹ کرنے کا مطالبہ کیا تھا۔ اس سنگین مسئلہ کا نوٹس لیتے ہوئے محکمہ تعمیرات نے وی جے ٹی آئی کی معرفت اسٹکچرل آڈٹ کرنے کا حکم جاری کیا ہے۔ 
شیل پھاٹا روڈ پر انتہائی مصروف پلاوا جنکشن پر ۷ ؍سال قبل دیسائی-کٹائی فلائی اوور بریج کا سنگ بنیاد رکھا گیا تھا۔ جولائی کے پہلے ہفتہ میں شیوسینا (شندے) کے مقامی رکن اسمبلی نے محض کریڈٹ لینے کیلئے ادھورے اور نامکمل بریج کا افتتاح کردیا تھالیکن چند گھنٹوں بعد ہی بریج کی سڑک پر بڑے بڑے گڑھے پڑنے سے اسے بند کردیا گیا تھا۔ 

یہ بھی پڑھئے: بامبےہائی کورٹ نےانسانی جانوں کےتحفظ کو اولیت دینےاورکبوتر خانہ سےمتعلق کمیٹی قائم کرنے کی ہدایت دی

ایم این ایس کے سابق رکن اسمبلی راجو پاٹل نے فلائی اوور بریج کا معائنہ کرکے نشان دہی کی کہ پل کا کام انتہائی ناقص معیار کا ہے۔ انہوں نے فوراً وزیر اعلی دیویندر فرنویس کو مکتوب دے کر وی جے ٹی آئی کے معرفت اسٹکچرل آڈٹ کرنے کا مطالبہ کیا تھا۔ ۵؍ اگست کو محکمہ تعمیرات عامہ نے ایک حکم نامہ جاری کیا اور متعلقہ محکمہ کو وی جے ٹی آئی کے ذریعہ آڈٹ کرنے کی ہدایت دی۔ 
واضح رہےکہ اس پل پر محض ایک ماہ میں بڑے بڑے گڑھے نظر آرہے ہیں جو کام کے ناقص معیار کی علامت ہے۔ نئے پل پر بڑے بڑے گڑھے پڑنے پر لوگوں نے حیرت کا اظہار کرتے ہوئے اسے ٹھیکیدار اور متعلقہ افسران کی ساز باز کا نتیجہ بتایا تھا۔