کیرالا سے تاج محل کو بم سے اڑانے کی دھمکی ملی ہے۔ دھمکی کی وجہ سے تاج محل کے مشرقی اور مغربی دروازے پر سیکوریٹی مزید سخت کر دی گئی۔ سیاحوں کو تاج محل میں پین لے جانے پر بھی پابندی لگا دی گئی۔

کیرالا سے تاج محل کو بم سے اڑانے کی دھمکی ملی ہے۔ اس دھمکی کے بعد پورے تاج محل علاقے میں ہائی الرٹ ہے۔ دراصل محکمہ سیاحت کو کیرالا سے ہفتہ کی صبح ایک ای میل آیا جس میں تاج محل کو بم سے اڑانے کی دھمکی دی گئی تھی۔ اس پر سی آئی ایس ایف، تاج محل سیکوریٹی پولیس، بم اسکواڈ، ڈاگ اسکواڈ، ہندوستانی محکمہ آثار قدیمہ کی ٹیم نے قریب تین گھنٹے تک تاج محل کے چپّے چپّے کی تلاشی لی۔ حالانکہ اس دوران کہیں بھی کوئی مشتبہ اشیا نہیں ملی۔ دھمکی کی وجہ سے تاج محل کے مشرقی اور مغربی دروازے پر سیکوریٹی مزید سخت کر دی گئی۔ سیاحوں کو تاج محل میں پین لے جانے پر بھی پابندی لگا دی گئی۔ سی سی ٹی وی سے ہر سیاح کی نگرانی کی گئی۔ جب تین گھنٹے کی تلاشی مہم کے دوران کوئی مشتبہ اشیا نہیں ملی تو سیکوریٹی ایجنسیوں نے راحت کی سانس لی۔ ڈی ایس پی سونم کمار نے بتایا کہ یہ ’ہاکس ای میل‘ تھا جو کیرالا سے آیا تھا۔ اس بارے میں سائبر سیل تھانہ میں معاملہ درج کرایا گیا ہے جس کی جانچ کی جا رہی ہے۔ 

یہ بھی پڑھئے: کانگریس نے نیتی آیوگ کو ناکارہ ادارہ قراردیا

تاج محل کو آر ڈی ایکس سے اڑانے کی دھمکی کا ای میل ملتے ہی سیکوریٹی ایجنسیاں الرٹ ہو گئیں۔ دوپہر ایک بجے سے مکمل چیکنگ شروع ہوئی۔ اسنفر ڈاگ اور بم اسکواڈ کے ساتھ تاج محل احاطے میں تلاشی مہم چلائی گئی۔ سی آئی ایس ایف کمانڈنٹ ویبھو کمار دوبے نے بتایا کہ تاج محل کے تحفظ کے لحاظ سے خاص گنبد، چمیلی فرش، مسجد احاطہ سے لے کر باغیچوں اور دالانوں میں بھی تلاشی کی گئی۔ تاج محل میں تین بجے تک تلاشی مہم چلی جس میں کوئی بھی مشتبہ چیز نہیں ملی۔ دوسری طرف اے سی پی تاج سیکوریٹی عریب احمد نے بتایا کہ ملک کے دیگر حصوں میں بھی اسی طرح کے میل بھیجے گئے ہیں۔ سائبر سیل جانچ کر رہی ہے۔ سیاحوں میں دہشت نہ پھیلے اس لیے تلاشی مہم کو ماک ڈرل بتایا گیا۔ فی الحال تاج محل پوری طرح محفوظ ہے لیکن سیکوریٹی ایجنسیاں پوری طرح سے الرٹ ہیں۔