ایران اور اسرائیل کے درمیان جاری جنگ میں شدت میں اضافہ ہو گیا ہے۔ ایران کی جانب سے میزائل حملوں کی نئی لہروں کے بعد اسرائیل کے بڑے شہروں میں سائرن بج اٹھے اور شہریوں کو بنکروں میں جانے کے احکامات جاری کئے گئے۔ یروشلم، تل ابیب اور دیگر علاقوں میں دھماکوں کی آوازیں سنائی دیں جبکہ اسرائیلی فوج نے تصدیق کی ہے کہ کم وقت میں متعدد میزائل داغے گئے۔

(۱) ایران کا بڑے اسرائیلی شہروں پر حملہ، شہریوں کو بنکروں میں جانے کا حکم
ایران کی جانب سے شدید میزائل حملوں کے بعد اسرائیل کے تقریباً تمام بڑے شہروں میں شہریوں کو فوری طور پر بنکروں میں جانے کے احکامات جاری کئے گئے۔ رپورٹس کے مطابق یروشلم، تل ابیب اور دیگر علاقوں میں سائرن بجنے لگے اور متعدد دھماکوں کی آوازیں سنی گئیں۔ اسرائیلی فوج نے کہا کہ ’’ہم نے کم وقت میں ایران کی جانب سے داغے گئے میزائلوں کی کئی لہروں کا پتہ لگایا ہے۔‘‘ مقامی میڈیا کے مطابق شہری رات بھر پناہ گاہوں میں رہے جبکہ کئی علاقوں میں ہنگامی صورتحال نافذ رہی۔ بیان میں کہا گیا کہ ’’شہریوں سے کہا گیا ہے کہ وہ اگلے احکامات تک محفوظ مقامات پر رہیں۔‘‘ یہ حملے جنگ کے سب سے شدید حملوں میں شمار کئے جا رہے ہیں جنہوں نے پورے ملک کو ہائی الرٹ پر ڈال دیا ہے۔

یہ بھی پڑھئے: دُنیا کے سب سے بڑے ایل این جی پلانٹ پر ایران کا حملہ

(۲) ایران نے سائرن کے ساتھ ہی میزائلوں کی نئی لہر داغ دی
ایران نے اسرائیل کے مختلف علاقوں میں سائرن بجنے کے ساتھ ہی میزائلوں کی نئی لہر داغنے کا دعویٰ کیا ہے۔ اسرائیلی فوج کے مطابق ایک گھنٹے سے بھی کم وقت میں تین مختلف حملوں کی لہریں سامنے آئیں۔ بیان میں کہا گیا کہ ’’ایران کی جانب سے داغے گئے میزائلوں کے باعث کئی علاقوں میں فوری طور پر سائرن فعال ہو گئے۔‘‘ مقامی رپورٹس کے مطابق یروشلم اور مغربی کنارے میں بھی سائرن کی آوازیں سنی گئیں۔ اسرائیلی حکام نے کہا کہ دفاعی نظام کو فعال کر دیا گیا ہے اور شہریوں کو ہدایات پر عمل کرنے کی تاکید کی گئی ہے۔ انہوں نے کہا کہ ’’ہم صورتحال پر مسلسل نظر رکھے ہوئے ہیں اور کسی بھی خطرے سے نمٹنے کیلئے تیار ہیں۔‘‘ یہ حملے اس بات کی نشاندہی کرتے ہیں کہ جنگ میں میزائل حملوں کا سلسلہ مسلسل جاری ہے۔