ایس اینڈپی گلوبل کے مطابق  مینوفیکچرنگ پی ایم آئی فروری کے ہندسے۹ء۵۶؍ سےجست لگاکرمارچ ۲۰۲۴ء میں  ۱ء۵۹؍ پر پہنچ گیا۔

 پیداوارمیں تیزی، مانگ میں مضبوط نمو اور نئی ملازمتوں کے مواقع پیدا ہونے کے سبب  ہندوستان کے پیداوار سیکٹر کی نمو ۱۶؍ سال کی بلند تر سطح پر پہنچ گئی ہے۔ ایس اینڈ پی گلوبل کے ذریعہ ترتیب دئیے جانے والے ’’دی ایچ ایس بی سی فائنل انڈیا مینوفیکچرنگ پرچیسنگ منیجر انڈیکس‘ کے مطابق مارچ میں مینوفیکچرنگ سیکٹر کی نمو  ۱۶؍ سال کی بلند تر سطح پر پہنچ گئی ہے۔ اعدادوشمار کے مطابق پی ایم آئی فروری کے ۵۶ء۹؍ ہندسہ سےجست لگاکر مارچ میں ۵۹ء۱؍  پر پہنچ گیا ہے۔ خیال رہے کہ پی ایم آئی کے تحت ۵۰؍ سے اوپر انڈیکس کا معنی یہ ہےکہ پیداواری سرگرمیاں  بڑھ رہی ہیں۔ جبکہ ۵۰؍ سے نیچے کا ہندسہ گراوٹ کو ظاہر کرتا ہے۔ 

یہ بھی پڑھئے: تہواروں کے موقع پر پلاٹینم کی خریداری بڑھی

 ایچ ایس بی سی کی ماہراقتصادیات اِنسے لیم نے کہا کہ ’’ہندوستان کا مارچ پروڈکشن پی ایم آئی ۲۰۰۸ء کے بعد سے اپنی بلند تر سطح پر پہنچ گیا ہے۔ مصنوعات ساز کمپنیوں اور کارخانوں میں پیداوار میں  مضبوط تیزی آئی ہے اور نئے معاہدوں سے ملازمتیں  بھی بڑھی ہیں۔ مینوفیکچرنگ پروڈکشن مارچ میں  لگاتار۳۳؍ویں  مہینے میں  بڑھا ہے۔ اکتوبر ۲۰۲۰ء کے بعد سے یہ سب سے زیادہ نمو ہے۔ ۲؍اپریل کو جاری کردہ پی ایم آئی اعدادوشمار کے مطابق نئے آرڈرز میں  تیزی سے اضافہ دیکھنے کو ملا ہے۔ مارچ کے دوران مانگ میں  بھی تیزی آئی ہے۔ گھریلو اور ایکسپورٹ دونوں ہی بازاروں  میں نئے آرڈر میں تیزی درج کی گئی ہے۔ افریقہ، ایشیا، یورپ اور امریکہ میں  فروخت بڑھی ہے۔ ایچ ایس بی سی انڈیا پروڈکشن پی ایم آئی کو ایس اینڈ پی گلوبل نے تقریباً ۴۰۰؍ کمپنیوں  کے ایک گروپ کو بھیجئے گئے سوالات کے جوابات کی بنیاد پر تیار کیا ہے۔