مہاراشٹر کی دیویندر فرنویس حکومت نے کھلے تیل کی فروخت کے معاملے میں اہم فیصلہ کرتے ہوئے تاجروں کو ایک سال کی عارضی مہلت دینے کا اعلان کیا ہے۔ اس مدت کے دوران تاجروں کو اپنے کاروبار کو نئے قوانین اور ضابطوں کے مطابق ڈھالنا ہوگا۔

مہاراشٹر کی دیویندر فرنویس حکومت نے کھلے تیل کی فروخت کے معاملے میں اہم فیصلہ کرتے ہوئے تاجروں کو ایک سال کی عارضی مہلت دینے کا اعلان کیا ہے۔ اس مدت کے دوران تاجروں کو اپنے کاروبار کو نئے قوانین اور ضابطوں کے مطابق ڈھالنا ہوگا۔

یہ بھی پڑھئے:لبوشین آسٹریلیا کی ون ڈے ٹیم سے باہر

اس معاملے پر وزیراعلیٰ دیویندر فرنویس نے تاجروں کے ایک نمائندہ وفد کے ساتھ میٹنگ کی۔ اس دوران انہوں نے کہا کہ کھلے تیل کی فروخت سے متعلق قانون ۲۰۱۱ءمیں بنایا گیا تھا اور اس معاملے میں تیل کے معیار کو برقرار رکھنا سب سے اہم ہے۔ مہاراشٹر کے وزیراعلیٰ نے یہ بھی کہا کہ آج بھی بڑی تعداد میں غریب اور کم آمدنی والے لوگ کھلا تیل خریدتے ہیں۔ ایسے میں قانون پر عمل درآمد ضروری ہے، لیکن ساتھ ہی عام شہریوں اور روایتی طریقے سے کاروبار کرنے والے تاجروں کو پیش آنے والی مشکلات کا بھی مناسب حل نکالنا ضروری ہے۔
حکومت نے اس مسئلے کے حل کے لیے فوڈ اینڈ ڈرگ ایڈمنسٹریشن یعنی ایف ڈی اے اور تاجروں کے نمائندوں پر مشتمل ایک مشترکہ کمیٹی تشکیل دینے کا فیصلہ کیا ہے۔ یہ کمیٹی اس بات کا جائزہ لے گی کہ روایتی تاجروں کو قانون پر مکمل عمل کرنے کے لیے اپنے کاروبار میں کس قسم کی تبدیلیاں کرنا ضروری ہوں گی۔ حکومت نے کہا ہے کہ ضرورت پڑنے پر تاجروں کو ان تبدیلیوں کے لیے مدد بھی فراہم کی جائے گی تاکہ وہ اپنے کاروبار کو نئے ضابطوں کے مطابق آسانی سے تبدیل کر سکیں۔

یہ بھی پڑھئے:جارج مائیکل کو ۲۰۲۶ء میں ’’ عظیم میوزک آئیکون‘‘ قرار دے دیا گیا

فی الحال تاجروں کو ایک سال کی مہلت دی گئی ہے۔ وزیراعلیٰ دیویندر فرنویس نے واضح کیا ہے کہ ایک سال مکمل ہونے کے بعد مزید وقت نہیں دیا جائے گا اور تمام تاجروں کو قانون اور متعلقہ ضابطوں پر مکمل طور پر عمل کرنا ہوگا۔ حکومت کی اس مہلت کے دوران تاجروں کو اپنے کاروبار کو نئے قوانین کے مطابق ڈھالنے اور ضروری تبدیلیاں مکمل کرنے کی ہدایت دی گئی ہے۔