گاندھی جینتی کے موقع پر مہاتما گاندھی کے قتل کی منظرکشی اور ان کے قاتل نتھورام گوڈسے کی تعریف پر مبنی ویڈیو سامنے آنے کے بعد سوشل میڈیا پر تنازع کھڑا ہوگیا ہے۔ ’دی جے پور ڈائیلاگ‘ کی جانب سے شیئر کی گئی اس ویڈیو اور گاندھی جی سے متعلق دیگر پوسٹس پر سیاسی و سماجی حلقوں کی جانب سے شدید ردعمل کا اظہار کیا جا رہا ہے۔

گاندھی جینتی کے موقع پر جمعہ کو ہندوتوا پروپیگنڈا پیج ’دی جے پور ڈائیلاگ‘ نے ایک ویڈیو پوسٹ کی جس میں مجاہدِ آزادی مہاتما گاندھی کے قتل کا منظر دکھایا گیا ہے اور اس کا اختتام ان کے قاتل نتھورام ونایک گوڈسے کی تعریف اور جشن پر ہوتا ہے۔ ویڈیو کے آخری حصے میں ایک ویڈیو گیم پر مبنی مشہور وائرل میم (Meme) کا گرافک دکھایا گیا ہے جس پر لکھا ہے، 
‘‘Mission Passed 
Respect + 99‘‘
ایک اور پوسٹ میں گاندھی جی پر ان دعوؤں کو لے کر تنقید کی گئی ہے کہ انہوں نے ہندوستان کو مجبور کیا تھا کہ وہ پاکستان کو ۵۵؍ کروڑ روپے دے۔ اس پوسٹ میں لکھا گیا ہے، ’’ہم انہیں بابائے قوم (فادر آف دی نیشن) کہتے ہیں۔ کتنی شرم کی بات ہے!‘‘ واضح رہے کہ مہاتما گاندھی کو ۳۰؍ جنوری ۱۹۴۸ء کو نتھورام گوڈسے نے قتل کر دیا تھا، جو ایک ہندو قوم پرست تھا اور ماضی میں راشٹریہ سوائم سیوک سنگھ (آرایس ایس) سے وابستہ رہنے کے ساتھ ہندو مہاسبھا کا رکن بھی تھا۔

یہ بھی پڑھئے: مہاراشٹر: خشک سالی سے متاثر کسان اپنے پیاسے جانور بیچنے پر مجبور

اس سے قبل اگست میں، جے پور ڈائیلاگس اور اس کے بانی سنجے دکشت کے خلاف ایک ۱۵؍ سالہ لڑکی کی ذاتی معلومات آن لائن وائرل کرنے کے الزام میں سائبر کرائم کی شکایت درج کرائی گئی تھی۔ یہ لڑکی دہلی کے جنتر منتر پر نییٹ مظاہرے کے دوران وزیراعظم نریندر مودی کے خلاف مبینہ طور پر قابلِ اعتراض زبان استعمال کرنے کے بعد ہندوتوا مہم کا نشانہ بنی تھی۔ جے پور ڈائیلاگس سابق آئی اے ایس افسر سنجے دکشت کا قائم کردہ ایک ہندوتوا نظریات سے منسلک ڈجیٹل پلیٹ فارم ہے، جس پر سوشل میڈیا پوسٹس اور ویڈیوز کے ذریعے بار بار مسلم مخالف اور اسلامو فوبک مواد کو فروغ دینے کے الزامات لگتے رہے ہیں۔