امریکی صدر ڈونالڈ ٹرمپ کے ایک اہم مشیر اسٹیفن ملر نے اتوار کو ہندوستان پر الزام عائد کیا ہے کہ وہ روس سے تیل خرید کر یوکرین کے خلاف جاری جنگ میں اسے مالی معاونت فراہم کر رہا ہے۔

امریکی صدر ڈونالڈ ٹرمپ کے ایک اہم مشیر نے اتوار کو ہندوستان پر الزام عائد کیا ہے کہ وہ روس سے تیل خرید کر یوکرین کے خلاف جاری جنگ میں اسے مالی معاونت فراہم کر رہا ہے۔ ’’رائٹرز‘‘ کے مطابق وہائٹ ہاؤس کے ڈپٹی چیف آف اسٹاف اور ٹرمپ کے بااثر مشیروں میں شامل اسٹیفن ملر نے ایک انٹرویو میں کہا کہ ’’صدر ٹرمپ نے بالکل واضح انداز میں کہا ہے کہ یہ ناقابل قبول ہے کہ ہندوستان روسی تیل خرید کر اس جنگ کو جاری رکھنے میں مدد دے۔ ‘‘اسٹیفن ملر کی یہ تنقید ٹرمپ انتظامیہ کی جانب سے ہندوستان جیسے اہم اتحادی پر اب تک کی سب سے سخت تنقید تصور کی جا رہی ہے۔ 

یہ بھی پڑھئے: ”کئی خوبصورت جنگیں ختم کرائیں“: ٹرمپ کا ایک بار پھر ہندوستان۔پاکستان تنازع کو ختم کرنے کا دعویٰ

فاکس نیوز کے پروگرام سنڈے مارننگ فیوچرز میں گفتگو کرتے ہوئے اسٹیفن ملر نے کہا کہ ’’لوگ یہ جان کر حیران رہ جائیں گے کہ روسی تیل کی خریداری میں ہندوستان عملی طور پر چین کے برابر ہے۔ یہ ایک حیران کن حقیقت ہے۔ ‘‘ذرائع کے مطابق واشنگٹن میں ہندوستانی سفارت خانے نے فوری طور پر اس بیان پر کوئی تبصرہ نہیں کیا، تاہم، ہندوستانی حکومتی ذرائع نے رائٹرز کو بتایا کہ نئی دہلی امریکی دباؤ کے باوجود روسی تیل کی خریداری جاری رکھے گا۔ واضح رہے کہ روس سے توانائی اور عسکری سازوسامان کی خریداری کے باعث امریکہ نے جمعہ سے مصنوعات کی درآمد پر ۲۵؍فیصد درآمدی ٹیکس نافذ کردیا ہے۔ صدر ٹرمپ نے یہ انتباہ بھی دیا ہے کہ اگر روس نے یوکرین کے ساتھ امن معاہدہ نہ کیا تو روسی تیل خریدنے والے ممالک سے امریکی درآمدات پر۱۰۰؍ فیصد تک ٹیکس عائد کیا جاسکتا ہے۔