امریکی صدر ڈونالڈ ٹرمپ اور کنیڈا کے وزیرِاعظم مارک کارنی کے درمیان حالیہ بیانات کے تبادلے کے بعد دونوں ممالک کے تعلقات میں تناؤ دیکھنے میں آ رہا ہے، جہاں ڈیووس میں ٹرمپ کے متنازع ریمارکس پر کارنی کے سخت ردِعمل کے جواب میں امریکہ نے انہیں بورڈ آف پیس میں شمولیت کی دعوت واپس لے لی ہے۔

امریکی صدر ڈونالڈ ٹرمپ نے جمعرات (۲۲؍ جنوری) کو کہا کہ وہ کنیڈا کے وزیرِاعظم مارک کارنی کی اپنی بورڈ آف پیس میں شمولیت کی دعوت واپس لے رہے ہیں۔ یہ فیصلہ اس کے بعد سامنے آیا جب کنیڈا کے وزیرِاعظم نے ڈیووس میں ہونے والے ورلڈ اکنامک فورم میں ٹرمپ کے اشتعال انگیز بیانات پر سخت ردِعمل دیا۔ اس موقع پر امریکی صدر نے کہا تھا کہ’’ کنیڈا امریکہ کی وجہ سے زندہ ہے۔ ‘‘ٹرمپ کے بیان کے جواب میں مارک کارنی نے ان دعوؤں کی تردید کرتے ہوئے کہا کہ کنیڈا اس لئے ترقی کرتا ہے کیونکہ ’’ہم کنیڈین ہیں۔ ‘‘اپنے سوشل میڈیا پلیٹ فارم ٹروتھ سوشل پر ایک پوسٹ میں ٹرمپ نے لکھا:’’محترم وزیرِاعظم کارنی، براہِ کرم اس خط کو اس بات کی اطلاع سمجھا جائے کہ بورڈ آف پیس کنیڈاکی شمولیت کے حوالے سے آپ کو دی گئی دعوت واپس لے رہا ہے، جو اب تک کسی بھی وقت جمع ہونے والا سب سے باوقار لیڈروں کا بورڈ ہوگا۔‘‘

یہ بھی پڑھئے: سعودی عرب: ماہ رجب میں ایک کروڑ ۴۸؍ لاکھ زائرین نے عمرے کی سعادت حاصل کی

منگل کو ڈیووس میں اپنی تقریر کے دوران، کارنی نے موجودہ عالمی صورتحال کو ’منتقلی نہیں بلکہ ایک دراڑ‘ قرار دیا اور کہا کہ ایک مستحکم عالمی نظام کی ’خوشگوار فرضی کہانی‘ کی جگہ اب عظیم طاقتوں کی رقابت اور معاشی دباؤ کی’سخت حقیقت‘ نے لے لی ہے۔ اس دھماکہ خیز تقریر کے بعد ٹرمپ نے کارنی پر جوابی حملہ کرتے ہوئے کہا کہ امریکہ کا شمالی پڑوسی ’ناشکرا‘ ہے، حالانکہ واشنگٹن ڈی سی کی جانب سے اسے کئی ’مفت مراعات‘ ملتی رہی ہیں۔ ٹرمپ نے ورلڈ اکنامک فورم میں ڈیووس، سوئٹزرلینڈ کے مقام پر کہا:’’ کنیڈا امریکہ کی وجہ سے زندہ ہے۔ ‘‘
امریکی صدر نے یہ بھی مؤقف اختیار کیا کہ امریکہ کی جانب سے گرین لینڈ کا حصول کنیڈا کیلئے فائدہ مند ہوگا جس کے بارے میں ان کا کہنا تھا کہ وہ’کئی مفت مراعات حاصل کرتا ہے۔ ‘ انہوں نے اس اسٹریٹجک آرکٹک علاقے کو استعمال کرتے ہوئے گولڈن ڈوم تعمیر کرنے میں دلچسپی ظاہر کی، جو خطے کیلئے میزائل دفاع فراہم کرے گا اور اس سے کنیڈاکو بھی فائدہ ہوگا۔