امریکی صدر ڈونالڈ ٹرمپ نے سنیچر کو کہا کہ وہ ریاست لوزیانا کے گورنر جیف لینڈری کے ساتھ مل کر گرین لینڈ کیلئے ایک اسپتا ل بردار جہاز بھیجنے پر کام کر رہے ہیں۔

امریکی صدر ڈونالڈ ٹرمپ نے سنیچر کو کہا کہ وہ ریاست لوزیانا کے گورنر جیف لینڈری کے ساتھ مل کر گرین لینڈ کیلئے ایک اسپتال بردار جہاز بھیجنے پر کام کر رہے ہیں۔ ’رائٹرز‘ کے مطابق گرین لینڈ ڈنمارک کا ایک علاقہ ہے اور صدر ٹرمپ پہلے ہی کہہ چکے ہیں کہ وہ اسے حاصل کرنا چاہتے ہیں۔ صدر ٹرمپ نے یہ اعلان وہائٹ ہاؤس میں ریپبلکن گورنروں کے اعزاز میں دیئے جانے والے عشائیے سے قبل سماجی رابطے کی ویب سائٹ پر کیا۔ اس موقع پر وہ ریاست لوزیانا کے گورنر جیف لینڈری کے ساتھ بیٹھے گفتگو کر رہے تھے۔ انہوں نے کہا کہ ہم لوزیانا کے شاندار گورنر جیف لینڈری کے ساتھ مل کر ایک بہترین اسپتال بردار جہاز گرین لینڈ بھیج رہے ہیں تاکہ وہاں ان بہت سے بیمار لوگوں کا علاج کیا جا سکے جن کی دیکھ بھال نہیں ہو رہی۔ یہ جہاز راستے میں ہے۔ 

یہ بھی پڑھئے: ٹرمپ خامنہ ای کو قتل کرنے پر غور کر رہے ہیں؟ رپورٹس میں دعویٰ

وہائٹ ہاؤس اور نہ ہی گورنر جیف لینڈری کے دفتر نے اس بیان کے حوالے سے سوالات کا جواب دیا اور اور نہ ہی یہ بتایا کہ کیا یہ جہاز ڈنمارک یا گرین لینڈ کی درخواست پر بھیجا جا رہا ہے اور کن بیمار افراد کو مدد کی ضرورت ہے۔ محکمۂ جنگ کی طرف سے بھی فوری طور پر کوئی بیان سامنے نہیں آیا۔ ڈنمارک کے بادشاہ نے دوسری بار ایک سال میں گرین لینڈ کا دورہ کیا تاکہ جزیرے کے ساتھ اتحاد یا یکجہتی ظاہر کی جا سکے، خاص طور پر اس وقت جب امریکہ کے صدر ٹرمپ نے اسے خریدنے کی خواہش ظاہر کی۔ گرین لینڈ، ڈنمارک اور امریکہ نے گزشتہ ماہ کے آخر میں شمالی بحرِ اوقیانوس کے دفاعی اتحاد کے اندر کئی ماہ سے جاری کشیدگی کے بعد اس معاملے کو حل کرنے کیلئے بات چیت کی۔ صدر ٹرمپ کا پیغام اس کے چند گھنٹوں بعد سامنے آیا جب ڈنمارک کی مشترکہ قطبی کمان نے بتایا کہ گرین لینڈ کے پانیوں میں موجود ایک امریکی زیرِ آب جنگی جہاز سے ایک ایسے عملے کے رکن کو نکالا گیا جسے فوری طبی امداد کی ضرورت تھی۔ 

یہ بھی پڑھئے: اسرائیلی نسل کشی کی مخالف آواز فرانسسکا البانیز نے جھکنے سے انکار کر دیا

یہ مقام گرین لینڈ کے دارالحکومت نوک سے سات سمندری میل کے فاصلے پر تھا۔ یہ واضح نہیں ہو سکا کہ اس معاملے سے گورنر جیف لینڈری کا کیا تعلق تھا یا آیا اس بیان کا انخلا کے واقعے سے کوئی تعلق تھا۔ امریکی بحریہ کے پاس دو ہسپتال بردار جہاز ہیں جن کے نام مرسی اور کمفرٹ ہیں، لیکن ان میں سے کوئی بھی لوزیانا میں تعینات نہیں ہے۔