انگلینڈ میں مئی کے بلدیاتی انتخابات سے قبل ایک ہزار سے زائد کونسلرز نے فلسطینیوں کے حقوق کی حمایت کا باقاعدہ عہد کیا ہے۔ فلسطینی یکجہتی مہم (پی ایس سی) اور ووٹ فلسطین ۲۰۲۶ء اتحاد کی حمایت یافتہ اس اقدام کا مقصد فلسطین کو ایک مرکزی انتخابی مسئلہ بنانا اور مقامی کونسلوں کو اسرائیل کی مبینہ بین الاقوامی قانون خلاف ورزیوں میں ملوث کمپنیوں سے دور رکھنا ہے۔

پی ایس سی کی جانب سے دسمبر میں شروع کی گئی ’’کونسلر عہد برائے فلسطین‘‘ مہم کے تحت منتخب نمائندے اس بات کا وعدہ کرتے ہیں کہ وہ فلسطینیوں کے حقوق کے تحفظ کے لیے کام کریں گے، اپنی کونسلوں کو اسرائیل کی مبینہ بین الاقوامی قانون خلاف ورزیوں میں ملوث نہ ہونے کو یقینی بنائیں گے اور ایسے اداروں یا کمپنیوں سے کونسل پنشن فنڈز کی سرمایہ کاری واپس لینے کی حمایت کریں گے۔ پی ایس سی کے مطابق اب تک ایک ہزار ۲۸؍ کونسلرز اس عہد پر دستخط کر چکے ہیں۔

یہ بھی پڑھئے: میکسیکو: ایل مینچو ہلاک، ملک بھر میں ریڈ الرٹ، ہم آہنگی کی اپیل

اس عہد پر دستخط کرنے والوں میں شامل ہیں، ۳۴۵؍ گرین پارٹی کے کونسلرز، ۳۳۸؍ لیبر پارٹی کے کونسلرز، ۱۰۴؍ لبرل ڈیموکریٹس، ۳؍ کنزرویٹو ارکان، اور درجنوں اسکاٹش نیشنل پارٹی، پلیڈ سائمرو، اسکاٹش گرینز، مقامی جماعتوں اور آزاد امیدوار۔
نمایاں شخصیات میں گرین پارٹی کے ڈپٹی لیڈر متین علی، ٹریفورڈ کی کونسلر ہننا اسپینسر، لیبر کے میتھیو براؤن اور برمنگھم کے آزاد کونسلر ایوب خان شامل ہیں۔ پی ایس سی کے اعداد و شمار کے مطابق ۳۱؍  کونسلیں پہلے ہی قراردادیں منظور کر چکی ہیں یا پنشن فنڈ کی تقسیم کے حق میں بیانات جاری کر چکی ہیں۔ ایک سروے کے مطابق ۴۶؍  فیصد ووٹروں نے اس اقدام کی حمایت کی جبکہ ۱۴؍ فیصد نے مخالفت کی۔

یہ بھی پڑھئے: میکسیکو: ایل مینچو ہلاک، ملک بھر میں ریڈ الرٹ، ہم آہنگی کی اپیل

یہ پیش رفت ایسے وقت میں سامنے آئی ہے جب کیئر اسٹارمر کی قیادت میں لیبر پارٹی کو بعض حلقوں میں تنقید کا سامنا ہے۔ لیڈز ایسٹ کے لیبر ایم پی رچرڈ برجون نے کہا کہ فلسطینی حقوق پر واضح موقف نہ اپنانا پارٹی کے لیے انتخابی نقصان کا سبب بن سکتا ہے۔ دوسری جانب گرین پارٹی کی میئر امیدوار زوے گاربیٹ نے کہا کہ جس طرح ماضی میں کونسلوں نے جنوبی افریقہ میں نسل پرستی کے خلاف موقف اختیار کیا، اب فلسطینیوں کے لیے بھی ویسا ہی اصولی قدم اٹھانا چاہیے۔

یہ بھی پڑھئے: تیونس میں بازار سے کیلے غائب! فی کلو قیمت ۷؍امریکی ڈالر پہنچی!

ووٹ فلسطین ۲۰۲۶ء اتحاد ووٹروں سے اپیل کر رہا ہے کہ وہ صرف انہی امیدواروں کی حمایت کریں جنہوں نے فلسطین عہد پر دستخط کیے ہیں۔ مہم چلانے والوں کا کہنا ہے کہ لاکھوں افراد پر مشتمل فلسطین کے حق میں عوامی مظاہروں نے اس مسئلے کو مقامی سیاست تک پہنچا دیا ہے اور اب اسے بلدیاتی انتخابات کا اہم ایجنڈا بنایا جا رہا ہے۔ کچھ کونسلوں میں، جیسے ہیکنی اور ٹریفورڈ، یہ عہد انتخابی نتائج پر اثر انداز ہو سکتا ہے۔ سیاسی تجزیہ کاروں کے مطابق اگر فلسطین کا مسئلہ بلدیاتی سطح پر نمایاں ہوتا ہے تو یہ نہ صرف پارٹی صف بندیوں کو متاثر کر سکتا ہے بلکہ پنشن فنڈ پالیسیوں اور مقامی سرمایہ کاری کے فیصلوں پر بھی اثر ڈال سکتا ہے۔