یوکرین کی وزیر اعظم نے ایک بیان میں کہا کہ روس سے جنگ کے آغاز سے اب تک یوکرین کو یورپ کی جانب سے ۲۲۳؍ بلین ڈالر کی امداد حاصل ہوئی اور اس امداد نے یوکرین کو جنگ سے متعلق مسائل سے نبرد آزما ہونے میں معاونت کی ہے۔

یوکرین کی وزیراعظم یولیا سویریدینکو نے منگل کو بتایا کہ فروری۲۰۲۲ء میں روس کے ساتھ جنگ شروع ہونے کے بعد سے یوکرین نے یورپی یونین اور اس کی رکن ریاستوں سے۲۲۳؍ بلین ڈالر سے زائد کی امداد حاصل کی ہے۔انہوں نے کہا کہ یورپ کی مالی معاونت نے ان کے ملک کو جنگ  کے نقصانات برداشت کرنے اور اصلاحات کے راستے پر قائم رہنے میں مدد دی۔یولیا سویریدینکو نے کہا کہ بین الاقوامی تعاون اوریورپی یونین کے تیز رفتار قرضے یوکرین کی دفاعی منصوبہ بندی اور جنگی خطرات کے پیش نظر ملک کے استحکام کے لیے انتہائی اہم ہے۔انہوں نے امریکی سوشل میڈیا پلیٹ فارم ایکس پر لکھا،’’ہمیں اب تمام کلسٹرز کے حتمی معیارات مل چکے ہیں اور ہم انہیں EU کے قانون کو اپنانے کے قومی پروگرام میں ضم کر رہے ہیں، جسے ہم قریب مستقبل میں منظور کریں گے۔ ہم تمام مطلوبہ اصلاحات پر عمل درآمد جاری رکھے ہوئے ہیں۔‘‘

یہ بھی پڑھئے: توانائی کے بحران کےبعد انٹر نیٹ بھی خطرہ میں!

بعد ازاں سویریدینکو نے کہا کہ یوکرین کو اپنے یورپی شراکت داروں کے ساتھ تعاون کو گہرا کرنے اور مل کر توانائی کی آزادی کو مضبوط کرنےکی ضرورت ہے۔ان کا کہنا تھاکہ’’ یوکرین ،جنگ کے دوران توانائی کے نظام کو چلانے کے اپنے تجربے کو ساجھا کرنے کے لیے تیار ہے۔ ہم نےآئندہ موسم گرما کی تیاریاں شروع کر دی ہیں اور علاقائی استحکام کے منصوبوں کے تحت ملک کے توانائی کے نظام کی تنظیم نو کر رہے ہیں۔‘‘