اقوام متحدہ کے سربراہ نے بنگلہ دیش کی رباب فاطمہ کو افغانستان کے لیے خصوصی نمائندہ مقرر کیا· وہ تجربہ کار سفارت کار روزا اوتونبایوا کی جگہ افغانستان میں اقوام متحدہ کے مشن کی سربراہ بنیں گی۔

اقوام متحدہ کے سیکرٹری جنرل انتونیو غطریس نے بدھ کو بنگلہ دیش کی رباب فاطمہ کو افغانستان کے لیے اپنا نیا خصوصی نمائندہ اور افغانستان میں اقوام متحدہ کے امدادی مشن (یوناما) کی سربراہ مقرر کیا۔اقوام متحدہ کے ترجمان کے دفتر کے ایک بیان کے مطابق، فاطمہ کرغزستان کی روزا اوتونبایوا کی جانشین ہوں گی۔بیان میں کہا گیا کہ غطریس نے اوتونبایوا کی خدمات کا شکریہ ادا کیا اورکنیڈا کی جارجیٹ گاگنون کا بھی شکریہ، جو یوناما کی نائب خصوصی نمائندہ ہیں اور اس وقت مشن کی نگران افسر کے طور پر خدمات انجام دے رہی ہیں۔

یہ بھی پڑھئے: اسلامیات کے ممتاز امریکی اسکالر پروفیسر جان ایل ایسپوزیٹو کا انتقال

 مزید برآں  فاطمہ اس وقت اقوام متحدہ کی انڈر سیکرٹری جنرل اور کم ترقی یافتہ ممالک، ترقی پذیر ممالک اور چھوٹے جزیرے والی ترقی پذیر ریاستوں کے لیے اعلیٰ نمائندہ ہیں۔بیان میں کہا گیا، ’’محترمہ فاطمہ اپنے اس عہدے پر قومی اور بین الاقوامی سول سروس کا۳۰؍ سال سے زیادہ کا تجربہ رکھتی ہیں، جس میں دوطرفہ اور کثیرالجہتی سفارت کاری، پالیسی سازی، وکالت، پروگرام کی منصوبہ بندی اور نفاذ شامل ہے۔‘‘واضح رہے کہ اپنے موجودہ کردار کو سنبھالنے سے پہلے، فاطمہ۲۰۱۹ء سے۲۰۲۲ء تک نیویارک میں اقوام متحدہ میں بنگلہ دیش کی سفیر رہیں۔ اس دوران، وہ یونیسیف اور اقوام متحدہ خواتین کی ایگزیکٹو بورڈز کی صدر رہیں،۲۰۲۲ء میں امن سازی کمیشن کی چیئر منتخب ہونے والی پہلی خاتون بنیں، اور اقوام متحدہ کی جنرل اسمبلی کے۷۷؍ویں اجلاس کی نائب صدر بھی رہیں۔