اقوام متحدہ انسانی حقوق کونسل میں ہندوستان نے پاکستان کو پروپیگنڈا سے باز رہنے کی نصیحت کی، ساتھ ہی ہندوستانی سفیر محمد حسین نے دوسروں کو اخلاقیات کا درس دینے پر پاکستان کو لتاڑا۔

ہندوستان نے بدھ کو اقوام متحدہ کی انسانی حقوق کونسل میں پاکستان کے انسانی حقوق کے معاملے پر دوہرے معیار کو کھل کر چیلنج کیا۔ جنیوا میں یو این ایچ آر سی کے۶۰؍ویں سیشن کی ۳۴؍ویں میٹنگ میں خطاب کرتے ہوئے، ہندوستانی سفیر  محمد حسین نے براہ راست کہا کہ پاکستان دوسرے ممالک کو انسانی حقوق کا درس کیسے دے سکتا ہے جب کہ اسے خود اقلیتوں کے ساتھ ہونے والے سلوک کے مسائل درپیش ہیں۔ انہوں نے مزید کہا کہ بیرون ملک پروپیگنڈا پھیلانے کے بجائے، پاکستان کو چاہیے کہ وہ اپنے ہاں اقلیتوں کے خلاف ہونے والی بدسلوکی پر توجہ مرکوز کرے.حسین نے یو این ایچ آر سی میں پاکستان کو براہ راست نشانہ بناتے ہوئے، اس پر الزام لگایا کہ وہ بین الاقوامی فورمز کا استعمال نئی دہلی پر بار بار تنقید کرنے کے لیے کر رہا ہے، جب کہ وہ اپنے انسانی حقوق کے مسائل کو نظر انداز کر رہا ہے.دیگر مقررین نے بھی انسانی حقوق کے معاملے میں پاکستان کے ریکارڈ پر روشنی ڈالی۔

یہ بھی پڑھئے: جون سے اگست کے درمیان ’’ ہیٹ کرائم‘‘ پر مبنی۱۴۱؍ واقعات، اترپردیش سرفہرست: رپورٹ

جیو پولیٹیکل محقق جوش بووز نے بلوچستان میں ہونے والی زیادتیوں کی طرف اشارہ کیا، جس سے ہندوستان کے اس دعوے کو تقویت ملتی ہے کہ پاکستان ملک میں کمزور برادریوں کو دباتا ہے جب کہ بیرون ملک اخلاقی موقف اختیار کرتا ہے.انہوں نے۲۰۲۵ء کی انسانی حقوق کی مذہبی آزادی کی رپورٹ کا حوالہ دیا، جس میں بتایا گیا ہے کہ توہین مذہب کے الزامات میں۷۰۰؍ سے زائد افراد قید ہیں، جو گزشتہ سال کے مقابلے میں۳۰۰؍ فیصد اضافہ ہے. بووز نے بلوچ نیشنل موومنٹ کے انسانی حقوق ونگ کے اعداد و شمار بھی شیئر کیے، جن کے مطابق ۲۰۲۵ء کے پہلے چھ ماہ میں۷۸۵؍ جبری گمشدگیاں اور۱۲۱؍ ہلاکتیں درج کی گئیں۔ اس کے علاوہ، پشتون نیشنل جرگہ کے مطابق اس سال تقریباً ۴۰۰۰؍ پشتون اب بھی لاپتہ ہیں.جولائی میں،یو این کے ماہرین نے پاکستان پر زور دیا تھا کہ وہ مذہبی اقلیتوں، بشمول قادیانیوں کے خلاف جاری تشدد کے درمیان غیرقانونی گرفتاریوں، اور عبادت گاہوں اور قبرستانوں پر حملوں کو روکنے کے لیے حقیقی اقدامات کرے. 

یہ بھی پڑھئے: ’’بریلی میں مسلمانوں کو اجتماعی سزا دی جا رہی ہے‘‘

پاکستان اندرون ملک انسانی حقوق کی سنگین خلاف ورزیوں کو نظر انداز کرتے ہوئے بین الاقوامی اعتماد حاصل کرنے کی کوشش کر رہا ہے.اس دوران، یونائیٹڈ کشمیر پیپلز نیشنل پارٹی کے ترجمان ناصر عزیز خان نے پاکستان کے زیر قبضہ جموں و کشمیر میں پاکستان کی بڑھتی ہوئی زیادتی پر کارروائی کرنے کے لیے اقوام متحدہ اور عالم اقوام پر زور دیا۔ جنیوا میں خطاب کرتے ہوئے، خان نے خبردار کیا کہ خطے میں انسانی صورت حال مزید خراب ہو رہی ہے۔ انہوں نے کہا کہ پاکستان نے رینجرز تعینات کیے ہیں اور وسائل پر قبضہ،بنیادی حقوق اور انصاف کا مطالبہ کرنے والی پرامن تحریک کو دبانے کے لیے فون اور انٹرنیٹ سروسز معطل کر دی ہیں۔