ملزم کو بچانے کی کوشش پر عدالت نے سخت برہمی کااظہارکیا، تمام مقدمات چھین کر سی بی آئی کو سونپ دینے کا امکان بھی ظاہر کیا۔
EPAPER
Updated: October 01, 2026, 11:58 AM IST | Agency | New Delhi
ملزم کو بچانے کی کوشش پر عدالت نے سخت برہمی کااظہارکیا، تمام مقدمات چھین کر سی بی آئی کو سونپ دینے کا امکان بھی ظاہر کیا۔
یکے بعد دیگرے عدالتوں کی پھٹکا کی شکار یوپی پولیس پرسپریم کورٹ نے بدھ کو غیر معمولی ۔ کورٹ نے کہا کہ ’’آپ کے ہر کام میں کوئی نہ کوئی ایجنڈا نظر آتا ہے۔ اگر آپ اسی طرح معاملات آگے بڑھائیں گے تو لوگ آپ پر کیسے بھروسہ کریں گے؟ بہتر ہوگا کہ ہم یوپی پولیس سے چھین کر تمام تحقیقات سی بی آئی کو سونپ دیں ۔ ہم اتر پردیش پولیس کو تحلیل بھی کر سکتے ہیں۔ کسی نہ کسی مقام پر یہ فضول حرکتیں بند ہونی چاہئیں۔‘‘ جسٹس سنجے کمار اور جسٹس سنجیو سچدیوا کی بنچ نے یہ سخت تبصرہ اس وقت کیا جب اسے بتایا کہ گیا کہ شکایت کنندہ نے ملزم کو پکڑ کر پولیس کے حوالے کیا مگر پولیس نے ایف آئی آر میں اس کا نام درج کرنے کے بجائے ’’نامعلوم‘‘ لکھا تاکہ اسے بچایا جاسکے۔تفتیش کے طریقہ کار پر ناراضی کا اظہار کرتے ہوئے بنچ نے کہاکہ ’’کسی کے کہنے پر چلنا ایک بات ہے، لیکن حد سے زیادہ جھک جانا دوسری بات۔‘‘
یہ بھی پڑھئے:شیخ محمد کا نئی نسل کے نام خط: مستقبل کی قیادت اورعلم کو ہتھیار بنانے کی تلقین
کورٹ نے مزیدکہا کہ ’’ اور اس طرح معاملے پر پردہ ڈالنے کی کوشش؟ اس پرتو جتنا کم کہا جائے اتنا ہی بہتر ہے۔‘‘تفصیلات کے مطابق ایک موٹر سائیکل سوار نے خاتون کےساتھ چھیڑ خانی اور مارپیٹ کی کوشش کی تھی جس پر خاتون نے اس کو پکڑ کر پولیس کے حوالے کردیالیکن پولیس نے ایف آئی آر میں اس کا نام درج کرنے کے بجائے ’’نامعلوم ‘‘ کے خلاف شکایت درج کی۔شکایت کنندہ نے سپریم کورٹ کو بتایاکہ پولیس کی ایف آئی آر شروع ہی سے جانبداری پر مبنی تھی۔درخواست گزار نے نشاندہی کی کہ جب ہائی کورٹ نے مداخلت کی اور جانچ میں پیش رفت کی رپورٹ طلب کی، توکہیں جاکر چارج شیٹ میں ملزم کا نام شامل کیا گیا لیکن بعد میں اسے کلین چٹ دے دی گئی۔شکایت کنندہ نے بتایا کہ وہ موٹر سائیکل، جس کوضبط کرنے کے وقت اس پرکوئی نمبر پلیٹ نہیں تھا، تفتیش کے دوران پراسرار طور پراسے رجسٹریشن نمبر الاٹ کر دیا گیا۔ اس پر سخت برہمی کا اظہار کرتے ہوئے، بنچ نے اتر پردیش پولیس کے وکیل سے سوال کیاکہ ملزم کو موقع پر ہی پکڑ لیا گیا تھا تو آپ نے نامعلوم کیوں لکھا؟ ایسے میں لوگ پولیس پر کیسے بھروسہ کریں گے؟‘‘بنچ نے اپنے تبصرے میں کہا کہ ابتدائی ایف آئی آر میں پکڑے گئے مشتبہ شخص کا نام خالی چھوڑنا اور بعد میں مقدمے کی تفصیلات میں ردوبدل کرنا، قانون نافذ کرنے والے اداروں کی ادارہ جاتی ساکھ اور عوامی اعتماد کو مکمل طور پر مجروح کرتا ہے۔ عدالت نے مزید کہا کہ یو پی پولیس کی جانب سے جمع کرایا گیا جوابی حلف نامہ انتہائی غیر تسلی بخش ہے۔عدالت نے متعلقہ پولیس افسر کو ہدایت کی کہ وہ اگلی سماعت پر عدالت میں پیش ہواور وضاحت کرے کہ ایف آئی آر میں ملزم کا نام کیوں شامل نہیں کیا گیا تھا۔