امریکی امیگریشن ایجنسی نے کشمیری فلم ساز عرفات شیخ کو ہوائی اڈے پر حراست میں لے لیا ،ایوارڈ یافتہ ہدایت کار کو ورجینیا میں آمد پر حکام کے ذریعے روکے جانے کے بعد قانونی کارروائی کا سامنا ہے،وہ اسٹوڈنٹ ویزا پر امریکہ آئے تھے اور۲۰۲۰ء میں پناہ کی درخواست دی تھی۔

 ایک حمایتی مہم کے مطابق امریکی امیگریشن حکام نے کشمیری فلم ساز عرفات شیخ کو ورجینیا ہوائی اڈے پر اترنے کے فوراً بعد حراست میں لے لیا۔’’سپورٹ عرفات شیخ ریلیز‘‘ مہم نے کہا،۲۴؍ ستمبر ۲۰۲۶ء کو، ہمارے دوست اور فلم ساز، عرفات شیخ کو ڈلس ہوائی اڈے (IAD) پر جہاز سے اترتے ہی ICE نے غیر قانونی طور پر حراست میں لے لیا۔ان کے دوست آزاد عیسیٰ نے سوشل میڈیا پر بتایا کہ۴۲؍ سالہ فنکار، جو الیگزینڈریا، ورجینیا میں رہتے ہیں، جارجیا اسٹیٹ یونیورسٹی میں فلم میں گریجویٹ تعلیم حاصل کرنے کے لیے اسٹوڈنٹ ویزا پر امریکہ آئے تھے اور۲۰۲۰ء میں انہوں  نے پناہ کی درخواست دی تھی۔

یہ بھی پڑھئے: ایلون مسک ایک ’غنڈہ‘ ہے جو صرف اسے جواب دینے والوں کی عزت کرتا ہے: سیم آلٹمین

مزید برآں عیسیٰ نے کہا کہ شیخ کے پاس زیر التواء امیگریشن درخواست کے تحت فعال ورک اور رہائشی اجازت موجود ہے۔علاوہ ازیں عیسیٰ نے بتایا کہ شیخ کو بولنگ گرین، ورجینیا میں کیرولائن ڈیٹینشن سینٹر میں رکھا گیا ہے۔برطانوی خبر رساں ادارے دی انڈیپنڈنٹ نے رپورٹ کیا کہ عرفات شیخ منگل کو امیگریشن جج کے سامنے طریقہ کار کی سماعت کے ساتھ بانڈ کی تشخیص کے لیے پیش ہونے والے ہیں۔تاہم امریکی امیگریشن اینڈ کسٹمز انفورسمنٹ (ICE) اور محکمہ ہوم لینڈ سیکیورٹی نے حراست کے حوالے سے کوئی سرکاری تبصرہ جاری نہیں کیا ہے۔ 

یہ بھی پڑھئے: برطانوی مصنف اور سابق سیاست دان جیفری آرچر ۸۶؍ برس کی عمر میں انتقال کرگئے

واضح رہے کہ شیخ نے اپنی پہلی فیچر فلم، سیفرون کنگڈم سے بین الاقوامی شناخت حاصل کی، جو۱۰۰؍ سے زیادہ تھیٹروں میں دکھائی گئی اور۱۷۵؍ ممالک میں اسٹریم کی گئی۔اس پروڈکشن کو اناتولین انٹرنیشنل فلم ایوارڈز، شکاگو فلم میکرز ایوارڈ، اور لاس اینجلس فلم اینڈ ڈاکیومنٹری ایوارڈز میں بہترین فیچر فلم سمیت اعزازات ملے، ساتھ ہی ٹینک انٹرنیشنل فلم فیسٹیول میں ایمرجنگ فلم میکر کا اعزاز بھی ملا۔