امریکہ میں جاری وفاقی حکومتی شٹ ڈاؤن کے باعث فضائی آمد و رفت شدید دباؤ کا شکار ہے۔ اتوار کو تقریباً ۲۸۰۰؍ پروازیں منسوخ اور ۱۰؍ ہزار سے زائد تاخیر کا شکار ہوئیں جبکہ فیڈرل ایوی ایشن ایڈمنسٹریشن نے عملے کی کمی کے باعث ۴۰؍ بڑے ہوائی اڈوں پر پروازوں میں ۱۰؍ فیصد تک کمی کی ہدایت جاری کی ہے۔

امریکہ میں جاری سرکاری شٹ ڈاؤن (جسے اب تک کا سب سے طویل شٹ ڈاؤن کہا جارہا ہے) کے باعث فضائی کمپنیز اور مسافر دونوں شدید مشکلات کا سامنا کر رہے ہیں۔ اتوار کو فضائی آمد و رفت کا سب سے خراب دن رہا، جب تقریباً ۲؍ ہزار ۸۰۰؍ پروازیں منسوخ اور ۱۰؍ ہزار سے زائد پروازیں تاخیر کا شکار ہوئیں۔ یہ اقدامات بنیادی طور پر وہ ہیں جو ایف اے اے نے ۴۰؍ بڑے ہوائی اڈوں پر عملے کی کمی اور کنٹرول ٹاورز میں غیر حاضری کے باعث جاری کی ہیں۔ شٹ ڈاؤن کے بعد سے فضائی کنٹرولر کی کمی شدید ہو گئی ہے۔ فضائی کمپنیوں کا کہنا ہے کہ اکتوبر میں تاخیر کا ۱۶؍ فیصد حصہ ایسا ہے جو کنٹرولر اسٹاف کی کمی کے باعث ہوا حالانکہ پیشگی شرح صرف تقریباً ۵؍ فیصد تھی۔ 

یہ بھی پڑھئے: اسرائیلی فوج کی سابق اعلیٰ قانونی افسر یفعات تومر کی خودکشی کی کوشش، اسپتال داخل

خاص طور پر، بڑی ایئرلائنز نے سرکاری ہدایت کے تحت پروازوں میں کمی شروع کر دی ہے۔ ڈیلٹا ایئر لائنس سمیت کئی کمپنیوں نے اس ہفتے کے اختتام پر تقریباً ۴؍ فیصد پروازیں کم کرنے کا اعلان کیا۔ وہائٹ ہاؤس اور قانون ساز اداروں میں طے پانے والا ابتدائی معاہدہ حکومت کو کھولنے کی راہ ہموار کرے گا، مگر ابھی تک حتمی دستخط باقی ہیں۔ صدر ٹرمپ نے بتایا کہ معاہدہ ’’کافی قریب‘‘ ہے۔ تاہم عمل درآمد منتظر ہے۔ اس بحران کا اثر صرف مسافروں تک محدود نہیں ہے، فضائی کارگو، تجارت، اور چھٹیوں کے سفر پر بھی منفی ردِعمل دیکھنے میں آ رہا ہے۔ ایف اے اے کے مطابق اگر شٹ ڈاؤن جاری رہا تو پروازوں میں کمی ۲۰؍ فیصد تک پہنچ سکتی ہے، جس سے تعطیلات کے سیزن میں صارفین اور صنعت دونوں متاثر ہوں گے۔ 

یہ بھی پڑھئے: دہلی: فضائی آلودگی کے خلاف عوام کا احتجاج، آلودگی پرفوری اقدامات کا مطالبہ

مسافروں کیلئے نکات
(۱) سفر کی قبل از وقت تصدیق کریں، چونکہ پرواز کی منسوخی یا تاخیر کا خطرہ بڑھ گیا ہے۔
(۲) ایئرلائن سے براہِ راست رابطہ رکھیں تاکہ ریفنڈ یا دوبارہ بکنگ کی سہولیات معلوم ہوں۔
(۳) بڑے ہوائی اڈوں پر سیکوریٹی اور کنٹرول ٹاورز کی کارروائی سست ہو سکتی ہے، اس لئے وقت پر پہنچنا بہتر ہے۔