وویک راماسوامی کو ’’ امریکن ڈریم‘‘ کی وکالت کے سبب، سوشل میڈیا پر تنقید کا سامنا کرنا پڑا، صارفین نے ان پر امریکیوں سے بڑھ کر امریکی ہونے کا الزام عائد کیا، اس کے علاوہ لوگوں کا کہنا ہے کہ انہیں راما سوامی سے امریکن ڈریم کے معنی سیکھنے کی ضرورت نہیں ہے۔

وویک راماسوامی کو ’’امریکن ڈریم‘‘ کی وکالت کرنے پر سوشل میڈیا صارفین کی تنقید کا نشانہ بنایا گیا ہے۔ بہت سے لوگوں نے ان پر حد سے تجاوز کرنے کا الزام لگایا، جس سے امریکہ میں قومیت، شناخت اور سیاسی پیغام رسانی پر بحث چھڑ گئی۔ریپبلکن اوہائیو گورنر امیدوار وویک راماسوامی کو ڈونالڈ ٹرمپ کے قدامت پسند میگا ووٹر بیس کی طرف سے امریکن ڈریم کی تشریح و تبلیغ کرنے پر سخت تنقید کا سامنا ہے۔ راماسوامی نے جی او پی ووٹرز سے بات کرتے ہوئے کہاتھا کہ ، ’’کوئی کینیڈین ڈریم نہیں ہے۔ کوئی برٹش ڈریم نہیں ہے۔ کوئی چائنیز ڈریم نہیں ہے۔ یہ امریکن ڈریم اس لیے کہلاتا ہے۔ یہی چیز امریکی استثنیٰ کو ممکن بناتی ہے۔‘‘

یہ بھی پڑھئے: الہان عمر ردی کی ٹوکری ہے: ٹرمپ کا صومالی کمیونٹی پر حملہ تیز

واضح رہے کہ گورنرشپ امیدوار راماسوامی فی الحال اوہائیو کے شہروں کا دورہ کر رہے ہیں۔ وہ کئی مواقع پر سفید فام قوم پرستوں کے حملوں کا نشانہ بن چکے ہیں، لیکن انہیں ریپبلکن پارٹی کے اندر اچھی حمایت حاصل ہے اور صدر ڈونالڈ ٹرمپ کی توثیق بھی حاصل ہے، جبکہ وہ ڈیموکریٹک امیدوار ایمی ایکٹن کے خلاف مقابلہ کر رہے ہیں۔سوشل میڈیا پر نفرت اور نسل پرستانہ تبصروں کی بھرمار ہو گئی۔ ہندنژاد تاجر خاص طور پر اپنے قدامت پسند سفید فام ووٹرز کے نشانے پر ہیں۔ بہت سے لوگوں نے ان کی جلاوطنی کا مطالبہ کیا، یہ کہتے ہوئے کہ وہ ان کی بھوری جلد کے آگے نہیں دیکھ سکتے، یہاں تک کہ انہیں غیر ملکی طفیلی قرار دیا۔ جبکہ کچھ نے امریکن ڈریم کو سرمایہ دارانہ برانڈنگ قرار دیتے ہوئے اس بات پر روشنی ڈالی کہ جس شخص نے اس اصطلاح کو ایجاد کیا تھا وہ۱۹۲۴ء کی امیگریشن پابندیوں کا حامی تھا اور اینگلو سیکسن برتری پر یقین رکھتا تھا۔ لیکن دوسروں نے فوراً نشاندہی کی کہ امریکہ عظیم اس لیے بنا کیونکہ یہ جرمنک، سلاوک اور سیلٹک لوگوں سے آباد تھا۔

یہ بھی پڑھئے: ۲۲؍ سالہ ہند نژاد آدرش ہائر متھ دنیا کے سب سے کم عمر ’’سیلف میڈ بلینئر‘‘ بن گئے

مزید ایک صارف نے تبصرہ کیا، ’’امریکن ڈریم آپ کو جلاوطن ہوتے دیکھنا ہے،‘‘ دوسرے نے کہا، ’’ہمیں یہ بتانے کے لیے کسی ہندوستانی کی ضرورت نہیں کہ امریکن ڈریم کیا ہے، آپ کو جلاوطن کیا جانا چاہیے۔یہ سفید فام امریکہ کی ذمہ داری کیوں ہے کہ وہ باقی سب کو خواب فراہم کرے؟ کیا بھورے لوگ خود خواب دیکھنے سے قاصر ہیں؟‘‘