جیک ویدرالڈ (۷۲؍رن)، مارنس لبوشین (۶۵) اور کپتان اسٹیو اسمتھ (۶۱؍رن) کی شاندار نصف سنچریوں کی بدولت آسٹریلیا نے ایشیز سیریز کے ڈے نائٹ دوسرے ٹیسٹ کے دوسرے دن انگلینڈ کے خلاف اسٹمپز تک ۶؍ وکٹ کے نقصان پر ۳۷۸؍ رنز بنا کر ۴۴؍رنز کی برتری حاصل کر لی۔

جیک ویدرالڈ (۷۲؍رن)، مارنس لبوشین (۶۵) اور کپتان اسٹیو اسمتھ (۶۱؍رن) کی شاندار نصف سنچریوں کی بدولت آسٹریلیا نے ایشیز سیریز کے ڈے نائٹ دوسرے ٹیسٹ کے دوسرے دن انگلینڈ کے خلاف اسٹمپز تک ۶؍ وکٹ کے نقصان پر ۳۷۸؍ رنز بنا کر ۴۴؍رنز کی برتری حاصل کر لی اور میچ پر اپنی مضبوط گرفت قائم کر لی ہے۔
 برسبین  میں  انگلینڈ نے اپنی پہلی اننگز جمعرات  کے نَو وکٹ پر ۳۲۵؍ رن سے آگے بڑھائی۔ صبح کے سیشن میں برینڈن ڈوگٹ نے جوفرا آرچر کو آؤٹ کرکے انگلینڈ کی اننگز۲ء۷۶؍  اوور میں ۳۳۴؍ رنز پر ختم کر دی۔ جو روٹ نے۲۰۶؍ گیندوں پر۱۵؍ چوکوں اور ایک چھکے کی مدد سے ناٹ آؤٹ ۱۳۸؍ رنز کی شاندار اننگز کھیلی۔آسٹریلیا کی جانب سے مچل اسٹارک نے ۶؍ وکٹ حاصل کئے جبکہ مائیکل نیسر، برینڈن ڈوگٹ اور اسکاٹ بولینڈ نے ایک، ایک کھلاڑی کو آؤٹ کیا۔
اس کے بعد بلے بازی کے لیے اتری آسٹریلیا کو ٹریوس ہیڈ اور جیک ویڈرالڈ کی اوپننگ جوڑی نے مضبوط آغاز دلایا اور پہلے وکٹ کے لیے۷۷؍ رنز کی شراکت قائم کی۔ ۱۴؍ویں اوور میں بریڈن کارس نے ٹریوس ہیڈ کو ۳۳؍ رنز پر آؤٹ کرکے آسٹریلیا کو پہلا دھچکا دیا۔ نمبر تین پر آنے والے بیٹر مارنس لبوشین نے ویڈرالڈ کے ساتھ مل کر مزید ۶۹؍ رنز جوڑے، لیکن۲۶؍ویں اوور میں جوفرا آرچر نے جیک ویڈرالڈ کو ایل بی ڈبلیو کرکے پویلین بھیج دیا۔

یہ بھی پڑھئے:تیرے عشق میں: ۶؍برسوں میں کریتی سینن کی پہلی ہٹ فلم

جیک ویڈرالڈ نے ۷۸؍ گیندوں پر۱۲؍ چوکوں اور ایک چھکے کی مدد سے۷۲؍ رنز بنائے۔ مارنس لبوشین نے بھی نو چوکوں اور ایک چھکے  کی مدد سے۶۵؍ رنز کی شاندار اننگز کھیلی۔ کپتان اسٹیو اسمتھ نے ۸۵؍ گیندوں میں ۵؍ چوکوں اور دو چھکوں کے ساتھ ۶۱؍ رنز کی نصف سنچری اننگز کھیلی۔ کیمرون گرین نے ۴۵؍ رنز بنائے  جبکہ جوش انگلِس۲۳؍ رنز بنا کر آؤٹ ہوئے۔

یہ بھی پڑھئے:آر بی آئی نے۲۶۔۲۰۲۵ء کی ترقی کی پیشین گوئی بڑھاکر ۳ء۷؍ فیصد کردیا

دن کا کھیل ختم ہونے تک آسٹریلیا نے اپنی پہلی اننگز میں ۶؍ وکٹ پر ۳۷۸؍ رنز بنا کر انگلینڈ کے خلاف ۴۴؍ رنز کی برتری حاصل کر لی ہے۔ کریز پر الیکس کیری ۴۵؍ رنز ناٹ آؤٹ اور مائیکل نیسر ۱۵؍ رنز ناٹ آؤٹ موجود تھے۔انگلینڈ کی جانب سے برائیڈن کارس نے ۳؍ وکٹ حاصل کئے جبکہ کپتان بین اسٹوکس نے دو کھلاڑیوں کو آؤٹ کیا۔ جوفرا آرچر نے ایک وکٹ اپنے نام کی۔