سال ۲۰۲۵ء عالمی سیاست میں نوجوان نسل، خصوصاً جین زی (Generation Z) کے غیر معمولی سیاسی شعور اور مزاحمتی طاقت کا سال ثابت ہوا۔ ایشیا، افریقہ، یورپ اور لاطینی امریکہ کے کئی ممالک میں نوجوانوں نے بدعنوانی، معاشی بدحالی، بے روزگاری، ریاستی جبر، اظہارِ رائے پر پابندیوں اور حکومتی نااہلی کے خلاف بھرپور احتجاج کئے۔ یہ مظاہرے محض مقامی مسائل تک محدود نہیں تھے بلکہ ایک ایسے عالمی رجحان کی عکاسی کرتے تھے جہاں ڈیجیٹل طور پر جڑی ہوئی نسل شفاف حکمرانی اور جواب دہ نظام کا مطالبہ کر رہی تھی۔ ان احتجاجات نے کئی حکومتوں کو دفاعی پوزیشن پر لا کھڑا کیا۔

نیپال
ستمبر ۲۰۲۵ء میں نیپال کے نوجوانوں نے سوشل میڈیا پر پابندی، بڑھتی بدعنوانی، بے روزگاری اور سیاسی اقربہ پروری کے خلاف شدید احتجاج کیا۔ جین زی مظاہرین نے وزیرِ اعظم کے پی اولی سے فوری استعفیٰ اور ڈیجیٹل آزادی کی بحالی کا مطالبہ کیا۔

مڈغاسکر
اکتوبر میں مڈغاسکر کے نوجوان پانی اور بجلی کی شدید قلت کے خلاف سڑکوں پر نکل آئے۔ غیر منظم حکومت، مہنگائی اور بنیادی انسانی خدمات کی ناکامی نے احتجاج کو طول دیا، جس نے حکومت کی کمزور انتظامی صلاحیت کو بے نقاب کیا۔

انڈونیشیا
انڈونیشیا میں نوجوانوں نے اراکینِ پارلیمان کو دیے جانے والے بھاری ہاؤسنگ الاونس کے خلاف احتجاج کیا۔ اگست کے مظاہروں میں وزارتِ محنت کی برطرفی اور عوامی وسائل کے شفاف استعمال کا مطالبہ نمایاں رہا۔

یہ بھی پڑھئے:جنوبی کوریا: صدر کا ’بالوں کا جھڑنا‘ کو قومی صحت انشورنس میں شامل کرنے کا مطالبہ

مراکش
مراکش میں جین زی نوجوانوں نے بدعنوانی اور عوامی اخراجات کی ترجیحات کے خلاف احتجاج کیا۔ صحت اور تعلیم کو نظرانداز کر کے ۲۰۳۰ء فیفا ورلڈ کپ پر خطیر رقم خرچ کرنے کے فیصلے کے خلاف آن لائن گروپ جین زی-۲۱۲ نے قیادت کی۔

بلغاریہ
بلغاریہ میں نومبر اور دسمبر کے دوران نوجوانوں نے کرپشن، ۲۰۲۶ء کے بجٹ مسودے اور یورپی کرنسی اپنانے کے فیصلے کے خلاف احتجاج کیا۔ جین زی نے خدشہ ظاہر کیا کہ اس اقدام سے مہنگائی اور معاشی دباؤ بڑھے گا۔

فلپائن
فلپائن میں نوجوانوں نے سیلاب سے بچاؤ کے بجٹ میں مبینہ گھوٹالوں کے خلاف احتجاج کیا۔ مظاہرین نے صدر مارکوس جونیئر اور قانون سازوں کے احتساب کا مطالبہ کیا، جس سے سیاسی کشیدگی میں نمایاں اضافہ ہوا۔

یہ بھی پڑھئے:’’اوینجرس: ڈومسڈے‘‘ کا ٹریلر لیک، کرس ایون کیپٹن امریکہ کے کردار میں

پیرو
ستمبر ۲۰۲۵ء میں پیرو کے نوجوانوں نے صدر ڈائنا بولوارٹے کی حکومت کے خلاف سیاسی عدم استحکام، جرائم اور معاشی بدحالی پر احتجاج کیا۔ ریاستی جبر، ماضی کے کریک ڈاؤن اور کانگریس پر عدم اعتماد مظاہروں کی بڑی وجوہات رہیں۔

میکسیکو
میکسیکو میں صدر کلاڈیا شین بوم کے دور میں بڑھتے جرائم اور بدعنوانی کے خلاف نوجوانوں نے احتجاج کیا۔ میشواکان میں منشیات فروش گروہ کے خلاف کارروائی اور اورواپان کے میئر کے قتل نے مظاہروں کو مزید شدت دی۔

کینیا
کینیا میں ۲۰۲۴ء کے ٹیکس بل کے خلاف شروع ہونے والے نوجوانوں کے احتجاج جولائی ۲۰۲۵ء میں دوبارہ بھڑک اٹھے۔ پولیس تشدد اور بدعنوانی کے خلاف مظاہروں پر قابو پانے کے لیے حکومت نے فوج بھی تعینات کی۔

پیراگوائے
پیراگوائے میں جین زی نوجوانوں نے بدعنوانی، سیاسی اقربہ پروری، منشیات کی تجارت اور بنیادی سہولیات کی کمی کے خلاف احتجاج کیا۔ یہ مظاہرے نوجوانوں سے نکل کر وسیع عوامی تحریک میں تبدیل ہو گئے۔