جنوبی یمن کے الضالع گورنری میں واقع حردہ دمت آتش فشاں کے گڑھے میں گرنے والے معروف یمنی کوہ پیما انطار العبسی المعروف ’’القعقا‘‘ (اسپائیڈرمین) کی لاش برآمد کر لی گئی ہے۔ القعقا سوشل میڈیا پر خطرناک چٹانوں اور آتش فشانی گڑھوں میں حفاظتی سامان کے بغیر مہم جوئی کی ویڈیوز کی وجہ سے مشہور تھے۔

یمن کے جنوبی صوبے الضالع میں واقع حردہ دمت آتش فشاں کے گڑھے میں گرنے والے معروف کوہ پیما اور سوشل میڈیا شخصیت انطار العبسی، جو ’’القعقا‘‘ (اسپائیڈرمین) کے نام سے مشہور تھے، کی لاش ریسکیو حکام نے کئی گھنٹوں کے بعد برآمد کرلی ہے۔ حادثے کے بعد یمن کے سول ڈیفنس نے فوری طور پر خصوصی ریسکیو آپریشن شروع کیا تھا۔ صنعاء سے غوطہ خوری اور پانی میں بچاؤ کی تربیت یافتہ ٹیموں کو مکمل آلات اور روشنی کے یونٹس کے ساتھ جائے حادثہ پر روانہ کیا گیا تھا تاکہ دشوار گزار آتش فشانی گڑھے میں تلاش اور بازیابی کا کام انجام دیا جا سکے۔ مقامی حکام کے مطابق گڑھے کے اردگرد کا علاقہ انتہائی خطرناک اور دشوار رسائی کا حامل ہے، جس کی وجہ سے امدادی کارروائیوں میں غیر معمولی مشکلات پیش آئیں۔ 

Yemen`s real-life Spider-Man has died.

Known as "Al-Qa`Qa`," he became famous for scaling the sheer cliffs around Damt`s volcanic hot springs in Al-Dhale` Governorate, performing daring feats high above the water and writing names in white chalk across the rock face. His… pic.twitter.com/oatXRbaLNX

— Basha باشا (@BashaReport) June 12, 2026

تاہم تازہ ترین مقامی رپورٹس کے مطابق ریسکیو ٹیمیں بالآخر القعقا کی لاش تک پہنچنے میں کامیاب ہو گئیں۔ مقامی ذرائع نے تصدیق کی کہ نوجوان مہم جو چٹانی دیوار پر چڑھائی کے دوران توازن کھو بیٹھا اور گہرے آتش فشانی گڑھے میں جا گرا، جس کے نتیجے میں موقع پر ہی جان کی بازی ہار گیا۔ القعقا گزشتہ چند برسوں میں سوشل میڈیا پر خاصی شہرت حاصل کر چکے تھے۔ ان کی ویڈیوز میں انہیں حردہ دمت کے خطرناک آتش فشانی گڑھے کی دیواروں پر بغیر کسی پیشہ ورانہ حفاظتی سامان کے چڑھتے اور خطرناک کرتب دکھاتے دیکھا جا سکتا تھا۔ ان کے ہزاروں مداح ان کی جرات مندانہ مہم جوئی کو پسند کرتے تھے، تاہم مقامی باشندے اور مبصرین بارہا ان سرگرمیوں کے خطرات سے خبردار بھی کرتے رہے تھے۔ 
حردہ دمت یمن کے معروف قدرتی مقامات میں شمار ہوتا ہے۔ یہ ایک قدیم آتش فشانی گڑھا ہے جو ایک پہاڑی چوٹی پر واقع ہے اور اس کی گہرائی تقریباً ۱۲۰؍ میٹر بتائی جاتی ہے۔ گڑھے کے اندرونی حصے میں ہموار راستے یا ہنگامی اخراج کے مناسب انتظامات موجود نہیں، جس کی وجہ سے کسی بھی حادثے کی صورت میں امدادی کارروائی انتہائی پیچیدہ ہو جاتی ہے۔ حادثے کے ویڈیوز سوشل میڈیا پر تیزی سے وائرل ہوئے، جن میں القعقا کو گڑھے کے کنارے خطرناک انداز میں حرکت کرتے دیکھا جا سکتا ہے۔ ان مناظر نے یمن اور عرب دنیا میں ان کے مداحوں کے درمیان غم و افسوس کی لہر دوڑا دی۔ 

یہ بھی پڑھئے: ’مَیں دوسرے بچوں کی طرح کیوں نہیں ہوں؟‘: عینک ٹوٹ جانے پر ۷؍ سالہ فلسطینی بچہ پھوٹ پھوٹ کر رو پڑا

سول ڈیفنس حکام نے واقعے کے بعد شہریوں سے اپیل کی ہے کہ وہ پہاڑی، آتش فشانی اور دیگر خطرناک مقامات پر مہم جوئی یا تفریحی سرگرمیوں کے دوران حفاظتی اصولوں کی مکمل پابندی کریں۔ حکام کا کہنا ہے کہ پیشہ ورانہ حفاظتی آلات اور تربیت کے بغیر ایسے مقامات پر جانا انسانی جان کے لیے سنگین خطرہ بن سکتا ہے۔ القعقا کی موت نے ایک بار پھر سوشل میڈیا شہرت کے لیے اختیار کیے جانے والے خطرناک اسٹنٹس اور مہم جوئی کے رجحان پر سوالات کھڑے کر دیے ہیں، جبکہ مقامی حلقے ایسے مقامات پر حفاظتی نگرانی اور ضوابط سخت کرنے کا مطالبہ کر رہے ہیں۔