ہندوستانی ون ڈے ٹیم کے کپتان روہت شرما سے منسوب  وانکھیڈے اسٹیڈیم میں ایک اسٹینڈ ہوگا۔ یہ لیول-۳؍ اسٹینڈ ہے، جو اس سے پہلے ’دیویچا پویلین‘ کے نام سے جانا جاتا تھا۔

ہندوستانی ون ڈے ٹیم کے کپتان روہت شرما سے منسوب  وانکھیڈے اسٹیڈیم میں ایک اسٹینڈ ہوگا۔ یہ لیول-۳؍ اسٹینڈ ہے، جو اس سے پہلے ’دیویچا پویلین‘ کے نام سے جانا جاتا تھا۔ روہت کے والد گرو ناتھ شرما اور والدہ پورنیما شرما نے جمعہ کواس اسٹینڈ کا افتتاح کیا۔ اس موقع پر روہت شرما کے ساتھ مہاراشٹر کے وزیر اعلیٰ دیویندر فرنویس اور نیشنل کانگریس پارٹی (این سی پی) کے سربراہ شرد پوار بھی موجود تھے۔
 حال ہی میں ٹیسٹ کرکٹ سے ریٹائرڈ ہونے والے روہت شرما کے اعزاز میں وانکھیڈے اسٹیڈیم کے دیویچا پویلین لیول-۳ ؍کو اب ’روہت شرما اسٹینڈ‘ کے نام سے جانا جائے گا۔    اس موقع پر  نیشنلسٹ کانگریس پارٹی کے صدر شرد پوار سمیت کئی معزز شخصیات موجود تھیں۔اس موقع پر روہت اپنے خاندان کے ساتھ موجود تھے۔ جذباتی انداز میں روہت شرما نے کہا کہ یہ ایک ناقابل یقین لمحہ ہے۔ انہوں نے کہا کہ انہوں نے کبھی خواب میں بھی نہیں سوچا تھا کہ انہیں ایسا اعزاز ملے گا۔ اتنے سارے لوگوں کے سامنے یہ عزت پانا ان کیلئے  انتہائی خوشی کی بات ہے۔اس عزت افزائی کے ساتھ ہی روہت شرما اب ان عظیم کھلاڑیوں کی فہرست میں شامل ہو گئے ہیں جن کے نام پر وانکھیڈے اسٹیڈیم میں اسٹینڈ موجود ہیں، جن میں سچن تینڈولکر، سنیل گاوسکر، دلیپ وینگسرکر اور وجے مرچنٹ شامل ہیں۔ ہندوستان نے روہت کی کپتانی میں ٹی ۲۰؍ ورلڈ کپ  اور چمپئن ٹرافی جیتا ہے۔ وہ ٹی ۲۰؍ فارمیٹ اور ٹیسٹ سے ریٹائرڈ ہو چکے ہیں لیکن ان کی کامیابی کو ہمیشہ یاد رکھا جائے گا۔ روہت کی کپتانی میں ہندوستان ۲۰۲۳ء کے یکروزہ ورلڈ کپ کے فائنل اور ورلڈ ٹیسٹ چمپئن شپ کے فائنل میں پہنچنے میں کامیاب رہا۔