فیفا ورلڈ کپ کے کوارٹر فائنل میں جمعہ کو اسپین اور بلجیم آمنے سامنے ہوں گے جہاں بلجیم کو ٹورنامنٹ میں اسپین کے خلاف پہلا گول کرنے والی ٹیم بننے کا مشکل چیلنج درپیش ہوگا۔اسپین نے اب تک ٹورنامنٹ میں ایک بھی گول نہیں کھایا جبکہ گول کیپر اونائی سیمون مسلسل ۶۰۹؍ منٹ تک کلین شیٹ برقرار رکھ چکے ہیں۔

 

 

پیر کے روز سیئٹل میں امریکہ کوچار ایک  سے شرمناک شکست دینے کی یادیں اب بھی ا بلجیم کے کھلاڑیوںکے ذہنوں میں تازہ ہیں۔ سینیگال کے خلاف سنسنی خیز مقابلے میں شاندار واپسی کرنے اور پھر اپنے پہلے ۲؍ ناک آؤٹ میچوں میں امریکہ پر مکمل برتری حاصل کرنے کے بعد، بلجیم کو جمعہ کو کوارٹر فائنل میں ناقابل شکست اسپین کے خلاف اپنے اب تک کے سب سے مشکل چیلنج کا سامنا ہے۔لیکن گول کیپر تھیباؤٹ کورٹوئس کا خیال ہے کہ ورلڈ کپ کے اس اتار چڑھاؤ سے بھرے سفر نے اس بلجیم ٹیم میں ایک نیا جذبہ اور جوش پیدا کر دیا ہے۔

لاس اینجلس گلیکسی کے مضافاتی اسٹیڈیم میں گفتگو کرتے ہوئے کورٹوئس نے کہا’’ہم نے بہت زیادہ اعتماد حاصل کیا ہے کیونکہ ہم جانتے تھے کہ امریکہ کے خلاف میچ مشکل ہونے والا ہے۔ وہ واضح طور پر ہوم ٹیم ہیں اور پورا اسٹیڈیم ان کے ساتھ تھا، اس لئے دفاعی اور جارحانہ دونوں لحاظ سے اچھے انداز میں کارکردگی دکھانا اور بس اپنا کھیل کھیلنا بہت اچھا رہا۔‘‘بلجیم کی ٹیم امریکی ٹیم کے خلاف میچ میں شدید غصے اور حوصلے کے ساتھ اتری تھی کیونکہ امریکی اسٹار فارورڈ فولارین بالوگن پر عائد ایک میچ کی ریڈ کارڈ کی پابندی کو فیفا  نے حیران کن طور پر ختم کر دیا تھا۔ ریڈ ڈیولز نے اس کا غصہ امریکی ٹیم پر نکالا اور پھر  میدان اور ڈریسنگ روم دونوں جگہوں پر کھل کر جشن منایا۔ 

سوشل میڈیا پر سب سے زیادہ وائرل ہونے والے لمحے میں کئی کھلاڑیوں نے امریکی صدر ڈونالڈ ٹرمپ سے منسوب وہ سادہ سا رقص کیا جو حالیہ مہینوں میں امریکی اسٹار کرسچن پلسک سمیت کھیلوں کی دنیا کے متعدد ایتھلیٹ کی طرف سے کیا گیا ہے۔بلجیم کے لیفٹ بیک ڈیگو موریرا نے ہلکی سی مسکراہٹ کے ساتھ جواب دیا جب ان سے پوچھا گیا کہ ٹرمپ کی جانب سے فیفا کے صدر جانی انفانٹینو کو فون کر کے بالوگن کے ریڈ کارڈ پر نظرثانی کی درخواست کرنے کے بعد، اس رقص کو کرنے کا کیا مقصد تھا؟موریرا نے ایک مترجم کے ذریعے کہا’’مختلف گول کا جشن منانے کے مختلف طریقے ہوتے ہیں۔ آپ مختلف رقص کر سکتے ہیں اور ہم نے وہی کیا۔ ہم نے میچ کے بعد بس جیت کا جشن منایا۔‘‘

کورٹوئس نے کہا کہ وہ ڈریسنگ روم میں موجود نہیں تھے کیونکہ وہ ڈوپنگ کنٹرول میں تھے، اس لئے وہ اس رقص پر کوئی تبصرہ نہیں کر سکتے۔ریڈ ڈیولز کا کہنا ہے کہ لاس اینجلس کے علاقے میں سوفی  اسٹیڈیم میں کھیلے جانے والے اپنے ٹورنامنٹ کے دوسرے میچ کے لئے پہنچنے کے بعد، انہوں نے اس یادگار شام کو پیچھے چھوڑ دیا ہے۔تاہم بلجیم کی ٹیم اب بھی امریکیوں سے بحث کرنے کے موڈ میں دکھائی دی۔

رائل بلجین فٹ بال اسوسی ایشن کے ایک بیان کے مطابق ٹیم نے بدھ کو فیفا کی منظوری سے اپنا ٹریننگ بیس تبدیل کر دیا کیونکہ انہوں نے فیصلہ کیا تھا کہ لاس اینجلس کی  میری ماؤنٹ یونیورسٹی میں انہیں دئیےگئے گراؤنڈز ’’ہماری ٹریننگ کے لئے درکار کم از کم معیار پر پورا نہیں اترتے تھے۔‘‘

 

 

اسپین کے خلاف بلجیم کی ٹیم کو کمزور سمجھا جائے گا کیونکہ اسپین نے اس ورلڈ کپ میں اب تک ایک بھی گول نہیں کھایا ہے۔ یہ بات ریڈ ڈیولز کے لئے بالکل ٹھیک ہے جنہوں نے سینیگال کے خلاف دو صفرکے خسارے سے نکل کر ۲۔۳؍سے شاندار فتح حاصل کرنے کے بعد سے ٹورنامنٹ کا اپنا بہترین فٹ بال کھیلا ہے۔جب کورٹوئس سے مضبوط حریف اسپین کا سامنا کرنے کے بارے میں پوچھا گیا تو ان کا ذہن فوراً ۸؍ سال قبل روس میں ہونے والے ورلڈ کپ میں برازیل کے خلاف بلجیم کی دوایک سے فتح کی طرف چلا گیا۔ اس اپ سیٹ نے ریڈ ڈیولز کو ۳۲؍ برسوں میں پہلی بار سیمی فائنل میں پہنچایا تھا۔کورٹوئس نے کہا’’وہ(برازیل) ہمارے خلاف فیورٹ تھے اور شاید ان کی ٹیم میں انفرادی طور پر زیادہ صلاحیت موجود تھی۔ لیکن مجھے لگتا ہے کہ اب ہم سب مل کر ایک بہترین ٹیم بن چکے ہیں اور ہم لڑ رہے ہیں۔ خاص طور پر سینیگال کے خلاف میچ نے آخر تک یقین برقرار رکھنے کی ہماری صلاحیت کو ظاہر کیا اور ورلڈ کپ میں یہ بھی ایک بڑی طاقت ہوتی ہے۔ اہم چیز میچ جیتنا ہے۔ اچھا کھیلنا بھی  اچھی بات ہے لیکن سب سے اہم چیز جیتنا اور مقابلہ کرنا ہے اور ہم نے فیفا ورلڈ کپ میں اب تک یہی کیا اور اسپین کے خلاف بھی ٹیم ہار نہ ماننے کے جذبہ کے ساتھ میدان میں اترےگی۔