ہندوستان کی سابق کپتان اور معروف کرکٹر انجُم چوپڑا نے آئندہ ویمنز ایشیا کپ کے لیے ہندوستانی ٹی۲۰؍ ٹیم میں اوپنر پرتیکا راول کو شامل کیے جانے پر حیرت کا اظہار کیا ہے۔ ان کا کہنا ہے کہ سلیکٹرز کے اس فیصلے کی وجہ انہیں سمجھ نہیں آ رہی۔

ہندوستان کی سابق کپتان اور معروف کرکٹر انجُم چوپڑا  نے آئندہ ویمنز ایشیا کپ کے لیے ہندوستانی ٹی۲۰؍ ٹیم میں اوپنر  پرتیکا راول  کو شامل کیے جانے پر حیرت کا اظہار کیا ہے۔ ان کا کہنا ہے کہ سلیکٹرز کے اس فیصلے کی وجہ انہیں سمجھ نہیں آ رہی۔پرتیکا راول کو۲۸؍ اگست سے دبئی میں شروع ہونے والے ویمنز ایشیا کپ کے لیے جیمیمہ روڈریگز کی جگہ ہندوستانی اسکواڈ میں شامل کیا گیا ہے۔ جیمیمہ کو انگلینڈ کے دی ہنڈریڈ میں سدرن بریو کی جانب سے کھیلتے ہوئے دائیں ہیمسٹرنگ میں شدید چوٹ لگی تھی، جس کے باعث وہ ٹورنامنٹ سے باہر ہوگئی ہیں۔
 پرتیکا کو پہلی مرتبہ ہندوستانی ٹی۲۰؍ ٹیم میں شامل کیا گیا ہے، لیکن انجُم چوپڑا نے اسی بات پر سوال اٹھایا ہے کہ انہوں نے  نومبر ۲۰۲۴ء کی چیلنجر ٹرافی کے بعد کوئی ٹی۲۰؍ میچ نہیں کھیلا۔  اس ٹورنامنٹ میں انہوں نے ۸۱ء۱۱۱؍ کے اسٹرائیک ریٹ سے ۱۴۲؍ رنز بنائے تھے۔ایشیا کپ کے لیے پرتیکا کو انوشکا شرما اور ہرلین دیول جیسے کھلاڑیوں پر ترجیح دی گئی، جو پہلے ہندوستانی ٹی۲۰؍ ٹیم کا حصہ رہ چکی ہیں۔ پرتیکا  ۲۰۲۶ء ویمنز پریمیئر لیگ  میں بھی نہیں کھیل سکی تھیں، کیونکہ ۲۰۲۵ء کے ون ڈے ورلڈ کپ کے دوران ٹخنے کی چوٹ کے بعد وہ ایکشن سے دور تھیں۔
انجُم چوپڑا نے کہا کہ یہ سمجھنا مشکل ہے کہ ہندوستانی ٹیم کے پاس انتخاب کے لیے کوئی دوسرا کھلاڑی نہیں تھا۔ انہوں نے واضح کیا کہ وہ پرتیکا کی صلاحیتوں پر سوال نہیں اٹھا رہیں، لیکن ان کے مطابق ’’پرتیکا ایک بہترین کرکٹر ہیں، لیکن سب سے بڑا سوال یہ ہے کہ انہوں نے طویل عرصے سے ٹی۲۰؍ کرکٹ نہیں کھیلی اور وہ ابھی چوٹ سے واپسی کر رہی ہیں۔  انجُم نے کہا کہ پرتیکا نے حالیہ عرصے میں بہت کم مسابقتی کرکٹ کھیلی ہے اور وہ  ڈبلیو پی ایل کا بھی حصہ نہیں تھیں۔ 

یہ بھی پڑھئے:کیرتی سینن کی اشتہار پر تنازع، سوشل میڈیا ردعمل کے بعد جیوانے اشتہار ہٹا دیا

انجُم چوپڑا نے پرتیکا کے ممکنہ بیٹنگ آرڈر پر بھی سوال اٹھایا۔ ان کے مطابق اگر پرتیکا کو نمبر تین پر نہیں کھلایا جاتا تو یہ سمجھنا مشکل ہے کہ ٹیم میں ان کا کردار کیا ہوگا۔ انہوں نے کہا کہ اگر مقصد کسی نوجوان کھلاڑی کو موقع دینا تھا تو انوشکا شرما، راگھوی بشٹ، ورندا دنیش اور دیگر کھلاڑی بھی موجود تھیں، جنہیں ڈومیسٹک اور انڈیا اے کرکٹ میں مواقع ملے ہیں۔
انجُم نے کہا’’اگر آپ کسی کو موقع دینا چاہتے ہیں تو ایسے کھلاڑی کو منتخب کیا جا سکتا ہے جوڈبلیو پی ایل کا حصہ رہا ہو اور انڈیا اے کے ساتھ مسلسل سفر اور کھیل چکا ہو۔  پرتیکا کی فٹنیس بھی انجُم کے لیے ایک اہم تشویش ہے۔ انگلینڈ اے کے خلاف انڈیا اے کے ۵۰؍ اوور کے میچ میں فیلڈنگ کے دوران انہیں چوٹ لگی تھی، جس کے باعث وہ لارڈز میں ہونے والے تاریخی ٹیسٹ میچ میں بھی حصہ نہیں لے سکی تھیں۔ انجُم کے مطابق کسی ایسے کھلاڑی کو براہ راست ٹی۲۰؍ پلیئنگ الیون میں شامل کرنا، جو چوٹ سے واپسی کر رہا ہو اور جس نے حالیہ عرصے میں زیادہ مسابقتی کرکٹ نہ کھیلی ہو، ایک بڑا سوال ہے۔

یہ بھی پڑھئے:بی بی ایل کے نئے ضوابط کے تحت آسٹریلوی اور غیر ملکی کھلاڑیوں کو زیادہ رقم ملے گی

انجُم چوپڑا نے پرتیکا کی صلاحیتوں کو تسلیم کرتے ہوئے کہا کہ ممکن ہے مستقبل میں وہ ہندوستان کی بہترین ٹی۲۰؍ کرکٹرز میں شامل ہوں، لیکن موجودہ حالات میں ان کا انتخاب حیران کن ہے۔انہوں نے کہا’’پرتیکا راول ہندوستان کی اب تک کی بہترین ٹی۲۰؍ کرکٹر ثابت ہوسکتی ہیں۔ یہ وقت ہی بتائے گا، لیکن میرے خیال میں یہ صحیح وقت نہیں ہے۔ وہ چوٹ سے واپسی کر رہی ہیں، انہوں نے زیادہ مسابقتی کرکٹ نہیں کھیلا اور آپ توقع کر رہے ہیں کہ وہ براہ راست نمبر تین پر آ جائیں گی۔  پرتیکا راول کی شمولیت جیمیمہ روڈریگز کی انجری کے بعد ہندوستان ٹیم کی مجبوری بھی ہوسکتی ہے، تاہم انجُم چوپڑا کے سوال نے سلیکشن پالیسی پر بحث چھیڑ دی ہے۔ اب سب کی نظریں اس بات پر ہوں گی کہ ٹیم مینجمنٹ پرتیکا کو صرف اسکواڈ میں رکھتی ہے یا انہیں ایشیا کپ میں براہ راست پلیئنگ الیون میں بھی موقع دیتی ہے۔ہندوستان کا مقصد ایشیا کپ میں مضبوط کارکردگی کا مظاہرہ کرنا ہے، اور پرتیکا راول کے لیے یہ موقع اپنی ٹی۲۰؍ صلاحیت ثابت کرنے کا اہم مرحلہ ثابت ہوسکتا ہے۔