جرمن فٹبال کلب بائرن میونخ نے چمپئن لیگ کے راؤنڈ آف ۱۶؍ کے پہلے مرحلے میں اٹلانٹا کو اس کے ہوم گراؤنڈ پر ۱۔۶؍گول کے بڑے مارجن سے شکست دے کر اپنی طاقت کا لوہا منوا لیا ہے۔

 جرمن فٹبال کلب بائرن میونخ نے چمپئن  لیگ کے راؤنڈ آف ۱۶؍ کے پہلے مرحلے میں اٹلانٹا کو اس کے ہوم گراؤنڈ پر ۱۔۶؍گول  کے  بڑے مارجن سے شکست دے کر اپنی طاقت کا لوہا منوا لیا ہے۔ اس یکطرفہ فتح کے بعد بائرن میونخ کا کوارٹر فائنل میں پہنچنا اب محض ایک رسمی کارروائی معلوم ہوتا ہے۔
بائرن میونخ نے میچ کے آغاز سے ہی جارحانہ انداز اپنایا اور اٹلانٹا کے دفاع کو تتر بتر کر دیا۔ میچ کے ۱۲؍ ویں منٹ میں جوسپ اسٹانیسک نے گول کر کے ٹیم کو برتری دلائی۔ فرانسیسی فارورڈ مائیکل اولیز میچ کے ہیرو ثابت ہوئے، جنہوں نے دو خوبصورت گول اسکور کیے۔ سرج گنیبری، نکولس جیکسن اور جمال موسیالا نے بھی گیند کو جال کی راہ دکھائی۔ اٹلانٹا کی جانب سے واحد گول پاسالک نے میچ کے آخری لمحات (اسٹاپیج ٹائم) میں کیا، جو صرف ان کی ٹیم کی شکست کا بوجھ ہی کم کر سکا۔

Raining goals in Bergamo! ☔️⚽️ pic.twitter.com/fx4lKz0ros

— FC Bayern (@FCBayernEN) March 10, 2026

دلچسپ بات یہ ہے کہ بائرن میونخ نے یہ بڑی فتح اپنے اسٹار کھلاڑیوں ہیری کین اور جمال موسیالا کو ابتدائی الیون میں شامل کیے بغیر حاصل کی۔ونسنٹ کومپنی کی کوچنگ میں ٹیم نے ثابت کیا کہ وہ اس بار ٹائٹل جیتنے کی سب سے مضبوط امیدوار ہے۔اٹلانٹا کی اس شکست کے ساتھ ہی چیمپئن لیگ کے موجودہ سیزن میں اطالوی کلبوں کی نمائندگی ختم ہونے کے قریب ہے۔اگر اگلے ہفتے میونخ میں ہونے والے دوسرے لیگ میں کوئی بڑا الٹ پھیر نہ ہوا  تو کوارٹر فائنل میں بائرن میونخ کا مقابلہ  ریئل  میڈرڈ یا مانچسٹر سٹی جیسی بڑی ٹیموں سے متوقع ہے۔ فٹبال شائقین اب ان بڑے مقابلوں کے منتظر ہیں۔

یہ بھی پرھئے:سنجو سیمسن نے انوکھا عالمی ریکارڈ قائم کیا

رونالڈو اور النصر کے دبئی میچز کی نئی تاریخوں کا اعلان
ایشین فٹبال کنفیڈریشن ( اے ایف سی) نے مشرق وسطیٰ کی موجودہ صورتحال کے باعث ملتوی ہونے والے اے ایف سی چیمپئن لیگ ۲؍ کے کوارٹر فائنل میچز کا نیا شیڈول جاری کر دیا ہے۔ النصر اور الاماراتی کلب الوصل  کے درمیان یہ مقابلے اب اپریل میں ہوں گے۔پہلے یہ مقابلے ۴؍ اور ۱۱؍ مارچ کو طے تھے، تاہم اب نئے شیڈول کے مطابق پہلا لیگ منگل  ۷؍ اپریل کو دبئی کے زعبیل اسٹیڈیم میں کھیلا جائے گا۔دوسرا لیگ منگل، ۱۴؍ اپریل کو ریاض کے الاول پارک میں منعقد ہوگا۔

یہ بھی پڑھئے:ایران کے خلاف امریکہ اور اسرائیل جنگ کا واحد فاتح روس:ای یو

فروری کے آخر میں ال فیہا کے خلاف میچ کے دوران ہیمسٹرنگ انجری کا شکار ہونے والے کرسٹیانو رونالڈو کے لیے یہ ری شیڈولنگ خوش آئند ثابت ہوئی ہے۔ ۴۱؍ سالہ اسٹار فٹبالر کو۲؍ سے ۴؍ ہفتوں کے آرام کا مشورہ دیا گیا تھا۔  میچز کی تاریخیں آگے بڑھنے سے اب قوی امکان ہے کہ وہ الوصل کے خلاف دونوں میچوں کے لیے مکمل فٹ اور دستیاب ہوں گے۔اگرچہ النصر کی بنیادی توجہ سعودی پرو لیگ  پر مرکوز رہی ہے، لیکن ٹورنامنٹ کے آخری مراحل میں پہنچنے کے بعد کلب اب اپنی پہلی باضابطہ ٹرافی جیتنے کے لیے پرعزم ہے۔ رونالڈو کی موجودگی ٹیم کے لیے کلیدی ثابت ہو سکتی ہے، خاص طور پر جب وہ آئندہ فیفا ورلڈ کپ کے لیے پرتگال کی ٹیم میں اپنی جگہ مضبوط کرنے کی کوشش کر رہے ہیں۔