امریکی صدر ڈونالڈ ٹرمپ نے گولف کے عظیم کھلاڑی ٹائیگر ووڈز کی پانچ سالہ ڈرائیونگ پابندی پر ردعمل ظاہر کرتے ہوئے کہا ہے کہ ووڈز اس وقت ’’بہت شدید درد‘‘ سے گزر رہے ہیں۔ ٹرمپ نے گالف اسٹار کو ایک ’’بہت خاص شخص‘‘ قرار دیا اور ان کی صحت اور طویل عرصے سے جاری کمر کے مسائل پر ہمدردی کا اظہار کیا۔

امریکی صدر ڈونالڈ ٹرمپ  نے گولف کے عظیم کھلاڑی  ٹائیگر ووڈز  کی پانچ سالہ ڈرائیونگ پابندی پر ردعمل ظاہر کرتے ہوئے کہا ہے کہ ووڈز اس وقت ’’بہت شدید درد‘‘ سے گزر رہے ہیں۔ ٹرمپ نے گالف اسٹار کو ایک ’’بہت خاص شخص‘‘ قرار دیا اور ان کی صحت اور طویل عرصے سے جاری کمر کے مسائل پر ہمدردی کا اظہار کیا۔ 
ٹائیگر ووڈز کو فلوریڈا کی عدالت نے رواں ہفتے  پانچ سال کے لیے ڈرائیونگ لائسنس معطل  کرنے کی سزا سنائی ہے۔ یہ کارروائی مارچ ۲۰۲۶ میں ان کی گاڑی کے حادثے سے متعلق مقدمے میں پلی بارگین کے بعد سامنے آئی۔ ووڈز نے اصل  ڈرائیونگ انڈر دی انفلوئنس (DUI) الزام کے بجائے  لاپروائی سے ڈرائیونگ (reckless driving)  کے کم سنگین الزام پر ’’نو کنٹسٹ‘‘ کی درخواست قبول کی۔ عدالت نے اس الزام پر ایک ہزار ڈالر جرمانہ بھی عائد کیا۔ 

یہ بھی پڑھئے:’ ’دی ٹریٹرز ۲‘‘ کی فاتح کرِسٹل ڈی سوزا اور رِدا تھارانا، ٹرافی کے ساتھ ۶۶؍ لاکھ روپے بھی جیتے

 یہ معاملہ مارچ میں اس وقت شروع ہوا جب ووڈز فلوریڈا کے  جوپیٹر آئی لینڈ  کے قریب ایک سڑک حادثے کا شکار ہوئے۔ ان کی گاڑی ایک پک اَپ ٹرک سے ٹکرانے کے بعد الٹ گئی تھی۔ ووڈز حادثے میں شدید زخمی نہیں ہوئے اور گاڑی سے باہر نکلنے میں کامیاب رہے۔ پولیس کے مطابق حادثے سے قبل ووڈز مبینہ طور پر اپنے موبائل فون کی طرف دیکھ رہے تھے اور گاڑی کا ریڈیو تبدیل کر رہے تھے، جس کے باعث انہیں سامنے موجود گاڑی کی رفتار کم ہونے کا اندازہ نہیں ہوا۔ بعد ازاں انہیں DUI کے شبہ میں گرفتار کیا گیا تھا۔ تاہم ووڈز کے سانس کے ٹیسٹ میں  الکحل کی موجودگی نہیں پائی گئی۔ انہوں نے پیشاب کے ذریعے منشیات کے ٹیسٹ سے انکار کیا تھا۔ استغاثہ کے مطابق زہریلے مادوں کے ماہرین نے یہ بھی پایا کہ ووڈز کو درد کی دوا کے لیے برداشت (tolerance) پیدا ہوچکی تھی، جس کی وجہ سے یہ ثابت کرنا مشکل تھا کہ حادثے کے وقت وہ دوا کے اثر میں تھے۔ اسی پس منظر میں مقدمے کو پلی ڈیل کے ذریعے ختم کرنے پر اتفاق ہوا۔ 
ڈونالڈ ٹرمپ نے ووڈز کے بارے میں گفتگو کرتے ہوئے ان کی طویل عرصے سے جاری جسمانی تکالیف اور کمر کے مسائل کا ذکر کیا۔ ٹرمپ کے مطابق ووڈز ’’شدید درد‘‘ میں ہیں اور انہیں اپنی صحت کے حوالے سے ایک مشکل صورتحال کا سامنا ہے۔ انہوں نے ووڈز کی حالت کے تناظر میں ان کے طبی علاج اور کمر کی تکالیف کی جانب بھی اشارہ کیا۔  ٹرمپ نے یہ بھی بتایا کہ ان کی ووڈز سے نجی طور پر بات چیت ہوئی ہے اور انہوں نے گالف لیجنڈ کو ڈرائیور رکھنے کا مشورہ دیا تھا۔ ٹرمپ کا کہنا تھا کہ ووڈز کے لیے کسی ڈرائیور کی خدمات حاصل کرنا مستقبل میں انہیں اس طرح کی صورتحال سے بچانے میں مددگار ہوسکتا ہے۔ 

یہ بھی پڑھئے:انگلینڈ کی خواتین کی ٹیم نے ون ڈے میں آئرلینڈ کو ۶؍ وکٹ سے شکست دے دی

عدالت کے فیصلے کے تحت ووڈز کو پانچ سال تک گاڑی چلانے کی اجازت نہیں ہوگی۔ لاپروائی سے ڈرائیونگ کے معاملے میں عائد پابندی ایک دوسرے متعلقہ ٹریفک جرم کے ساتھ  بیک وقت  چلنے والی ہے، اس لیے مجموعی طور پر پابندی کی مدت پانچ سال ہی رہے گی۔  ٹائیگر ووڈز دنیا کے کامیاب ترین گالفرز میں شمار ہوتے ہیں اور۱۵؍ بڑے گالف ٹورنامنٹس (Majors)  جیت چکے ہیں۔ ان کا کریئر متعدد سنگین جسمانی مسائل اور سرجریوں سے متاثر ہوا ہے، تاہم وہ مختلف اوقات میں گولف میں واپسی کرتے رہے ہیں۔ موجودہ قانونی معاملہ ان کے کھیل اور ذاتی زندگی میں ایک اور بڑا چیلنج بن کر سامنے آیا ہے۔  ٹرمپ کی جانب سے ووڈز کے حق میں ہمدردانہ بیان ایسے وقت میں سامنے آیا ہے جب گولف اسٹار پانچ سالہ ڈرائیونگ پابندی اور مارچ کے حادثے سے متعلق قانونی کارروائی کے بعد اپنی صحت اور مستقبل پر توجہ مرکوز کر رہے ہیں۔