دلیپ ٹرافی۲۰۲۶ء کے فائنل میں ایسٹ زون نے ساؤتھ زون کے خلاف اپنی گرفت مزید مضبوط کرلی ہے اور چوتھے دن کا کھیل ختم ہونے تک مجموعی طور پر ۵۸۴؍رنز کی ناقابلِ یقین برتری حاصل کرلی۔ اس صورتحال کے بعد ایسٹ زون کا ٹائٹل جیتنا تقریباً یقینی تصور کیا جارہا ہے۔

دلیپ ٹرافی۲۰۲۶ء کے فائنل میں  ایسٹ زون  نے ساؤتھ  زون  کے خلاف اپنی گرفت مزید مضبوط کرلی ہے اور چوتھے دن کا کھیل ختم ہونے تک مجموعی طور پر ۵۸۴؍رنز کی ناقابلِ یقین برتری  حاصل کرلی۔ اس صورتحال کے بعد ایسٹ  زون کا ٹائٹل جیتنا تقریباً یقینی تصور کیا جارہا ہے۔ 
ایسٹ  زون نے اپنی پہلی اننگز میں کپتان  ایشان کشن کی شاندار۲۷۰؍ رنز کی ڈبل سنچری اور کمار کشاگرا کی  ۱۰۱؍رنز  کی سنچری کی بدولت ۷۰۸؍ رنز  کا پہاڑ کھڑا کیا تھا۔ جواب میں جنوبی زون کی ٹیم ۳۳۶؍ رنز پر آل آؤٹ ہوگئی، جس کے نتیجے میں ایسٹ زون کو پہلی اننگز میں ۳۷۲؍ رنز کی بڑی برتری  حاصل ہوئی۔ 

یہ بھی پڑھئے:ویمنز ایشیا کپ : ہندوستان کی فائنل پر نظریں، بنگلہ دیش سے اہم مقابلہ

ساؤتھ  زون کی جانب سے کپتان  تلک ورما  نے زبردست مزاحمت کرتے ہوئے ۲۱۱؍ گیندوں پر  ۹۹؍رن کی اننگز کھیلی، تاہم وہ اپنی سنچری مکمل کرنے سے صرف ایک رن قبل آؤٹ ہوگئے۔ ان کی کوشش کے باوجود ساؤتھ زون ۳۳۶؍ رنز سے آگے نہ بڑھ سکا۔   اس کے بعد ایسٹ  زون نے دوسری اننگز میں بھی جارحانہ انداز اختیار کیا۔ ٹیم ایک موقع پر صرف ۱۳؍ رنز پر دو وکٹیں گنوا چکی تھی، لیکن کپتان ایشان کشن نے ایک مرتبہ پھر ذمہ داری سنبھالی اور ۹۸؍ گیندوں پر۸۰؍ رنز  کی شاندار اننگز کھیلی۔ شکھر موہن نے بھی نصف سنچری بنا کر ٹیم کو مضبوط پوزیشن میں پہنچانے میں اہم کردار ادا کیا۔ 
چوتھے دن کے اختتام پر ایسٹ  زون نے دوسری اننگز میں ۵۱؍ اوورز میں ۲۱۲؍ رنز پر ۵؍ وکٹ گنوا دیئے تھے۔ اس طرح دونوں اننگز کو ملا کر اس کی برتری ۵۸۴؍ رنز  ہوگئی ہے۔ ساؤتھ  زون کے سامنے آخری دن تقریباً ۶۰۰؍ رنز کا ہدف حاصل کرنے کا انتہائی مشکل چیلنج ہوگا۔ 

یہ بھی پڑھئے:فلم ’’گوڈزیلا مانئس زیرو‘‘ کا نیا ٹریلر جاری، نومبر میں ’’رامائن‘‘سے بڑا مقابلہ ہوگا

دلیپ ٹرافی کے قواعد کے مطابق اگر فائنل ڈرا بھی ہوجاتا ہے تو پہلی اننگز میں برتری حاصل کرنے والی ٹیم کو فاتح قرار دیا جاتا ہے۔ چونکہ مشرقی زون پہلے ہی  ۳۷۲؍ رنز کی پہلی اننگز کی برتری حاصل کرچکا ہے، اس لیے جنوبی زون کے لیے ٹائٹل بچانا تقریباً ناممکن نظر آرہا ہے۔  ایشان کشن اس فائنل میں اب تک  ایسٹ  زون کے سب سے نمایاں کھلاڑی رہے ہیں۔ پہلی اننگز میں ۲۷۰؍ اور دوسری اننگز میں ۸۰؍ رنز کے ساتھ وہ مجموعی طور پر ۳۵۰؍رنز  بنا چکے ہیں۔ مشرقی زون کی موجودہ پوزیشن اسے  ۱۳؍سال بعد دلیپ ٹرافی کا ٹائٹل جیتنے  کے انتہائی قریب لے آئی ہے۔