انگلش فٹ بال سیزن کا سب سے بڑا اپ سیٹ اس وقت دیکھنے کو ملا جب دوسرے درجےکی ٹیم ساؤتھمپٹن نے پریمیئر لیگ کی ٹاپ پوزیشن پر موجود آرسنل کو ۱۔۲؍گول سے شکست دے کر ایف اے کپ سے باہر کر دیا۔

 انگلش فٹ بال سیزن کا سب سے بڑا اپ سیٹ اس وقت دیکھنے کو ملا جب دوسرے درجےکی ٹیم ساؤتھمپٹن نے پریمیئر لیگ کی ٹاپ پوزیشن پر موجود آرسنل کو ۱۔۲؍گول  سے شکست دے کر ایف اے کپ سے باہر کر دیا۔ سینٹ میریز اسٹیڈیم میں کھیلے گئے اس تاریخی میچ میں آرسنل کی ٹرافی جیتنے کی ایک اور امید دم توڑ گئی۔
میچ کے۳۲؍ ویں منٹ میں اسکاٹش اسٹرائیکر راس اسٹیورٹ نے شاندار گول کر کے ساؤتھمپٹن کو برتری دلائی۔ آرسنل کے دفاعی کھلاڑی بین وائٹ گیند کا اندازہ لگانے میں ناکام رہے، جس کا فائدہ اٹھاتے ہوئے اسٹیورٹ نے گیند کو کیپا اریزابالاگا کے پاس سے نیٹ میں پہنچا دیا۔
کھیل کے ۶۸؍ ویں منٹ میں آرسنل نے واپسی کی کوشش کی اور وکٹر جیوکریس نے کائی ہاورٹز کے پاس پر گول کر کے اسکور۱۔۱؍گول  سے برابر کر دیا۔ یہ جیوکریس کا رواں سیزن کا۱۷؍ واں گول تھا۔ میچ کے اختتامی لمحات میں آرسنل کو اس وقت بڑا دھچکا لگا جب ان کے برازیلین ڈیفنڈر گیبریل مگالہیس گھٹنے کی انجری کے باعث میدان سے باہر چلے گئے۔ اس دفاعی بے ترتیبی کا فائدہ اٹھاتے ہوئے ۸۵؍ ویں منٹ میں شی چارلس نے انتہائی پرسکون انداز میں گول کر کے اپنی ٹیم کو۱۔۲؍گول کی ناقابلِ یقین برتری دلا دی جو آخر تک برقرار رہی۔

یہ بھی پڑھئے:نورجہاں: بطور ’چائلڈ آرٹسٹ‘ کریئر کا آغاز، لیکن بطور ’ملکہ ترنم‘ پہچان بنی

مائیکل  آرٹیٹا کی ٹیم کے لیے یہ شکست کسی صدمے سے کم نہیں۔ انٹرنیشنل بریک کے دوران ۱۱؍ اہم کھلاڑیوں کی مبینہ انجریوں اور کپتان بوکایو ساکا اور ڈیکلان رائس کی عدم موجودگی نے ٹیم کی کارکردگی پر گہرے اثرات مرتب کیے۔ لیگ کپ کے فائنل میں شکست کے بعد، آرسنل نے ایک ہی سیزن میں دوسری ٹرافی جیتنے کا موقع ضائع کر دیا ہے۔اگرچہ آرسنل ابھی بھی پریمیئر لیگ میں ۹؍ پوائنٹس کی برتری کے ساتھ ٹائٹل کے لیے فیورٹ ہے، لیکن حالیہ شکستوں نے آرٹیٹا کے لیے خطرے کی گھنٹی بجا دی ہے، خاص طور پر منگل کو اسپورٹنگ لزبن کے خلاف ہونے والے چیمپئنز لیگ کے اہم مقابلے سے قبل۔

یہ بھی پڑھئے:غزہ کے مستقبل پر مصر میں حماس کے وفد کی میٹنگ

ساؤتھمپٹن نے اس جیت کے ساتھ ۱۹۷۶ء میں مانچسٹر یونائیٹڈ کے خلاف اپنی تاریخی فتح کی یاد تازہ کر دی ہے۔ یہ ٹیم اب ۲۰۲۱ء کے بعد پہلی بار ایف اے کپ کے سیمی فائنل میں پہنچ چکی ہے۔ ٹونڈا ایکرٹ کی ٹیم گزشتہ ۱۵؍ میچوں سے ناقابلِ شکست ہے اور اب ان کی نظریں چیمپئن شپ کے پلے آف اور ایف اے کپ کے فائنل پر مرکوز ہیں۔