افریقی ملک مراکش کی فٹبال ٹیم نے شاندار کارکردگی کا مظاہرہ کرتے ہوئے فیفا ورلڈ کپ ۲۰۲۶ء کے گروپ سی کے مقابلے میں اسکاٹ لینڈ کو ۰۔۱؍گولسے شکست دے دی۔

افریقی ملک مراکش کی فٹبال ٹیم نے شاندار کارکردگی کا مظاہرہ کرتے ہوئے فیفا ورلڈ کپ ۲۰۲۶ء کے گروپ سی کے مقابلے میں اسکاٹ لینڈ کو ۰۔۱؍گولسے شکست دے دی۔ بوسٹن اسٹیڈیم میں جمعہ کی رات کھیلے جانے والے اس میچ کا واحد اور فیصلہ کن گول مراکش کے اسٹرائیکر اسماعیل صیباری نے کیا۔ اس جیت کے ساتھ مراکش کے پوائنٹس ٹیبل میں چار پوائنٹس ہو گئے ہیں اور وہ گروپ میں سرفہرست ہے۔ ۷۰؍ویں سیکنڈ میں کیا گیا یہ گول ورلڈ کپ ۲۰۲۶ء کا اب تک کا تیز ترین گول ہے اور ورلڈ کپ کی تاریخ میں مراکش کا سب سے تیز گول  ہے۔

دوسرے ہاف میں اسکاٹ لینڈ نے واپسی کی کوشش کی، لیکن وہ مراکش کے مضبوط عزم کو توڑنے میں ناکام رہی۔ اس شکست کے ساتھ ہی ورلڈ کپ کے ناک آؤٹ مرحلے میں پہلی بار جگہ بنانے کی اسکاٹ لینڈ کی امیدیں اب بھی خطرے میں ہیں۔ اب انہیں ۲۴؍ جون کو برازیل کے خلاف ایک پوائنٹ حاصل کرنا ہوگا تاکہ اس کی کوالیفائی کرنے کی گارنٹی تقریباً یقینی ہو جائے۔

یہ بھی پڑھئے: فیفا ورلڈ کپ: پیراگوئے کی فتح، ترکی ٹورنامنٹ سے باہر

 برازیل نے ہیٹی کو ۰۔۳؍گول سے شکست دے کر ورلڈ کپ سے باہر کر دیا
پانچ مرتبہ کی عالمی چیمپئن برازیل نے اپنے اسٹار اسٹرائیکر میتھیئس کونہا کے دو گولوں کی بدولت گروپ سی کے دوسرے میچ میں ہیٹی کو۰۔۳؍گول سے شکست دے کر فیفا ورلڈ کپ سے باہر کر دیا۔

میتھیئس کونہا نے ایگور تھییاگو کی جگہ ابتدائی الیون میں جگہ بناکر کھیل کا آغاز کیا اور برازیل کو برتری دلائی۔ چند ہی منٹ بعد انہوں نے ایک اور شاندار گول کرکے برازیل کی برتری دگنی کر دی۔ وینیسیئس جونیئر نے گول کیپر کے ساتھ ون آن ون پوزیشن میں بہترین فنشنگ کے ساتھ تیسرا گول داغ دیا۔ دوسرے ہاف میں ہیٹی کے کھلاڑیوں نے تیزی دکھائی، لیکن وہ کوئی گول کرنے میں ناکام رہے۔ ہیٹیفیفا ورلڈ کپ۲۰۲۶ء سے باہر ہونے والی پہلی ٹیم ہے۔